EZRA 1 - Sumi Naga CL (Re-edited) Bible (BSI)

Cyrus Shekushu

¹ Persia kükau Cyrus mpe atüghüu lo, Ampeu tsa Jeremiah kichi lono pikeu shikupu niye, Ampeu no Persia kükau Cyrus ghungu xukutho, ikehu pa no pa kükaqha kümtsü lo ashekushu lakhi shino tipau akiye lo süve:

² “Persia kükau Cyrus no ishi piani: Ampeu, kungugha Lhou no ayeghiqha lo kükaqha kümtsü I tsüvae, eno Pa no Jerusalem, khikhi Judah lo ani keno, tile Pa ki shiqhe peniye azah I tsüvae.

³ Nongu gholo Paw timi aghi keu ye pa Lhou no pa gholo apenike pa pelo Jerusalem, khikhi Judah lo ani keno, tilau iqho pelo, eno Ampeu, Israel Lhou, khuu Jerusalem lo ani keno, Pa ki shiqhe kithe pelo.

⁴ Eno xüaghi kemi ye, pa no khile khile aghi namu, ghükayi ngo ameshoyi, tinhemgha, lhoxü, tinguno alau pulokini kümllagho pesü Alhou ki Jerusalem lo akeu ghenguno pa kuphulo.”

⁵ Tithiu Judah eno Benjamin shiaye lo ali tomi, achinemi ngo Levimi, eno Alhou ghungu no khunoqo xukutho keno, panoqo no ithuve no Ampeu ki khikhi Jerusalem lo ani keno, tipau shiqhe kitheni ke iqhove.

⁶ Eno panongu phivilo xüakemi no kümsa no tsükeu nguno alau itaghi ghükayi, ameshoyi, tinhemgha, lhoxü, eno amekusho nhemgha pesü kuphutsü.

⁷ Ampeu ki lo abohu, khikhi Nebuchadnezzar no Jerusalem lono ikhisü wuve no pa lhouqo kilo qhive keno akükau Cyrus no tipaqo pechile ighive.

⁸ Persia kükau Cyrus no hipaqo pechile ighive no akinipighiu Mithredath pelo jukükütsüu shipe. Pa no tipaqo kihipe Judah kükapuu Sheshbazzar tsüve.

⁹ Tipaqo kikihi ye hike: ameshoyi chithakhu 30, ghükayi chithakhu 1,000, pitipho chekeu 29,

¹⁰ ameshoyi kulholibo 30, ghükayi kulholibo 410, eno abohu kütau no 1,000;

¹¹ ameshoyi ngo ghükayi bohu kümtsü küqha kelo 5,400. Kughou Sheshbazzar no haphe sawuve kemi Babylon lono Jerusalem lo saiqhoghi keno, pa no hi kümtsü tileno pechile iqhoghive.