EZEKEL 9 - Sumi Naga CL (Re-edited) Bible (BSI)

Ajulho Kümllami Pithive

¹ Tithiu Pa no I kini lo asütsa kuloghi lono ighasü tsüno pi, “Mishighüna shou ghikiqhimi ighini ye akemi punukhoi saighi lo, milakhikhi no pütüta u lo kütsakungo keu ghünanu pelulo.”

² Eno julo, khagho ahuu küdau no timi tsügho ighi, milakhikhi no pütüta u lo heqhi-ghiqhi chekeu ghünanu peche, eno panoqo gholo timi lakhi phepheike phi pepu ae, yepuku kepu pesü pa chita lo khapu ae. Eno panoqo no alou ilo no akümlla-khache alazayi no shikeu zülo puthugho luve.

³ Tipa dolo Israel Lhou juküvü khikhi achineki kulaghi lo Cherub shou akeno tipau ye kunguu ikuve. Eno Pa no timi hipau phepheike phi pepu akeu khuu yepuku kepu pesü pa chita lo khapu akeno pa kue.

⁴ Ampeu no Pa vilo pi, “Jerusalem mishighüna qha kuchopu wulo, eno khunoqo no tile aphikümqhüpu shikeu ghenguno akümza eno amloghuju shi ani keno panoqo kishe lo amchipu lakhi shipuku lo.”

⁵ Eno kütamiqo vilo Pa no pikeu I no chilu, “Pa papesü mishighüna hipau lo wuno ghiqhi lo. Nongu nhethi no juzüve kevilo eno nongu ye kikimiye piye kevilo.

⁶ Kitemiqo vejoi pithive lo, lhothemi eno ilimi, itimi eno topumi pithive lo, ikemu khunoqo shou amchipu ani keno tipaqo lakhimu bukevilo. Eno I chineki lono huthulo.” Tighenguno panongu no achineki lo akemi layemiqo launo huthu ke.

⁷ Tithiu Pa no I vilo pi, “Achineki shipixi lo, eno achineki khala lo ghiqhive keqo pesü shepichhi lo.” Ikehu panongu no wuno aphughi kupuju ghiqhi thuve.

⁸ Kughou panongu no ghiqhi woche keno, ni ye I likhi ae, eno I no I gi pishiqho luve no qa, “Ya Ampeu Alhou, Jerusalem shou O loghu lepuku akelo No ye Israel lo ghükulumi ghi kütsaveni keshea?”

⁹ Tile Pa no I vilo pi, “Israel ngo Judah laghami kipimi ye shishe kije ke. Ayeghi hipau ye aji no chhitoivae, eno mishighüna ye achipikumo kümla no chhitoivae. Kughengu panongu no pi, ‘Ampeu ye ayeghi hipau phevae, eno Ampeu ye ithulu amoe.’

¹⁰ Ikemu I ghengu ye, I nhethi no juzüve monani, momu Ni ye amlosa qhiyi monani; I no panoqo kümla pesü panoqo kütsü shou betsü nani.”

¹¹ Julo, phepheike phi pepu akeu timi hipau no yepuku kepu pesü pa chita lo khapu akeu no atsa süghi no pi, “Nono azah tsü ketoi I no shive tsüae.”