EZRA 4 - Sumi Naga CL (Re-edited) Bible (BSI)

Achineki Kümla lo Akülami

¹ Kughou Judah ngo Benjamin mjochile kemi no hakiphive kemi ye ideighi no Ampeu, Israel Lhou chineki shiqhe anie pi chilu keno,

² panongu no Zerubbabel eno ali tomi sasü kusho no pi, “Ningu ghi nongu gholo mla pelo, kughengu nongu no mlla cheke toi ningu ghi nongu Lhou mlla cheni, eno ningu ye Assyria kükau Esarhaddon, khuu no ningu hilehi saighi keno, pa ghuloki lono Pa lau aghashi ighivae.”

³ Ikemu Zerubbabel, Jeshua eno Israel lo kütami ali tomi no panongu vilo pi, “Ningu no ni Lhou ki shiqhe akeu lo nongu ye kiumu shi akepu kühae; ikemu Akükau Cyrus, Persia kükau no azah ningu tsüke toi, ningu likhi no Ampeu, Israel Lhou ki shiqhe nani.”

⁴ Tithiu aghakhu lo timiqo no Judah timiqo lokümthsüve tsüno panoqo pelo akümla shimsave pe

⁵ eno pano kimji shopükave tsüniye Persia kükau Cyrus ghuloki lono akükau Darius yekipe kupuju külügho pesü kijemiqo tsüe.

⁶ Eno Ahasuerus yekipe hukuthu lo panongu no Judah eno Jerusalem lo xüküami lachile ghi ngukube keu kaku yepuwu.

Akükau Artaxerxes lau Yesü

⁷ Persia kükau Artaxerxes ghuloki lo Bishlam, Mithredath, Tabeel eno pano lojimi no akükau Artaxerxes lau yepuwu. Yesü ye Aramaic lono ye eno phisü kelono pebide tsüe.

⁸ Zatsüu Rehum eno akiyeu Shimshai pama no Jerusalem külakeu yesü lakhi hitoi akükau Artaxerxes lau ye:

⁹ zatsüu Rehum, akiyeu Shimshai, eno pama lojimi kütami, xaküthami, angh, hiyampemi, Persiami, Erechmi, Babylonmi, Susa timi, ti ye Elammi,

¹⁰ eno shiye kütami akijeu eno akiqheu Osnappar no haphe sasü Samaria mishighüna eno Aghoki Kukuu phughiqo lo xüsüvepe keqo no ye ani.

¹¹ (Hi ye panoqo no tsüpuwu keu yesü kiyepa lakhie.) “Artaxerxes akükau lau: O qemi, Aghoki Kukuu phughi lo timiqo no petha tsü ani. Itehi

¹² Jewmi khunoqo o launo ningu lau iqhoghi keno panoqo ye Jerusalem lo wuvae pi akükau no ithilo. Panoqo ye hu hekibide eno küsakügha mishighüna shiqhe kithe ani. Panoqo ye aliwo mlaqhi ayae eno aboqha shikithe ani.

¹³ Akükau pelo ithi penishi akeu ye tsala mishighüna hipau shiqhe kitheve eno aliwo mlaqhive aye, panongu ye zame momu asüqha tsümove nani eno akükau küakini laghi ye mikheve nani.

¹⁴ Itehi ningu ye kükaki lo amti mineve kemi akehu, akükau gihu move keu thopi shinikeu ye ni ghenguno achipi kumoe, tighenguno nino akükau lau pithi puwu ani,

¹⁵ tishianguno o puasü yekikithi kaku lheju peniye ke. Nono tipau lono ithulu no mishighüna hipau ye hekibide ghüna lakhi, kükami eno aphughiqo ghüzave cheni, eno khaghi nomu ayekipe ghobide niye hileno xukutho ipeghi chenie pi ithi nani. Hi ghenguno mishighüna hipau ye kütsaleve ke.

¹⁶ Nino akükau pelo ithivepe akeu ye tsala mishighüna hipau shiqhe kitheve eno tipau liwo mlaqhive aye, no ye Aghoki Kukuu phughi lo asaje kühave nanie.”

Akümla Lakükha Za

¹⁷ Akükau no khokichile tsü puwu: “Zatsüu Rehum eno akiyeu Shimshai eno pama lojimi khunoqo Samaria eno Aghoki Kukuu phughi lo akhani keno, petha tsü ani. Eno itehi

¹⁸ yesü khikhi nongu no ni lau tsüpuwu keno I zülo mtsümishei phisüvae.

¹⁹ Ikehu I no xaküthaza lakhi shino phukideju kelo ithulu keu ye mishighüna hipau ye azüu no kükamiqo mjochile ithughi, eno hekibide ngo ayekipe ghokibide ye hileno shi ighivae.

²⁰ Kükami kumtomi no Jerusalem shou ayepe ighiva, eno Aghoki Kukuu phughi lo ghi ayepe no zame ngo asüqha pesü pano tsü ighivae.

²¹ Tighenguno timi hipaqo pelo akümla shipemo nike xaküthaza lakhi mlalo, eno I no ti xachile moke kutolo mishighüna hipau ye shiqhe kithemla.

²² Eno hipau vehulo kughucho monike jukuto lo. Kushiye shiküpsa pelo ikoishe no akükau ghüza apeni kea?”

²³ Tishino, kughou Akükau Artaxerxes yesü pesü Rehum ngo akiyeu Shimshai eno pano lojimi zülo phisü keno, panongu no mtazü Jerusalem lo Jewmi lau wuno anguka lono panoqo pelo mla pemove.

²⁴ Tithiu Jerusalem lo Alhou ki kümla huye lakhave, eno Persia kükau Darius yepe mpe akiniu tomoke kutolo mla mono ngove.