EZEKEL 5 - Sumi Naga CL (Re-edited) Bible (BSI)

Jerusalem ye Kütsave nani

¹ “O timi nu, azütakikihi kütsügha ikhilu lo. Tipau pesü akütsüsa kütsamiw aqe toi o kütsüsa ngo o kichimhi miyeve lo. Tithiu asa ahu shinike ghenguno akimghipu ikhilu lo.

² Leighi ke tsala kupuve kethiu mishighüna mta lono asa kikije küthü lo lakhi pesü ami no pitive lo. Kikije küthü lo lakhi pesü mishighüna vehomxa ghi azütakikihi no ghitha lo. Eno kikije küthü lo lakhi pesü amülhü lono küzale lo, eno I no panoqo papesü I zütakikihi ikhijo luveni.

³ No ye asa kitila ikhilu no tipau pesü ow chijeboike phishe lo tsüghave lo.

⁴ Eno itaghi asa hami ikhilu no ami mta lo vesü no ami lono pitive lo. Tileno Israel laghami kümtsü lau ami ipeghi nani.

⁵ “Ampeu Alhou no ishi piani: Hi no Jerusalem ke. I no shiyeqo mta lo aghakhu kümtsü no li homxape qhike.

⁶ Ikemu li no shiyeqo nguno alau kixikila shikeu lono Iw pimheyeqo hebidevae, eno li homxape akeu ghakhuqo nguno alau I yezahqo hebidevae; kughengu panongu no Iw pimheyeqo milive eno I yezah lo cheche move ke.

⁷ Tighenguno Ampeu no ishi piani: nongu homxape akeu shiyeqo nguno alau nongu no mqhumza ke ghenguno eno I yezah lo cheche move, Iw pimheyeqo gholu move eno nongu homxape akeqow pimheye kiqi lonomu xümove ke

⁸ ghenguno Ampeu no piani: Julo, Ni ye nongu lachile ani. Eno shiyeqo nhethe lono I no nongu lau aghime süghi nani.

⁹ Nonguw aphikümqhüpu kümlaqo ghenguno nongu lau khilemu shiju mphikeu I no shiniye ani, eno khikhi nongu lau shiniye ani keno titoi keu ye itaghi khilemu shimo nani.

¹⁰ Tighenguno apunoqo no pano nuli shi chu nani, eno anuliqo no pano papuqo shi chu nani. I no aghime nongu lau süghi nani, eno nongu khukhumu xülu keu ye I no amülhü la lo hale puwuve nani.

¹¹ Tighenguno Ampeu no asheshu, I no xü aketoi, nonguw aphikümqhüpu eno kuchhube kütsüla kümla vecheo nongu no I chineki shikitiqevae, tighenguno Ni ye Iw kikimiye ikhichile luveni eno amloighi nongu jumo momu akipimi qhitsümo nani.

¹² Kikije küthü lo lakhi ye püsa lono thive nani eno püqümiye nongu gholo ighive no püghave nani; kikije küthü lo lakhi ye azütakikihi lono ikiqive nani; eno kikije küthü lo lakhi ye I no amülhü la kümtsü lo hale puwuve nani eno azütakikihi süjophe no panoqo pape ghiqhi nani.

¹³ “Ikehu I mlokighide ye titoi ighi nani, eno I no I loghu panoqo shou lepuku no I likhi I ghapiqi nani. Panongu no Ni ye Ampeu kepi ithi nani, kughou I no I loghu kighide panoqo shou lepukuni keno panongu no Ni ye I nhekushu lono piqhi kepi ithi nani.

¹⁴ Tinguno alau I no nongu pesü küghüküghaleive tsü nani eno nongu homxape akeu shiyeqo ngo nongu hechewu kemi kümtsü zülo aphikümqhüpu shivetsü nani.

¹⁵ Nongu homxape akeu shiye kümtsü zülo nongu ye atichepu eno thoküghapu, ghutu keu eno msaichi kepu lakhi shive nani, axukighide, amlokighide lono I no aghime nongu shou be nani, Ni ye Ampeu ke; I no piqhivae,

¹⁶ hi ye I no nongu kütsani ke ghenguno akithipu püqümiye piji, kütsakungo keu piji nongu lau kapuwu kelono, eno püqümiye alau alaushi nongu shou süghi eno nongu lau asho xapughi chekeu lakhave tsü kelono tishi nani.

¹⁷ I no püqümiye eno tüghashiqo nongu lau puwu nani, eno tipaqo no nongu nuliqo püqapunu nani. Püsa eno aji no nongu shou ighi nani, eno I no azütakikihi nongu shou puku nani. Ni ye Ampeu ke; I no piqhivae.”