EZRA 8 - Sumi Naga CL (Re-edited) Bible (BSI)

Ezra gholono Ideighi keqo

¹ Akükau Artaxerxes yekipe ghuloki lo Babylon lono I gholo iqho keqo lagha, ali tomi hipaqo:

² Phinehas li lono Gershom. Ithamar lono Daniel. David lono Hattush.

³ Parosh li lo Shecaniah lono Zechariah, pa gholo timi 150 no ajesü.

⁴ Pahath-moab li lono Zerahiah nu Eliehoenai eno pa gholo timi 200.

⁵ Zattu li lono Jahaziel nu Shecaniah, eno pa gholo timi 300.

⁶ Adin li lono Jonathan nu Ebed eno pa gholo timi 50.

⁷ Elam li lono Athaliah nu Jeshaiah eno pa gholo timi 70.

⁸ Shephatiah li lono Michael nu Zebadiah eno pa gholo timi 80.

⁹ Joab li lono Jehiel nu Obadiah eno pa gholo timi 218.

¹⁰ Bani li lono Josiphiah nu Shelomith eno pa gholo timi 160.

¹¹ Bebai li lono Zechariah eno pa gholo timi 28.

¹² Azgad li lono Hakkatan nu Johanan eno pa gholo timi 110.

¹³ Adonikam lilo khunoqo athiu no ighi keno, panoqo je ye Eliphelet, Jeuel, eno Shemaiah, eno panoqo gholo timi 60.

¹⁴ Bigvai li lono Uthai ngo Zaccur eno pama gholo timi 70.

Ezra no Levimi Kupuwu

¹⁵ Ahava lo qowu akeu ghoki lono I no panoqo hekütsü, eno tilau ningu ye atsala küthü aghazü shipe ngoe. I no hekütsülu keqo eno achinemi phuju kelo, Levi laghami ye lakhimu aghimoe.

¹⁶ Tithiu I no sakiphemi Eliezer, Ariel, Shemaiah, Elnathan, Jarib, Elnathan, Nathan, Zechariah, eno Meshullam kupuwu, eno Joiarib ngo Elnathan, khuu pama alokütsümi keno pama ghi ku,

¹⁷ eno Iddo lau panoqo puwu. Iddo ye Casiphia lo sakiphemi ke, Ezra no panoqo vilo Iddo ngo pa thiküzümi eno achineki lo aqemi Casiphia lo akemi vilo kiu pipe kepu keno pive, ti ye, Alhou kilo hukuthumi ningu lau puwu tsülo ipi.

¹⁸ Eno Alhou u no ningu gholo ake ghenguno panongu no Israel nu Levi lagha lo Mahli limi thai kemi lakhi Sherebiah, eno pa nuli ngo abolomi pano 18 ningu lau saighi;

¹⁹ eno Hashabiah, pa gholo Merari laghami Jeshaiah, pa limi eno anuli 20;

²⁰ tinguno alau David ngo paw hiyampemi no Levimi tucho peniye kishe kütüta shipeqhi keqo achineki qemi 220. Panongu kümtsü je yepüani.

Sükusho Ghenguno Kümvü eno Inikhu

²¹ Tithiu I no kümvüni ke Ahava ghoki lono asheshu, tishino ningu ampi no Alhou zülo aqhokighe shinike, eno Pa launo ningu ghüzüla, ni tianuli eno tinhemgha kümtsü süshotsü penike Pa phuni keu shie.

²² Ningu no akükau vilo, “Ni Lhou u ye Pa phuighi kemi kümtsü shou acheni, ikemu Pa pheve kemi shou Pa loghu küka acheni,” ipive kehu ni ghüzüla lo aghümi launo süshotsü penike pa vilo ghüshimi loji eno khurshimi tsülopi khuni keu ni ye kujove.

²³ Tighenguno ningu no hipau ghenguno kümvü eno ni Lhou vilo qhüiniju, eno nino khukeu Pa no chilu tsü.

Akümllagho Khemi Achinemi

²⁴ Tithiu I no achinemi sakiphemi chighikini: Sherebiah, Hashabiah, eno pama limi chighi kishe kütüta shive.

²⁵ Eno akükau ngo paw lapiyemi, ampemi eno Israelmi tilau akeqo no akümllagho shi Alhou ki ghenguno ghükayi ngo ameshoyi bohu mllakeu kümtsü I no panoqo lau ahu shiphetsü.

²⁶ I no ghükayi ahu qhethonhe muku kini no aqhe, ghükayi li ahu 6,800 eno ameshoyi ahu 3,400 pesü panoqo u lo mighipe sütsü,

²⁷ ameshoyikhu muku me ahu tache tüxa eno ameshoyi toi akughupu shi chekeu alazayi phuphushi keu bohu kini.

²⁸ Eno I no panoqo vilo pi, “Nongu ye Alhou lau akimthe eno abohuqo ye akimthe ke, eno ghükayi ngo ameshoyi ye nongu puasüqo Lhou Ampeu lau pulokini kümllagho tsüve keue.

²⁹ Alhou kilo achebo akeu lono nongu no achinetomi, Levimi eno Jerusalem lo Israel lagha lo atomi zülono ahu shimoke kutolo tipaqo khekuto eno kütsü kiyilo.”

³⁰ Tighenguno achinemi ngo Levimi no Alhou ki Jerusalem lo süghini ke ghükayi ngo ameshoyi eno abohu ahu shive keqo ikhiluve.

³¹ Tithiu ningu ye aqhi atüghüu atsala chighiakiniu lono Jerusalem lo wuniye Ahava ghoki qhive. Ningu Lhou u no ni gholo ae, eno Pa no aghümi ngo ghüthemi u lono ningu xaphetsü.

³² Ningu no Jerusalem lo ighi, eno tile atsala küthü ngove.

³³ Atsala abidiu lo Alhou ki bocho lono ghükayi ngo ameshoyi eno abohuqo ahu shipe Uriah nu Meremoth achineu eno pa gholo Phinehas nu Eleazar, eno pama gholo Levimi, Jeshua nu Jozabad eno Binnui nu Noadiah noqo u lo süvetsü.

³⁴ Kümtsü kihiju eno hujuve no tipaqo kimghi kümtsü yeluve.

³⁵ Tipa ghuloki lo khunoqo akughu lono ighi keno, haphe sawuve no ideighi kemi no Israelmi kümtsü ghenguno Israel Lhou lau akipti kümllagho amshitsü chighikini, ambetsü lhotoku tsügho, ambeti lhotsüni tsüni tsü, eno anetsü chighikini no axine kümllagho shi tsü. Hi kümtsü akipti kümllagho shi tsüe.

³⁶ Panoqo no akükau yezah ghi Aghoki Kukuu akükauw yepemi eno anghqo lau tsüve, panongu no timiqo eno Alhou ki ghenguno akukuphu tsüe.