FILIPIAMI 2 - Sumi Naga CL (Re-edited) Bible (BSI)

Khristo Qhokighe no Kichekipiye

¹ Tighenguno, Khristo laumi shikeu lono shikumto kilelu, kikimiye lono alokughunolu, Aghungu lono kuposhulu, ivüilailu eno amlosa qhiyi kilelu aghi aye,

² nongu kükümsü aphiphi, kikimiye aphiphi, kuloni küghüvüi amlo lakhi shikeu lono I lokivi kupu tsülo.

³ Alikhi asala kümsü keu momu ameküküha juaje pesü kiumu shikevi, ikemu aqhokigheu shino kütamiu no nongu nguno akiviu kepi kihilo.

⁴ Pütüta pulou likhi kümsü kepu kumoe, ikemu kütami pulou ghi jutsü kepue.

⁵ Khristo Jisü kükümsü ghola khikhi nonguw shilu keno, hi no nongu gholo alo,

⁶ pa ye Alhou lhoaye xapu apülaghi Alhou qhemi shimasa keu shi kihimoe,

⁷ ikemu pa ampi pesü kümsa shive, aqüaxeu lhoaye pepuve no timi kimihi shi punu.

⁸ Eno timi lhoaye kimihi shino pa ampi kuchunipe akithi, ti ye Kros lo kithi, kutolo aghokulu shive.

⁹ Tighenguno Alhou no chuqumghai ke-a lo Pa ikhiqhe püzü aje kümtsü nguno akiqheu je pesü pa tsü,

¹⁰ ikehu kungugha eno ayeghi lo ngo ayeghi qhou akemi kümtsü no Jisü je kukelo qhoqhünhe masa nani,

¹¹ eno Apu Alhou jekipipu shi kümtsü kichi lono Jisü Khristo ye Ampeu kepi piphe nani.

Ayeghi lo Aküvü

¹² Ikehu I no qhuivü chekeqo, nongu no alhokuthu agholu cheke toi, itehi ye I küalo likhino kumono I küküha lou no alau msaqhiyi eno khokhoshi pütüta xakulupu mlaphe lo,

¹³ kughengu nongu kükümsü eno akümla kümtsü Alhou gho-apulou shi peniye nongu lolo mlatsü chekeu ye Pa ke.

¹⁴ Thokha lo nhenheshi momu kütsala mono mlalo,

¹⁵ tino nongu pelo akuaye kühano tsüghükhüi shilu, ihoghülai eno chighichilai keu tiqheli lo tukutiye kühano Alhou tianuli shi ayeghi lo aküvü toi vülupe nani,

¹⁶ nongu no mtotoi aküxüpu tsa tsüqülu keu lono ishilu nani, tishikeu lono Khristo Tsala lo ni ye adou lono po püamo momu ime püamo kepi I kijivilelu nani.

¹⁷ Tsala I küxü ji huno atsaizü kümllagho toi nongu küpülü ghakishi kümllagho shou lepuku kepu shive namu, ni ye amloqi nani eno nongu gholo alovi küqha nani.

¹⁸ Tihutoi nongu ghi amlokiqi shino I gholo alovi küqha kepue.

Timothy Ngo Epaphroditus

¹⁹ Ni ye kighithe nongu lau Timothy puwuni ke Ampeu Jisü lau lajube ani, tishianguno ni ghi nongu sütsa chilu kelo I hupite luni.

²⁰ Kughengu pa toi kuchou shi nongu kivipu ghenguno alomsü tsüni kemi ni ye kütami kühae.

²¹ Kughengu kümtsü no Jisü Khristo lopu kumono pütüta pulou phucheni.

²² Ikemu nongu no Timothy philo akeu meküa ithi ani, kishi anu no apu sasü mla cheni keno, pa no titoi atsakiviu kümlapu lo I gholono hukuthu kümla shi ighike.

²³ Tighenguno I vehu ye kishive nani keno thebeive kemtsa, ni ye pa puwunie pi kümsü ani,

²⁴ eno ni ampi ghi kighithe ighive nani kepi I no Ampeu lau pükhübe ani.

²⁵ Ni ye I thiküzüu eno I gholo mlakicheu, aghükishiu, nongu tsapeu eno I vehupu lo aghini kishiu, Epaphroditus nongu lau puwu masa kepi kümsü luvae,

²⁶ kughengu pa ye nongu kümtsü kümsü kütüve eno nongu no pa ye süani pi chiluve keu huno amlosa ighivae.

²⁷ Pa ye kuchou no thiveni keshi süve. Ikemu Alhou no pa lau kimiyekini ake, pa lau likhi kumono I lau ghie, tikumo aye ni ye amloghime no amloghime kibeveni cheke.

²⁸ Ikehu ni ye pa puwu nishi keu no alau khekulhoshi ani, ti ye nongu no itaghi pa ithulu kelo alovi peniye, tishikeu lono I mlo kütakihi akeu kümghülu nani.

²⁹ Ikehu Ampeu lau juno aloviqhiyi pa ikhilulo, eno titoi kemi timi gihulo,

³⁰ kughengu nongu no I kuphu khawo tomlano akeu kümla kupuve tsüniye pa ye kümsapu kutolo sholu ghi Khristo kümla ghenguno thiveni cheghi ke.