EZEKEL 8 - Sumi Naga CL (Re-edited) Bible (BSI)

Achineki lo Aphikümqhüpu

¹ Ampe akütsüghou, aqhi akütsüghou, atsala apunguni, I no I kilo Judah lo layemi gholo iqa akelo, Ampeu u no tilehi I shou ikughive.

² Tile I no jukelo akoghe lakhi timi jukimihi ipeghi. Kiu pa chita toi ipeghi keno tipa qhou ami eno pa chita shou no yevüqai keu kiuala alazayi toi phuphushi keu kimihi shie.

³ Pa no au jukimihi lakhi I küdau chhophe eno I kütsüsa lono ni pugho luve, eno Aghungu no ayeghi ngo kungugha dolo I sünheqhe luve no Alhouw kungunhetsü lono Jerusalem khagho kulaghi lo achebo alou ahuu küdau akeu lo anhekushu julho lakhü, khipau no anhekushu xukutho akeno tilau I sasü ighi.

⁴ Eno julo, akhila lo kungunhetsü I no ithulu ketoi tile Israel Lhou juküvü ae.

⁵ Tithiu Pa no I vilo pi, “Timi nu, itehi ahuu küdau o nhethi tsüpuku lo.” Ikehu I no I nhethi tsüpukupe ahuu küdau jukelo ahuu akümlla-khache khagho kulaghi lo anhekushu julho hipau ae.

⁶ Eno Pa no I vilo pi, “Timi nu, panongu no kiu shi ani keno no ye ithulu anima, ti ye aphikümqhüpu kije Israel laghami no hile mlano I kimthe chineki lono putou I hapuwuve akeu no ye ithulu anima? Ikemu itaghi aphikümqhüpu alau nono ithulu nani.”

⁷ Pa no achebo kulaghi lo I sailo, eno kughou I no jupuwo keno, julo, atupikiye lo akighipe lakhi aghi.

⁸ Tile Pa no I vilo pi, “Timi nu, atupikiye chhuilo lo.” Ikehu I no atupikiye chhuilo, eno julo, tilau akulaghi lakhi aghi.

⁹ Pa no I vilo pi, “Alou ilolo, eno panongu no hile aphikümqhüpu kümla shi akeu julo.”

¹⁰ Ikehu I no alou ilo no ju. Tilau atupikiye kümtsü homxa ghi aphikümqhüpu itikiche lhoxü, tüghashiqo, eno Israel laghami julhoqo kümtsü kixi pukupe aghie.

¹¹ Tipaqo zülo Israel lagha lo layemi lhotsüni no puthugho ae, panoqo gholo Shaphan nu Jaazaniah ghi puthugho ae. Milakhikhi u lo akipti bohu pesü ngoa, eno akipti bohu lono amchhi kunguu phoiku ae.

¹² Tithiu Pa no I vilo pi, “Timi nu, Israel lagha lo layemi no ajutho akeu chebo lo pütüta shelo aküzü lono kiu shi ani keno no ye ithulu akema? Kughengu panongu no pie, ‘Ampeu ye ningu ithulu amoe, Ampeu ye ayeghi hipau phevae.’”

¹³ Pa no I vilo hi ghi pi, “Itaghi panongu no aphikümqhüpu mla akeu hinguno akijeu nono ithulu nani.”

¹⁴ Tithiu Pa no Ampeu kilo khagho ahuu akulaghi akeu lo I sailoghi, eno julo, tilehi topumiqo iqa no Tammuz ghenguno mloqa aghi.

¹⁵ Tithiu Pa no I vilo pi, “O timi nu, no ye hipau ithuluve akema? Aphikümqhüpu hipaqo nguno alau nono ithulu nani.”

¹⁶ Pa no Ampeu kilo achebo alou I sailo. Eno julo, Ampeu chineki kulaghi lo akisheqho ngo akümlla-khache küma dolo timi pano muku pungu-a toike aghi, ti ye Ampeu chineki ye panongu zübou shive eno panoqo gi no kipela küdau shive no kipelau khetsünhe mlla aghi.

¹⁷ Pa no I vilo pi, “O timi nu, no ye hipau ithuluve akema? Israel laghami no aphikümqhüpu hilehi shi akeu ye thime aghulo lakhi kesheno panongu ye ngukangugha jeli ghi pesü no ayeghi hipau shepichhi eno itaghi I xukutho no alau I mlo shikighide ani kea? Julo, panongu ye ihulo keu shi I thaigha auvae.

¹⁸ Tighenguno Ni ye aloghu pepheniae. I nhethi ye panoqo juzüvemo nani, momu Ni ye amlosa qhiyi monani. Eno panongu no asütsa kuloghi lono I kini lo ighasü anamu, I no panoqo ghügha chilu tsümo nani.”