Galatiami 2 - Sumi Naga CL (Re-edited) Bible (BSI)

Apostolmi no Paul Ikhilu

¹ Ampe chighibidi thiu ni ye Barnabas ngo Titus sasü Jerusalem lo iqho.

² Piyeküsü I tsükeu kiqi lono I no wuno (akhotomi ipi chekeqo vilo lomoshi) Jewkumomi gholo pikülha chekeu tsakiviu pesü pi, tishianguno ni ye adou lono pochemo momu po püamoe pi thebei shiniye ke.

³ Ikemu le Titus khuu I gholo chekeno pau ye Greekmi keghi anguka shi aphighüyiko ghavelo pimoe.

⁴ Kughengu kichile thiküzümi no tuqhou no nino Khristo lau ililai xüakeu lo puju iloghi, tishikeu lono ni sasü akütsügha lo saghini ye shike.

⁵ Ikemu ningu no asüchedo lakhimu panongu phesümoe, tishianguno kuchou tsakiviu nongu ghenguno püxüpe püatsüni kehue.

⁶ Ikemu khunono akhotomi ipi kihiche keno (panongu no kiu kiu shi aghimu I ghengu ye kiumu tipaqo kimhe akepu kühae; Alhou ye agiju chemoe) I no pi anike akhotomi ipi chekeqo ye I ghenguno ame kühae.

⁷ Tike kumono Peter pesü aphighü yiko ghave kemi lau atsakiviu pikülha penike pichetsü ketoi I pelo aphighü yiko ghamo kemi lau atsakiviu pikülha penike pichetsü keu panongu no ithulue.

⁸ (Kughengu khuu no Peter pesü aphighü yiko ghave kemi lau apostolmi kümla shipe keno, Pa no ni ghi pesü Jewkumomi lau mlawu peke),

⁹ kughou James ngo Cephas eno John, atsükuchoqo ipiche keqo no I lau küpükini tsü püakeu vethalu keno, panongu no Barnabas nikujo ikhilu eno ningu lakhi kepi sasü kuposhu, ikehu ningu no aphighü yiko ghamo kemi Jewkumomi lau wunikeu shi eno panongu no aphighü yiko ghave kemi lau wunikeu shie.

¹⁰ Panongu no avehu lakhi, I no shinishi qhiyi chekeu kümla, ti ye kumlhomi kümsülu tsülopi ningu vilo pike.

Paul no Peter Sakiyi

¹¹ Kughou Cephas no Antioch lo ighi keno I no pa gi theno sakiyi, kughengu pa ye pimiveke.

¹² Kughengu James launo timi khami puwu keu ighi mphilo pa ye Jewkumomi gholo chusho che, ikemu panongu no ighi kelo pa ye aphighüyiko küghami mqo msa kelauno pa kütashi tsüghüve.

¹³ Eno Jewmi kütami ghi pa gholo keghili shiuve, ikehu Barnabas thotsü panongu gholo keghili shive.

¹⁴ Ikemu kughou I no panongu ghili-aye ithulu keno panongu ye kuchou tsakiviu lo cheghi move kehu I no panongu kümtsü zülono Cephas vilo pi, “Nono Jewmi keghi Jewmi toi mono Jewkumomi toi xü aye, no ye kishino anguka lono Jewkumomi vilo Jewmi toi xülo piluni kea?”

Aküpülü no Achipikalu

¹⁵ Ningu ampi ye apunu lono Jewmi eno Jewkumomi axinemi kumoe;

¹⁶ ikeghi nino ithi akeu no timi lakhi ye Ayezah peluke lono kumono Jisü Khristo lau aküpülü akeu vecheo achipikalu cheni, ikehu Khristo lau aküpülü akeu vecheo achipikalu niye ningu no Ayezah shou kumono Khristo Jisü pülübe cheni, kughengu timi khumu Ayezah vecheo achipikalu monani.

¹⁷ Ikemu tsala Khristo lau achipikaluni ye müamzü anipi ninguu no axinemi ilhouve aghi aye, Khristo ye axine qeu keo? Khilemu kumoe!

¹⁸ I no kiu xaleqhive keno ti shiqhe kithe aye, ni ampi pesü hekibideu shi auvae.

¹⁹ Kughengu Ayezah vehulo ni ye Ayezah vecheo thivae, tishianguno Alhou lau xülu niye ke.

²⁰ Ni ye Khristo gholono yedavae. I lolo xüakeu ye ni kumovae, ikemu Khristo no I lolo xüani. Eno itehi I no ashi lo xüakeu ye Alhou Nu, khuu no I kimiye no I ghenguno pa ampi tsüve keno, pa gholo aküpülü vecheo xüani.

²¹ Ni ye Alhouw küpükini peve amoe, kughengu Ayezah vecheo achipikalu püaghi keaye, Khristo ye akimji kühano thivae.