EZRA 3 - Sumi Naga CL (Re-edited) Bible (BSI)

Akiptia Shiqhe kithe

¹ Kughou aqhi akütsüniu ighi keno, Israel nuliqo ye mishiphuqo lo ae, eno kümtsü no aqoshi Jerusalem lo hekütsü luve.

² Tile Jozadak nu Jeshua no pa lojimi achinemi, eno Shealtiel nu Zerubbabel no pa laghaqo sasü puthugho, eno panongu no Israel Lhou kümlla khache shiqhe, tipa shou no akipti kümllagho mllani ye shi, ti ye Alhou timi, Moses Yezah lo yepüakeu kiqi lono.

³ Panongu no tipa-a lo akiptia ghope qhive, kughengu aghakhu lo timi ashiayeqo ghenguno panongu ye msa ake, eno tipa-a lono panongu no akipti kümllagho Ampeu lau tsü, inaqhe eno avela kipti kümllagho tsüe.

⁴ Panongu no Ayezah lo yepüake toi Apusho lo Pine ikhilu, eno ayezah kiqi lono tsalakipe kipti kümllagho atsala lo kihitha tsü ketoi tsüe,

⁵ tithiuno alhoaye lo kipti kümllagho, aqhi kithe kümllagho, kihitha tsükeu kiqi lono Ampeu lau aghulhu shi chekeu, eno khukhumu pulokini kümllagho pesü Ampeu tsükeu shike.

⁶ Aqhi akütsüniu atsala atüghüu lono panongu no akipti kümllagho pesü Ampeu lau mlla thuve. Ikemu Ampeu chineki boqha ye qhamono ae.

⁷ Ikehu panongu no atu ngo asü kümlamiqo pisa tsü, eno Persia kükau Cyrus launo puloza ithulu ketoi Lebanon lono cedar süboqo pewo azüghi lono Joppa lo yipe piqitsü penike chuqu-kusho ngo thazü pesü Sidonmi ngo Tyremi tsüe.

Achineki Shiqhekithe

⁸ Panongu no Jerusalem lo Alhou kilo ighike mpe akiniu, aqhi akiniu lo Shealtiel nu Zerubbabel ngo Jozadak nu Jeshua pama no pano laghami, achinemi, Levimi eno khunoqo akughu lono Jerusalem lo ideighi keno panoqo sasü achineki huthu. Panongu no Levimi, ampe muku nguno kunguu shive keqo Ampeu ki kümla lo jukütsü penike süküsü shi.

⁹ Jeshua no pa nuli ngo pa thiküzümi, eno Judah nuli Kadmiel ngo pa nuli kümtsü küqhano panoqo gholono Henadad nuli eno Levimi, pano nuli eno athiküzümiqo sasü Alhou kilo akümlami jukütsü.

¹⁰ Kughou akümlami no Ampeu chineki boqha qhaluve keno, achinemi no panongu phimini pepuve no afuko pesü azüu ipeghi, eno Levimi Asaph nuliqo no küghapayi pesü Israel kükau David mijekütsü kiqi lono Ampeu sheqheni ke ighive.

¹¹ Eno panongu no küpape ghi ale phe, sheqhe eno shikimthi keu pesü Ampeu tsü, “Kughengu Pa ye aloe, kughengu Paw iqemokeu kikimiye ye pülhapuju Israel lau acheni.” Kughou panongu no Ampeu kilo aboqha qhaluve kehu Ampeu sheqhe keno, timi kümtsü no asütsa kuloghi lono ighae.

¹² Ikemu achinemi ngo Levimi eno ali tomi, kichimi kutomo khunoqo aki atüghüu ithulu püa keno, panongu no aki hipau boqha qhave keu ithulu kelo, kütami kutomo no alovi igha akeghi panongu ye asütsa kuloghi lono qae,

¹³ ikehu timiqo ye alokivi sütsa ngo aküqa sütsa kimchi mlave, kughengu timiqo no asütsa kuloghi lono igha eno ti ye putou ghi chilu ake.