EZRA 9 - Sumi Naga CL (Re-edited) Bible (BSI)

Ezra Kighini

¹ Tishive kethiu, hiyampemi no I lau ighi no pi, “Israelmi, achinemi eno Levimi ye aghakhu lo ashiaye, Canaanmi, Hittimi, Perizimi, Jebusimi, Ammonmi, Moabmi, Egyptmi eno Amorimi akeqo eno panow aphikümqhüpu lhoaye lono kütüta shimphi.

² Kughengu panongu no tipaqo nga khami pesü anipu shiniye eno panopu nipu shitsü niye luvae, tishikeu lono akimthe shiaye ye aghakhu lo ashiayeqo sasü kitekungovae. Eno pükhükümla hipau lo hiyampemi ngo sakiphemiu no atou shi anie.”

³ I no hipau chilu khavi I phimini ngo hebephi süxüve eno I kichimhi ngo I kütsü lono asa phijove eno apuchopungo iqave.

⁴ Tishino I no avela ghakishi kutolo apuchopungo iqa akelo Israel Lhou tsa chilu no khokhoshi chekeqo no akughu lono ideighi kemi küpülü küküha ghenguno I sühope ngove.

⁵ Eno avela ghakishi do ighi kelo ni ye I phimini küixü xapu kümvü tave, I no qhoqhünhe luve no Ampeu I Lhou lau I u xachhope

⁶ ishi pi: “O I Lhou, O lau I gi peqheni ke ni ye kujo ighü ani kughengu ni xine no ningu kütsü nguno qhemghai ikughivae I Lhou, eno ni kipimi no atsütsü tohi ikuvae.

⁷ Ni puasüqo ghuloki lono ishi tsala kutolo ningu ye akipimi kije shi ighivae. Ni xine ghenguno ningu, niw kükami eno ni chinemi ye aghakhu lo kükamiqo u lo ilovae, azütakikihi lono ikiqivae, akughu lo wuvae, pükaqhivae, eno ishi tsala lo toi akukujo kitikhi lo ilovae.

⁸ Ikemu ningu lau ghükulumi qhitsüni ye eno ningu pelo Pa kimthe-a lo ijelu peniye itehi ado hami ghenguno Ampeu ni Lhou no kimiyeqhiyi keu pephe piyevae, tishianguno ni Lhou no ni gi yepüvü tsü eno aqü-axe lono ningu ghüthi püxü tsüniye ke.

⁹ Kughengu ningu ye aqü-axemie. Tishimu ni Lhou ye aqü-axe lo ni qhive moe, ikemu Persia kükami zülono Paw iqemokeu kikimiye ningu lau pephe piye tsüno ni Lhou ki shipuku lupe, ti kütsave keu mlakithe lupe, eno Judea ngo Jerusalem lo sükusho ni tsü peke.

¹⁰ “O ni Lhou, itehi ningu ye kiu pinia kea? Kughengu ningu no O zakütsüqo pheve ake,

¹¹ ti ye Nono O qemi tungkupmiqo vecheo azah tsüno pikeu, ‘Nongu no ilo qhasü luniye akeu yeghi ye tile ashiaye akeqo kimthe kumo no shipixive keu yeghi, ashekichi lono ashekichi kutolo panow mithekumo no aphikümqhüpu shi chhitoi anie.

¹² Tighenguno nongu ngaqo pesü pano puqo tsü kevi, momu pano ngaqo pesü nopuqo tsü kevilo, eno khilemu pano lokughuno momu küakini phu kevilo, tishianguno nongu ye mtotoi luno ayeghi lo akivi chulu nani eno pülhapuju no tianuli ghenguno amheghi lakhi shi qhitsülu nani.’

¹³ Niw küsakügha kümla eno akipimi kije ghenguno ni shou aghime kümtsü ikughive kethiu ghi, nino ithulu akeu ye, ni Lhou ye ni xine ghenguno nino aghime ithulu masakeu nguno aghulou pesü tsüke eno ghükulumi hitoi ningu tsüke,

¹⁴ imaye ningu ye itaghi O zakütsüqo hexave no timi khunoqo no aphikümqhüpu hipaqo pape cheni keno tipaqo sasü kütshükungo külauni keshea? Nono ni kütsave no ghükulumi momu pokaluni kemi kühave pemoke kutolo No ye ni jupe axuide moni keshea?

¹⁵ O Ampeu, Israel Lhou, No ye achipiu ke, ningu ye ishi tsala lo ghükulumi shi pokalu keqo ke. Julo, ni kipimi pesü O zülo ighi anie, kughengu khunomu hipau ghenguno O zülo ighilu amoe.”