EZEKEL 7 - Sumi Naga CL (Re-edited) Bible (BSI)

Ampeu Loghu Tsala

¹ Ampeu tsa I lau ighi:

² O no timi nu, Ampeu Alhou no Israel yeghi vilo ishi piani: Kishekha! Ayeghi ako bidi shou kishekha ighivae.

³ Itehi kishekha ye nongu shou ighivae, I no I mlokighide nongu shou puwu nani; I no nongu laghi kiqi lono nongu lau küghatha nani, eno nonguw aphikümqhüpu kümtsü ghenguno I no nongu ghime nani.

⁴ I nhethi ye nongu juzüvemo momu Ni ye amloighi monani, ikemu nongu gholo aphikümqhüpu ake lono I no nongu kümla ghenguno nongu ghime nani. Tileno nongu no Ni ye Ampeu kepi ithi nani.

⁵ “Ampeu no ishi piani: Kütsakungo keu shelo kütsakungo keu! Julo, ti ye ighivae.

⁶ Kishekha ye ighivae.

⁷ Nonguw kishekha ye nongu lau ighivae, O ayeghi lo küxümiqo. Ado ye ighivae; atsala ye kupunuvae, mbumghu keu tsala kethono naghutoqo shou no alokivi shi igha keu tsala kumoe.

⁸ Itehi ye I no mtazü nongu shou I loghu pukuni eno I mlokighide nongu shou pukuni, nongu laghi kiqi lono nongu lau küghathani, nonguw aphikümqhüpu kümtsü ghenguno I no nongu ghime nani.

⁹ Eno I nhethi ye nongu juzüvemo nani momu Ni ye amlosa qhiyi monani. Aphikümqhüpu no nongu gholo aphi lono I no nongu kümla ghenguno nongu ghime nani. Tileno nongu no Ni ye Ampeu nongu ghimeqhi keu kepi ithi nani.

¹⁰ “Atsala hu julo! Julo, ti ye ighivae! Nongu kütsakungo keu tsala ighivae; aqheküsü ye puipeghivae; aqheküza ye mini ipeghivae.

¹¹ Kütsakungo keu no kixikila qheküsü toi thuwuvae. Panoqo khumu ghülumo nani, panow kupukuno na küakini namu kühave nani; panoqo gholo akighichemi kühave nani.

¹² Ado ye ighivae; atsala ye tovae. Qhülu akemi no alovi kevilo momu jelu akemi no mloqa kevilo, kughengu aloghu ye kümtsü shou ikughivae.

¹³ Kughengu panongu no xüake lo akijemi ye pa no kiu jeve akeno tipau lo idechile ighilu moae. Kughengu kungunhetsü ye aqokitikhi kümtsü ghenguno ke; eno tipau ye idechile ighimo nani; pa kipimi ghenguno timi khumu pa küxü jukuto lumo nani.

¹⁴ “Panongu no afuko küigha eno thokha kümtsü kutove ke, ikemu khumu aghüshi lo wumoe, kughengu aloghu ye aqokitikhi kümtsü shou ikughivae.

¹⁵ Azütakikihi ye ashou ani; püsa ngo püqümiye no alou ani. Khuu no aluza lo ani keno azütakikihi lono thive nani, eno khuu no mishighüna lo ani keno püqümiye ngo püsa no munove nani.

¹⁶ Tsala khuana ghülu kemi no pokalu aye, panongu ye naghutoqo lo wuve nani, akhila lo amiqhi toi panongu milakhikhi no pütüta kipimi ghenguno mloqa nani.

¹⁷ Au kümtsü qeivae, eno akhonhe no khokho shivae.

¹⁸ Panongu ye yeqhiyephi pepu luvae, akümsa no panoqo küzü luvae. Panoqo gi lo akukujo likhivae, eno panoqo kümtsü aboghe ishovae.

¹⁹ Panongu no panow ghükayi alaghila lo kuthole, eno ameshoyi ye mithekumo thime toivae. Panow ghükayi ngo ameshoyi ye Ampeu loghu lono xamlae. Panongu ye tipau pesü pano khüava ghapiqi lumoe momu pano kive shepichhi lumoe. Kughengu tino pano pukhu püsüpe axine shiveke.

²⁰ Panongu ye panow jukivi chiku-chila pesü qheza eno tipau pesü panow aphikümqhüpu julhoqo eno niqhinilai keu juthoqo mlae. Tighenguno I no hipaqo pesü panoqo ghenguno mithekumo thime shive tsüni.

²¹ Eno xulepuwuve penike I no inaghami u lo süve tsü nani, ayeghi lo kixikilami no pükalu keu nhemgha shivepe nani, eno panongu no tipau shikitiqe nani.

²² I no panoqo launo I gi kughove nani, eno panongu no I chineki shikitiqe nani. Küpkami no tipau lo iloghi no shikitiqe nani.

²³ “Ayikichhe iqiphelo! Kughengu ayeghi ye aji pele keu no chhitoivae eno mishighüna ye heqhi buqhi keu no chhitoivae.

²⁴ I no shiyeqo dolo alhoksau saghi no panoqo ki luvepe nani. I no akumtomi qheküza kishekhave tsü nani, eno panow akimthe-aqo ye shipixive nani.

²⁵ Kughou amloghuju ighini keno, panongu no külakishi phu nani, ikemu kiumu shilumo nani.

²⁶ Kütsakungo keu shelo kütsakungo keu ighi; alatsa veküpha keu shelo alatsa veküpha. Panongu no tungkupu launo kungunhetsü phuju nani; achinemi launo ayezah eno layemi launo akükütsü pühave nani.

²⁷ Akükau no mloqae, yepemi no aghüthiküsü no küzüluve, ayeghi lo timiqo ye kichi kümsa keu lono anhü thizümüive. Panoqo laghi kiqi lono I no panongu lau mla nani, eno panow küghakütha kiqi lono I no panoqo shou küghatha nani, eno Ni ye Ampeu kepi panongu no ithi nani.”