FILIPIAMI 3 - Sumi Naga CL (Re-edited) Bible (BSI)

Kuchou Chipiu-mikucho

¹ Ashekha shi I thiküzümiqo, Ampeu lau no alovilo. Nongu lau atsa athoshi yeni keu lo ni ye aküküpna küha eno nongu ghengu ghi tishike.

² Khunono alhoksa kümla, aphi-ashi ghakütha khuaye pecheni keno, ti atsüqo tsükhüi jukuto alo.

³ Kughengu ningu khunoqo Aghungu lono mlla eno ashi shou pükhübemo no Khristo Jisü lau akijivile cheni keno ninguu no aphighüyiko ghakemi ke,

⁴ pini aye niu ye ashi lo thime shou pükhübelu kepughi ani thono. Khuana no pa ye ashi shou pükhübelu kepu anipi aye, niu ye alau ani:

⁵ atsala akütacheni no aphighüyiko ghakemi; Benjamin laghami Israelmi; Hebrewmi no punu keu Hebrewmi; Ayezah tsa loye Phariseemi;

⁶ achineye lo amlotsü keu tsa loye, akukuhou kijiküpsau; eno Ayezah qholono amikucho shikeu loye tukutiye kühae.

⁷ Ikemu I no kiu kiu anamu Khristo je ghenguno ti ye adou kepi kihivae.

⁸ Kuchou loye I Mpeu Khristo Jisü ithive keu meküapu no thokha shoqa luve keu lono ni ye kütau thime ye qhoi avehu küha kepi kihivae. Pa je ghenguno ni ye thime kümtsü phevae, eno tipaqo ye tübatüzü shivae, tishianguno Khristo pesü I la shilu

⁹ püzü pa laumi shilu niye ke, ti ye I mikucho, Ayezah pelu keu lono ighikeu kumono aküpülü vecheo Khristo launo ighikeu, khikhi aküpülü shou bepe acheni keno achipiu-mikucho ti Alhou launo ighikeu huke.

¹⁰ Tishikeu lono I no pa ithi, paw xüchilekulu küka ithi, pa ghime küsaje, eno pa kithi lo ghi pa kimihi shino

¹¹ kiu kiu gholau nomu akithi lono xüputhulu peniye ke.

Pükapütsa Akimji Hacheni

¹² Ni ye hipau toluva momu kupukülai luve ake piamoe, ikemu Khristo Jisü no I pesü paw shiluve keu ghenguno ni ye azüu hawu cheni.

¹³ Athiküzümiqo, ni ye hipau toluve ake piamoe. Ikemu thime lakhi I no shicheni: athiu kiu ani keno kümsümave püzü pükapütsa azüu kiu ani keno ti püzüsü wucheni,

¹⁴ ni ye Alhou no Khristo Jisü vecheo kungugha küxü lo kulu keu saxü ithuluni ke akimji küdau pokive wucheni.

¹⁵ Ningu khunoqo aküpülü lo tekhoive akeno hitoi kümsü kepue; eno nongu no kütau kiuala kümsü aghimu tighi Alhou no nongu lau pephe piye nani.

¹⁶ Ikehu ningu no kiu toluve akeno tilikhi mtotoi peluni nolo.

¹⁷ Athiküzümiqo, I kimihi shilo, eno nino kichekipiye shi püatsü keu kiqi lono xücheghi kemi shou jupukulo.

¹⁸ Kughengu ni ye azüu ghi anguno pivae eno itehi ghi anhezü piji ghi pi anike timi kutomo no Khristow kros ghümi shi acheni.

¹⁹ Panongu ye kütsakungo keu no asheho nani, panongu kive huno pano lhou, eno ayeghi lo thime shou kümsü puku anipi panongu ye akukujopu pesü akijivile cheni.

²⁰ Ikemu ningu ye kungugha ghakütsami, eno ningu ye Xakuluu, Ampeu Jisü Khristo tilauno ighini keu huqhe cheni,

²¹ thokha kümtsü Pa qholo süghi lupe keu küka pesü pa no ni phimpi pesü pa juküvü phimpi toi kilive tsü nani.