EZRA 5 - Sumi Naga CL (Re-edited) Bible (BSI)

Akümla Huthu kithe

¹ Tungkupu Haggai ngo Iddo nu Zechariah pama no Judah ngo Jerusalem lo Jewmi akeqo lau Israel Lhou panongu gholo akeu je lono tungkuptsa pitsü.

² Tileno Shealtiel nu Zerubbabel ngo Jozadak nu Jeshua pama no ithu no Jerusalem lo Alhou ki shiqhe kithe, eno Alhouw tungkupmi no pama gholo shino pama kuphu.

³ Tipa tüqhüdo lo Tattenai, Aghoki Kukuu phughi lo Angh eno Shethar-bozenai ngo pama lojimi ighi no panongu vilo pi: “Aki hipau shiqhe kithe no shiqhilu penike khuu no azah nongu tsü kea?”

⁴ Panongu no highi iniju: “Aki hipau shi akeqo ye khunoqo no kea?”

⁵ Ikemu panongu Lhou nhethi ye Jewmi layemiqo shou ae, eno asütsa no Darius tove no yesü lono hipau khokichile ideighi moke kutolo panongu ye panoqo lakha moe.

Akükau Darius lau Yesü

⁶ Hi ye Aghoki Kukuu phughi lo angh Tattenai eno Shethar-bozenai ngo pano lojimi akeqo no akükau Darius lau tsüpuwu keu yesü kiyepa.

⁷ Panoqo no pa lau asütsa tsükeu lo hitoi yepüa: “Akükau Darius lau aloino keu alo.

⁸ Ningu ye Judah phughi lo, Alhou akijeu kilo wue pi akükau pelo ithi penishi ani. Ti ye atuqu kuloghiqo pesü mla ani, eno asüpa pesü aliwo lo sü ani. Akümla hipau ye panoqo u lono tsaqütsalei mla ani.

⁹ Ikehu ningu no layemi hupaqo vilo iniju eno ishi panoqo pütsa: ‘Aki hipau shiqhe kithe no shiqhilu penike khuu no azah nongu tsü kea?’

¹⁰ Ningu no o pelo ithi peniye panongu je ghi iniju, eno panow sakiphemiqo je ye luveni ye shike.

¹¹ Ikelo panongu no ningu khochile keu ye hike: ‘Ningu ye atsütsü eno ayeghi Lhou qemi, eno ningu ye khaghi no mlave keu ki, ti ye Israel kükau akijeu no mla eno kishekha keu ki tipau shiqhe kithe ani.

¹² Ikemu ningu puasüqo no kungugha Lhou mlo shikighide tsüke ghenguno Pa no panoqo pesü Babylon kükau Nebuchadnezzar, Chaldeami u lo süvetsü. Pa no aki hipau kütsave no timiqo küghape Babylon lo wuve.

¹³ Tishimu, Babylon kükau Cyrus mpe atüghüu lono Cyrus akükau no aki hipau shiqhe kithelu penike xaküthaza tsü.

¹⁴ Eno Alhou kilo ameshoyi ngo ghükayi bohu, khikhi Nebuchadnezzar no Jerusalem lo akeu chineki lono süwuve no Babylon chineki lo süve keno, akükau Cyrus no tipaqo Babylon chineki lono ikhiphepe milakhi Sheshbazzar, ipikeu, khuu pa no angh shivepe keno, pa u lo süvetsü;

¹⁵ eno pa vilo pi, “Abohu hipaqo luvelo, wuno tipaqo Jerusalem chineki lo qhivelo, eno Alhou ki ye tipa-a lo shiqhe kithelo.”

¹⁶ Tithiu Sheshbazzar hipau no ighi püzü Jerusalem lo akeu Alhou kilo aboqhaqo ghove, eno tipa ghuloki lono itehi kutolo hipau ye shiqhe ani, ikemu shiqhi mlano aphie.’

¹⁷ Tighenguno, akükau kivipu shi aghi aye, tilau Babylon lo kükamiw yekümla kiqhi-a lo akükau Cyrus ye Jerusalem lo akeu Alhou ki shiqhe kithe penike xaküthaza tsü kemo keno lheju pelo. Eno akükau pelo hipa vehulo pa mlokiqi shi ningu pithitsü pelo.”