EZRA 6 - Sumi Naga CL (Re-edited) Bible (BSI)

Darius Xaküthaza

¹ Tithiu akükau Darius no Babylon lo kükamiw yekümla kiqhi-a lo akiyeqo lhekide penike xaküthaza shive.

² Ikelo Media cheaxü lo akighiki akeu Ecbatana lo liküküzü kaku ithulu, tipau shou hitoi yepüaghi: “Yekükütsü.

³ Akükau Cyrus mpe atüghüu lo, akükau Cyrus no xaküthaza lakhi tsü: Alhou ki Jerusalem lo akeu ghenguno, a-a khileno aghakishi mlla cheni keno aki tipau shiqhe kithelu pelo eno tipa boqhaqo gholuve pelo. Akiqhelau auxakuchho muku tsüni eno akijelau auxakuchho muku tsüni,

⁴ tipau gholo atu kije ajolha küthü eno asüpa no ajolha lakhi qhani. Ame ye akükau kinibo lono ikhiphe tsüni.

⁵ Eno Alhou kilo ameshoyi ngo ghükayi bohu, khikhi Nebuchadnezzar no Jerusalem lo Alhou chineki akeu lono ikhipe Babylon lo süghive keno, tipaqo ye Jerusalem lo achineki akeu lo pechilewo pütüta-a lo qhive pelo. Nongu no tipaqo pewo Alhou kilo qhini.”

⁶ “Tighenguno, Tattenai, Aghoki Kukuu phughi lo angh, Shethar-bozenai, eno nongu lojimi angh khunoqo Aghoki Kukuu phughi lo ani keno, nongu ye putosüve lo.

⁷ Alhou ki hipau lo akümla shi akeu ye tishi mla apelo. Jewmiw angh ngo layemiqo pelo tilehi Alhou ki hipau shiqhe kithelu pelo.

⁸ Tinguno alau, Alhou ki hipau shiqhe kithe akeu ghenguno nongu no Jewmi layemi lau kiu shikepu keno I no xaküthaza mlatsü ani. Ame puwove keu ye Aghoki Kukuu phughiqo launo zame qhalu keu, akükau süqha lono pesü kighithe timi hipaqo tsüveni.

⁹ Eno kungugha Lhou lau akipti kümllagho ghenguno kiu kiumu avehupu shikeu—amshitsü, anetsü momu ambe, ashothi, amti, atsaizü, momu thazü, Jerusalem lo achinemi no avehupu shi aketoi—tipaqo ye tsalakipetsü vezü mono panoqo tsülo,

¹⁰ tishianguno panongu no kungugha Lhou mlokiqipu shi aghakishi tsülu nani, eno akükau ngo pa nuliqo küxü ghenguno inikhu tsü nani.

¹¹ Itaghi I no xaküthaza lakhi mla akeu ye tsala khuana no azah hipau kilive aye, pa ki lono akika süjopheve tsüni eno tipa-a lono pa jiqhiveni, eno pa ki ye tübatüzü amoqhe puku keu-a shiveni.

¹² Khuu no pa u pesü hipau bukiqeni momu Jerusalem lo akeu Alhou ki hipau kütsani keno, Alhou khuu no Pa je tile apeniye qhipüani keno Pa pelo kükami momu timi tipaqo haleve peniu. Ni Darius no xaküthaza mlavae; amlo tsüqhiyi hipau shikupu lo.”

Achineki Shiqhi no Ikhiphetsü

¹³ Tithiu, akükau Darius no atsa tsüpuwu keu kiqi lono, Aghoki Kukuu phughi lo angh Tattenai, eno Shethar-bozenai ngo pano lojimiqo no amlo tsüqhiyi akükau no azah kiu tsü keno tipau shi.

¹⁴ Eno tungkupu Haggai ngo Iddo nu Zechariah pama no tungkuptsa pitsü keu vecheo Jewmi layemi no achineki shiqhe eno aju iche mlalu. Israel Lhou yezah vecheo, eno Persia kükami Cyrus, Darius ngo Artaxerxes noqow xaküthaza vecheo panongu no achineki mlaqhive;

¹⁵ aki hipau ye akükau Darius yepe mpe akütsüghou, Adar qhi atsala aküthüu lono mlaqhilu.

¹⁶ Israelmi, achinemi, Levimi eno haküghütsüve no ideighi kemi no alokivi shi Alhou ki hipau khakiqhi ikhilu.

¹⁷ Alhou ki hipau ikhiphetsü kelo panongu no amshitsü 100, anetsü 200, ambe 400 pesü mlla, eno Israelmi kümtsü ghenguno axine kümllagho shi anetsü 12 mllae, ti ye Israel shiaye kiqi lono ke.

¹⁸ Eno Moses Kaku lo yepüake toi, panongu no Jerusalem lo Alhou kümlapu ghenguno achinemi ngo Levimi pesü panoqo lapha lo kijesüve tsü.

Hechekulu Pini

¹⁹ Aqhi atüghüu atsala chighiabidiu lo haküghütsüve no ideighi kemi no hechekulu pinilu.

²⁰ Kughengu achinemi ngo Levimi ye panongu ampi shikimthe luve; kümtsü no akimthe shi ae. Tighenguno panongu no haküghütsüve no ideighi kemi ghenguno, pano lojimi achinemi ghenguno, eno panongu ampi ghenguno ishi, Hechekulu mbe ghiqhi.

²¹ Ambeshi ye Israelmi haküghütsüve no ideighi kemi, eno khunono Ampeu, Israel Lhou mllani ke aghakhu lo mithekumo shiayeqo launo kütüta shipe aqo gholo süküqhalu keno tipaqo no chue.

²² Eno panongu no alokivi shi atsala tsüni kutolo Kholaqhi sümokeu Sho Pine ikhilu, kughengu Ampeu no panoqo pelo alovilupe eno Assyria kükau mlo tsüghü sawo panongu gholo alupe, tishikeu lono pa no Israel Lhou, Alhou ki kümla lo panoqo kuphutsü.