EZEKEL 6 - Sumi Naga CL (Re-edited) Bible (BSI)

Ajulho Kümlla shou Aghime

¹ Ampeu tsa I lau ighi:

² “Timi nu, Israel lo naghutoqo küdau o gi kughopuwo lo, eno panoqo küla keu tungkuptsa pilo,

³ Nongu Israel lo naghutoqo, Ampeu Alhou tsa inilo! Ampeu Alhou no naghuto eno atoghi, akuthoku eno akhilaqo vilo ishi piani: Julo, I no azütakikihi nongu shou süghi nani eno qhemghaike-aqo kütsave tsü nani.

⁴ Nonguw akiptia ye küghüküghaleive nani eno axokütsüngü kiptia ye kubove nani, I no nonguw ajulhoqo zülono nongu ghiqhi nani.

⁵ I no Israelmi sükumo pesü pano julhoqo zülo ghope qhitsü nani, eno I no nongu saghi pesü now akiptia homxa ghi kuthole nani.

⁶ Nongu no khile khilemu küghüna keu mishighünaqo ye shipüsave nani eno qhemghaike-aqo ye kütsave nani, ikehu nongu kümlla khacheqo ye shipüsa eno kütsave nani, no julhoqo ye kubove eno kütsave nani, now axokütsüngü kiptia hephove nani eno nongu kümlaqo shipühave nani.

⁷ Ghiqhive kemi no nongu dolo ikiqi nani, eno nongu no Ni ye Ampeu kepi ithi nani.

⁸ “Ikemu I no nongu khami püxüpe qhinani. Kughou nongu khami no azütakikihi lono pokalu no shiyeqo dolo eno aghakhuqo lo apanaghaveni keno

⁹ tileno nongu küghape wuve keu shiyeqo dolo akelono nongu pokalu keqo no I kümsülu nani. Kishi panoqow ghaghu mlo eno anhethi no I launo kughosü pano julhoqo mineuve kelono I mlo hephove tsü keno panongu no kümsülu nani. Eno panongu no panow kixikila kümla eno kuchhube kütsüla ghenguno pano ampi jupe aphimqhü nani.

¹⁰ Panongu no Ni ye Ampeu kepi ithi nani. Ni ye panoqo lau kixikila hipau shinie pi akiqi kühano pi püamoe.”

¹¹ Ampeu no ishi piani: “Nongu u kukhulo, nongu pukhu ti ghi pilo, Aha, Israel laghamiw aphikümqhüpu kixikila ghenguno panongu ye azütakikihi, püqümiye eno püsa lono ikiqive nani.

¹² Timi khuu no putou ani keno püsa lono thive nani, khuu no aphivilo ani keno azütakikihi lono ikiqive nani, eno khuu ghülu no xüluni keno püqümiye lono thive nani. I no hitoi panoqo shou I loghu puku nani.

¹³ Ghiqhive keqo no akiptia homxape ajulho akeqo gholo, qhemghai keu toghi lo, naghuto kütsüqa lo, asübo lo, aphisübo miniboi keu lo, khile khilemu panongu no pano julhoqo lau axokütsüngü mlla chekeu-aqo lo ikiqi aghi kelono panongu no Ni ye Ampeu kepi ithi nani.

¹⁴ I no panoqo shou I u chhopuwo nani, asayeqha lono Riblah kutolo panongu no küghüna akeu kümtsü küghüküghalei shipüsave tsü nani. Tileno panongu no Ni ye Ampeu kepi ithi nani.”