FILIPIAMI 4 - Sumi Naga CL (Re-edited) Bible (BSI)

¹ Tighenguno I thiküzümi khunoqo I no kimiye eno sasü kusho lunishi cheni keno, I lopivi eno I kijivile tsü chekeqo, Ampeu lau mtotoi puthugho lo, I no qhuivü chekeqo.

Hakite, Shikumto, eno Akighini

² I no Euodia ngo Syntyche pama vilo Ampeu lau juno pulo küqhalu penike hakite ani.

³ Iyei, I gholo kicheu pükhükuluu vilo ghi I no pi anike totimi hipama kuphu tsülo, kughengu pama ye Clement ngo I küsami kütami gholo küqhano atsakiviu kümlapu lo I sasü lakhi shi ime cheke, panongu je ye aküxüpu Kaku lo ani.

⁴ Alhokuthu Ampeu lono alovilo, I no itaghi pini: alovilo!

⁵ Timi kümtsü no o kümtsha ghili ithi pelo. Ampeu ye aphivilo ani;

⁶ kiu lonomu amlo kütakihi kevilo, ikemu thokha lo shikimthikütsü gholono akighini eno akupulo pesü Alhou lau qhüiniju lo.

⁷ Eno Alhouw aloino keu khikhi timiw vethakulu nguno alau keno, tino Khristo Jisü küdau no nongu mlo eno nongu kükümsü khekuto anani.

⁸ Ashekhashi athiküzümiqo, kiu no kuchou, kiu no gihuküzüpu, kiu no achipiu, kiu no tsüghükhüi, kiu no juviqhiyi, kiu no ashepe tsüküzü keno, akighiche eno sheqhe küzüpu aghi aye, thime tipaqo shou kümsü puku alo.

⁹ Nongu no I launo kiu shikalu, ikhilu, chilu, eno ithuluve akeno tipaqo pewolo, eno aloinokütsü Lhou no nongu gholo anani.

Agho ghenguno Shikimthi

¹⁰ I no Ampeu küdau no shishe alovi akeu ye ado kushuo thiuno nongu ye I ghenguno alomsü kithe ani. Kuchou no nongu ye I ghenguno alomsü chekemu ado kivi ithumla no ake.

¹¹ Ni ye athokha shi aniye pi anike kumoe, kughengu kiu kiu tüqhüdo lo anamu ni ye aloqiqhiyi nikeu shika luvae.

¹² Athokha ye kiu eno pofushi akeu ye kiu keno I no ithi ani. Tuqhou lakhi I no ithilu keu ye kupukuno shiana akhüava shi anamu, eno nibonilei aghina athokha shi anamu, atüqhüdo kümtsü lo ni ye amlo qiqhiyi amasae.

¹³ Khristo no I shikumto keu vecheo ni ye thokha shilu nani.

¹⁴ Ikeghi nongu no vethakulu shi I veküsa lo kuphu tsüke.

¹⁵ Nongu Philippimi ampi no akivishi ithi anike atsakiviu pikülha tüghü lo kughou I no Macedonia qhive keno, nongu likhino kumo aye khuno kukuhou mu I sasü kütüna no tsüje eno ikhilu püamoe.

¹⁶ Thessalonica lo I no akukuphu avehupu shive keloghi nongu no ghuthu lakhi nguno alau I tsü puwue.

¹⁷ Ni ye agho laju anike kumoe; ikemu nongu no kike achekeu lo alau kighishelu penike phucheni.

¹⁸ Nongu no I tsüpuwu keu eno tinguno alau ghi ithuluvae. Nongu no Epaphroditus launo agho tsüpuwu keu ithulu ke ni ye lukümkha shivae, ti ye axokütsüngü kümllagho, Alhou lau ikhikulupu eno Pa pulou ghakishi ke.

¹⁹ Ikehu I Lhou no Khristo Jisü gholo Pa juküvü kinikülü shi akeu kiqi lono nongu vehupu kümtsü kumkhotsü nani.

²⁰ Ningu papu Alhou lau alho lono alholo ajuküvü apelo. Amen.

Kishekha Petha

²¹ Khristo Jisü je lono küpülümi kümtsü lau petha tsülo. Athiküzümi I gholo akeqo no petha nongu tsü ani.

²² Küpülümi hilau akeqo, akhoto no Caesar kibolomi no petha tsüpuwu ani.

²³ Ampeu Jisü Khristow küpükini no nongu gholo apeniu.