EZRA 7 - Sumi Naga CL (Re-edited) Bible (BSI)

Timiqo Shika penike Ezra Puwu

¹ Hipa thiu, Persia kükau Artaxerxes yekipe ghuloki lo Ezra, pa ye Seraiah nu, Seraiah no Azariah nu, Hilkiah nu,

² Shallum nu, Zadok nu, Ahitub nu,

³ Amariah nu, Azariah nu, Meraioth nu,

⁴ Zerahiah nu, Uzzi nu, Bukki nu,

⁵ Abishua nu, Phinehas nu, Eleazar nu, Aaron achinetou nu—

⁶ Ezra hipau ye Babylon lono iqhoghi. Pa ye Ampeu, Israel Lhou no tsükeu Moses Yezah kighithimi lakhi, eno pa no khukeu kümtsü akükau no pulotsüe, kughengu Ampeu pa Lhou u no pa gholo ake.

⁷ Artaxerxes küka mpe akütsüniu lo Israelmi khami, achinemi ngo Levimi, alephemi ngo khagho khemi, eno achineki lo aqemi ishi Jerusalem lo iqho.

⁸ Ezra ye aqhi apunguu lono Jerusalem lo ighi, ti ye akükau mpe akütsüniu shi ae.

⁹ Aqhi atüghüu, atsala atüghüu lo pa no Babylon lono chethu, eno aqhi apunguu atsala atüghüu lono pa ye Jerusalem lo ighilu, kughengu Ampeu u akivi no pa gholo ake.

¹⁰ Ezra ye Ampeu Yezah phino tipau pape eno Israel lo Pa yezah shika nike amlo tsüqhiyi shike.

¹¹ Hi ye akükau Artaxerxes no Ezra achineu, ayezah kükütsüu, Ampeu zakütsü eno Israelmi tsükeu yezah ithisheve keu lau yesü yekeu kiyepa ke:

¹² “Artaxerxes, kükamiqo kükau no achineu, kungugha Lhou Yezah kükütsüu Ezra lau ye ani, aloino alo. Itehi

¹³ I kükaqha lo Israelmi momu pano chinemi momu Levimi khukhumu Jerusalem lo iqhonishi aghi kemi ye o gholo iqho penike I no xaküthaza mla ani.

¹⁴ Kughengu akükau eno paw lapiyemi tsüni no o Lhou Yezah, khikhi o u lo ani keno tipa kiqi lono Judah eno Jerusalem ye kiu toi ani keno ighiju wu penike o puwu ani,

¹⁵ eno ghükayi ngo ameshoyi khikhi akükau eno paw lapiyemi no Israel Lhou, Jerusalem lo akeu lau kümsa no ikhiphe tsü keno tipaqo xapuwu penike,

¹⁶ tipaqo gholono ghükayi ngo ameshoyi nongu no Babylon ghakhu lo ithulu keu, eno timi ngo achinemiw pulokini kümllagho pano Lhou ki Jerusalem lo akeu ghenguno pulopinyi tsüni pi ashoqhi shikeqo pewulo.

¹⁷ Pisa hipau pesü nongu ye kutokughoi shino amshitsü, anetsü, ambeqo gholono panoqow athi kümllagho eno atsaizü kümllagho qhülo, eno tipaqo pesü akiptia khikhi Jerusalem lo nongu Lhou ki ani keno tileno mlla lo.

¹⁸ Ghükayi ngo ameshoyi achili ye kiu kiumu no eno o thiküzümi no alokeu eno nongu Lhou pulou kiqi lono peitha lulo.

¹⁹ O Lhou kilo peitha penike tsüve keu bohuqo ye nono Jerusalem Lhou zülo ikhiphe tsülo.

²⁰ Kiu kiumu o Lhou ki ghenguno tsü masa keu shive kelo no ye akükau kinibo lono tsülu nani.

²¹ “Eno ni, akükau Artaxerxes, no Aghoki Kukuu phughi lo akükau kinibo peithakütsümi kümtsü lau xaküthaza lakhi tsü ani: Kiu kiumu achineu Ezra, kungugha Lhou Yezah kükütsüu no nongu launo avehupu shikeu ye amlo tsüqhiyi shino tsülo,

²² ghükayi 3,400 kutolo, ashothi ahu qhethonhe chighi, atsaizü liter 2,000, thazü liter 2,000, eno amti ye kihikütha kühano tsülo.

²³ Kiu kiumu kungugha Lhou ki ghenguno kungugha Lhou no azah tsükeu ye tishilu pelo, tikumo aye Pa loghu no akükau ngo pa nuliqo yekipeqha shou ikughi nosake.

²⁴ Ningu no highi nongu lau pithi puwu akeu ye achinemi, Levimi, alephemi, ahukikha khemi, achineki lo aqemi, momu Alhou ki hipau lo aqemi kütami lau zame eno asüqha benikeu ye achipi kumoe.

²⁵ “Eno no, Ezra ye o Lhou lokütsü o lolo akeu kiqi lono yepemi eno xaküthami süküsü shino panoqo pelo Aghoki Kukuu phughi lo timiqow xaküthami shipelo, ti ye o Lhou yezah ithi akemi. Eno panongu no ithi aghimo aye nono shikani.

²⁶ Khukhumu o Lhou yezah eno akükau yezah gholu move aye, pithive kepu shina, hapheve kepu shina, paw thime kivi küghaluve kepu shina, akughu shive kepu shinamu pa shou aghime tsatsai belo.”

²⁷ Ningu puasü Lhou, Ampeu sheqhelo, Pa no Jerusalem lo Ampeu ki akeu pesü juviqhiyi tsüniye hitoi keu pesü akükau mlo lo sütsü ke,

²⁸ Pa no akükau eno paw lapiyemi ngo akükauw hiyampemi akughushumi kümtsü zülono Paw iqemokeu kikimiye I lau piye ke. I no amlo mtolu, kughengu Ampeu I Lhou u ye I gholo ae, eno I no Israelmi sakiphemi I gholo iqho penike hekütsü.