FILIPIAMI 1 - Sumi Naga CL (Re-edited) Bible (BSI)

Pethakütsü

¹ Khristo Jisü qüaxemi, Paul ngo Timothy, no Philippi lo küpülümi khunoqo Khristo Jisü laumi shino akukuho lo kichimi eno deaconmi gholo akhani keno kümtsü lau ye ani.

² Ni Pu Alhou eno Ampeu Jisü Khristo launo ighikeu küpükini eno aloino keu no nongu gholo apelo.

Shikimthikütsü eno Akighini

³ I no nongu kümsülu ke kümtsü lo I Lhou shikimthi acheni,

⁴ I kighini kümtsü lo ni ye alhokuthu nongu ghenguno alokivishi inikhu acheni,

⁵ kughengu atsakiviu kümlapu huthuke tsala lono ishi kutolo nongu no atüna kivishi kutupo tsüke.

⁶ I no mtsüqhei hi pi ani, khuu no nongu lolo akümla kivi huthutsü keno Pa no ti pekibewo Jisü Khristo ikighi Tsala lono kupukülai kishekha tsü nani.

⁷ Ni ye nongu kümtsü ghenguno hitoi kümsü tsü kelaue, kughengu I no akughuki lo akelo ngo atsakiviu süsho eno iqhikumto chekelo nongu no küpükini lono I gholo kutupo tsü kehu ni ye alhokuthu I mlo lo nongu püacheni.

⁸ Kughengu I no kishi Khristo Jisüw ivüilai keu mlo xapu nongu kümsükütü cheni keno Alhou no Iw thopiu ke.

⁹ I no ishi inikhu cheni: nonguw kikimiye ye alaushi akighithi ngo kiviküsa kimchikulu gholono ikowolu peni;

¹⁰ tishianguno kiu no akighiche keno nongu no kishelu no Khristo Tsala loye mqhamqhiyi eno tukutiye küha püzü

¹¹ Jisü Khristo launo ighikeu mikucho xathi huno nongu shepichhi pe Alhou juküvü eno shekiqhe shilu penie.

I no Xüni aye Khristo

¹² Athiküzümiqo, ni ye nongu pelo ithi penishi ani, I lau kiu shive keno kuchou loye tiuno atsakiviu pekholu kepu shive,

¹³ tishikeu lono kükaki lo ghukhemi eno kütami ghi I no akughushi akeu ye Khristo ghenguno kepi ithi khavae.

¹⁴ Eno I no akughu shikeu lono athiküzümi kutomo no Ampeu lau pükhübe luve kehu itehi ye msa mono Atsa pikülha nike alau mto kithe ani.

¹⁵ Khami ye anhekushu eno kitighekile keu lono Khristo sheshu cheni, ikemu khamiu ye achipiu mlo xapu sheshu cheni.

¹⁶ Hi amqo akiniu no ni ye atsakiviu sükusho ghenguno hilau akughushi anipi ithi no kikimiye lono mla cheni.

¹⁷ Ikemu amqo atüghüu ye pütüta kimjiu xapu ani thono kuchou mlo xapu Khristo sheshu chemo kehu I no akughushi akelo itaghi I kijipüsani keu kümsü cheni.

¹⁸ Tishiaye kiu pinia? Amqükini momu kuchou, khikhiu lono shi aghimu ala thokha lo Khristo pesü sheshu keu no ni ye alovi ani. Iyei, ni ye itaghi alovi anani,

¹⁹ ti ye nongu kighini lono eno Jisü Khristo Ghungu kukuphu huno I kuqhophe kulupu akeu I no ithi ani kehue,

²⁰ kughengu I mlo alouno laju achekeu ghi ni ye kiu lonomu kujovemo nani, ikemu thosülo toi itehimu akumto shino xüna thinamu, Khristo pesü I phimpi lono agigihupu shitsü niye ke.

²¹ Kughengu I müzülo ye I no xüakeu ye Khristo ghenguno, eno thive keu huno I lake.

²² Tsala I no ashi phimpi lono xü akepushi aye, I ghenguno ti ye athi pithilu kepu kümla shi amasa keu ke. Tishimu ni ye khikhiu kishe kepu keno pilu amoe.

²³ Ni ye hi küma dolo I tsakibipe ani: hipa yeghi qhive no Ampeu gholo auve keu pavi keke tiuno I pulou shi ani;

²⁴ ikemu nongu vehupu ghenguno xüaghi masa keu huno alau akhotou shive ani.

²⁵ Hi no mtsüqhei shipe ni ye xüaghini aphi, eno nongu küpülü azüu hawolu no alovi lupe kepushi nongu kümtsü gholo ananie pi I no ithivae,

²⁶ tishianguno I no nongu lau ideighilu keu huno nongu no I jupe Khristo Jisü lau akijivile lukepu alau shinani.

²⁷ Akhotou ye hike, nongu xüghola ye Khristo tsakiviu gholo aküzüqhiyi kimshilu pelo, tishianguno I no ighi no nongu kujuthulu na monamu, nongu ye amlo akükümsü küthape lakhi shino atsakiviu küpülü ghüshi ghenguno kümtsa akumto shi puthugho anipi ni ye chiluni shi ani

²⁸ thono kiu lonomu nongu mjochile chekemi pelo shikümsave penishi amoe. Hi no panongu kütsaveni keu michipue, ikemu nongu ghenguu ye hi no Alhou launo ighikeu xakulupu ke.

²⁹ Kughengu Khristo je ghenguno nongu ye Pa pülüni keu likhi kumono Pa ghenguno imeni keu do kivi ghi kophepe nongu tsüvae,

³⁰ ti ye wovekeu lo I no kiu sasü küpüghü chekeno nongu no ithulu püani, eno itehimu ni ye tishi aphie pi nongu no chilu akeu ghüshi tipau lo nongu ghi aphiphishi kuloji lo.