Galatiami 1 - Sumi Naga CL (Re-edited) Bible (BSI)

Pethakütsü

¹ Paul, timi launo momu timi vecheo kumono Jisü Khristo eno Apu Alhou, khuu no akithi lono pa xüputhu keno, pa launo apostol shilu keu,

² eno I gholo athiküzümi akeqo no, Galatia lo akukuhouqo lau ye ani:

³ Ningu Papu Alhou eno ni Mpeu Jisü Khristo launo küpükini eno aloino keu nongu tsü ani,

⁴ pa no itehi tiqheli lhoksa lono ningu xaphe lunike ningu xine ghenguno pa ikhiphepe tsüve, ti ye ni Lhou eno Apu pulou kiqi lonoke,

⁵ pa lau alho lono alholo ajekipi apelo. Amen.

Atsakiviu Kütau Küha

⁶ Nongu ye mtazü khuu no Khristow küpükini lo nongu kulu keno pa pheve no kütau tsakiviu lo igho wove akeu no I kichiqhivae.

⁷ Kütau tsakiviu anike kumoe, ikemu timi khami no aküpüna nongu tsüno Khristo tsakiviu tuchighive tsünishi ani.

⁸ Ikemu ningu na kungugha lo kungumi namu nino nongu lau atsakiviu sheshu keu nguno bidelau sheshu aghi aye pa ye angusüu shive pelo.

⁹ Azüu no nongu vilo piveke toi, itehi ghi I no pi ide ani: Tsala khuana no nongu no ikhiluve keu nguno atsakiviu bidelau kütsü aghi aye pa ye angusüu shive pelo.

¹⁰ Ishi pi kelo ni ye timi momu Alhou launo akishekütsü laju ani keshea? Momu timi mlokiqi shinike pükapütsa ani keshea? Itehi kutolo I no timi mlokiqipu shinishi aghi aye ni ye Khristo qeu kumovae.

Alhou no Paul Kulu

¹¹ Athiküzümiqo, ni ye nongu pelo ithi penishi anike I no nongu lau atsakiviu kütsü keu ye timi launo ighikeu tsakiviu kumoe.

¹² Kughengu ni ye timi khuu launo mu ti ithuluke kumo, eno I shikake kumoe, ikemu I no ithulu keu ye Jisü Khristo vecheo pephe piye keu lonoke.

¹³ Kughengu I no püzüu Jewmi chine küxü lo ache kelo kishi ayiküsa shi Alhou kukuhou shikighime eno shipühave tsünike pükapütsa chekeno nongu no chiluvae.

¹⁴ Jewmi chine lo niw timi I qhesho kutomo gholo ni ye azüu shiche, ni puasüqo no pekishe chekeu khuaye lo ighono amlo tsüqhiyi cheke.

¹⁵ Ikemu I punu mphi lono khuu no ni kishe kütüta shino paw küpükini lono I kulu keno,

¹⁶ Pa no I pelo Jewkumomi gholo Pa ghili pikülha peniye Pa Nu I lau pephe piyeni keu pulove kelo, paikhavi lo ni ye timi khuu vilomu kighinikile moe;

¹⁷ tike kumono Jerusalem lo I züu no apostolmi shive aghi keqo laumu ni ye iqhomoe, ikemu ni ye Arabia lo wuve no itaghi Damascus lo idechile wove.

¹⁸ Tishino ampe küthü thiu ni ye Jerusalem lo Cephas xuju niye iqho eno pa sasü atsala chighipungu ngove.

¹⁹ Ikemu ni ye Ampeu thiküzüu James thono apostolmi kütami khumu ithumlae.

²⁰ (Nongu lau I no kiu ye ani keno, Alhou zülono ni ye miki amoe!)

²¹ Tithiu ni ye Syria eno Cilicia bocho lo wuve.

²² Ti kutolo Judea lo Khristo lau akeu kukuhouqo lau ni ampi ye kujuthi mono ake.

²³ Panongu ye ishi pikeu likhi chiluche, “Khuu no ningu shikighime chekeno itehi ye pa no aküpülü khikhi ghuthu lakhi lo shipühave nishi chekeno tipau kütsü anie.”

²⁴ Ikehu panongu no I ghenguno Alhou sheqhe ke.