EZEKEL 44 - Sumi Naga CL (Re-edited) Bible (BSI)

Kükapuu Ghenguno Khagho

¹ Tithiu pa no achineki lo khagho akeu nguno khalau I sachile ighi, ti ye kipelau küdau ae eno ti ye khapüae.

² Ampeu no I vilo pi, “Khagho hipau ye khapüa nani; hipau ye khaqhimo nani, eno khumu hipau veche ilomo nani, kughengu Ampeu, Israel Lhou no hipau lono iloghive ake. Tighenguno hipau ye khapüa nani.

³ Kükapuu likhi no tile iqa no Ampeu zülono asho chunani. Pa ye khagho ikulo lo achebo akeu küdau no ilo nani, eno tipau laghi lono ideipe nani.”

⁴ Tishino pa no ahuu khagho, achineki zülo akeu laghi lono I saighi, eno julo, Ampeu juküvü no Ampeu chineki chhitoive. I no I gi pishiqho luve.

⁵ Eno Ampeu no I vilo pi, “Timi nu, akivishi jukimchi luvelo, o nhethi tsükhope julo, o kini kughope Ampeu chineki lo ayezah I no o vilo piniye akeu kümtsü inilo. Eno achineki kulaghi ngo akimtheki lono ipeve kepu laghiqo kümtsü akivishi jukimchi luvelo.

⁶ Eno hekibide kibolomi, Israel laghami vilo pilo, Ampeu Alhou no ishi piani: O Israel laghami, nonguw aphikümqhüpu kümla kümtsü kughomae,

⁷ kughou achuqupu, atha, eno aji pesü I mlla keno nongu no inaghami, amlo eno ashi lo aphighüyiko ghamo kemi I chineki lo ngo peniye sasü eno I chineki shikitiqeve ke. Now aphikümqhüpu nguno alau nongu no Iw puloshoqhi kubovae.

⁸ Eno Iw akimthe thime khuayeqo pape move, ikemu I kimtheki lo I yezah nongu ghenguno tsükeu nongu no kütami pelo pape luvepe ke.

⁹ “Ikehu Ampeu Alhou no ishi piani: Inaghami Israelmi gholo akemi, amlo eno ashi lo aphighüyiko ghamo kemi khumu I kimtheki lo ilomo nani.

¹⁰ Ikemu Israelmi no lavela lo wuve kelo Levimi khunono I launo putosüve no ajulhoqo pape wuve keno, panongu ye aghime xapu nani.

¹¹ Panongu ye I kimtheki lo hukuthumi shi nani, achineki lo khaghoqo jukuto eno hukuthu kümla shi nani. Panongu no akipti kümllagho ghiqhi nani eno timiqo ghenguno aghakishi tsü nani, panongu no timiqo huthuni ke panoqo zülo puthugho nani.

¹² Kughengu panongu no pano süatu julhoqo zülono Israel kibolomi lau achine kümla shino panongu lau apukhu küpsüpu xine shike, tighenguno I no panoqo ghenguno tushoqhive, ipi Ampeu Alhou no asheshu, eno panongu ye pano ghime xapu nani.

¹³ Panongu ye achinemi shi I qenike I kupunu ighimo nani momu Iw akimthe thime khikhi ighono akimthe keno tipaqo kupunu ighimo nani, ikemu panongu ye pano kukujo eno aphikümqhüpu shive keqo xapu nani.

¹⁴ Ikeghi I no achineki lo aghinikishi kümla, tipau lo akümla shimasa keu kümtsü shi penike I no panoqo süsü nani.

Levimi Ghenguno Akhuaye

¹⁵ “Ikemu Zadok laghami, Levimi achinemi, khunoqo Israelmi no I launo lavela lo wuve kelo I kimtheki lo aghini shiche keno, panongu no I huthuni ke I kupunu ighi nani. Eno panongu no atha eno aji pesü I mllani ke I zülo puthugho nani ipi Ampeu Alhou no asheshu.

¹⁶ Panongu no I kimtheki lo iloghi no I huthuni ke I ghulhu lüpa lo ighi nani, eno I yezah pape nani.

¹⁷ Kughou panongu no khagho kikhala alou iloghini keno phepheike phi pepu nani. Panongu no khagho alou achine kümla shikelo amhi phi pepumo nani.

¹⁸ Panongu ye phepheike phi no akütsü küküzüphi shinani, eno phepheike phi no alou phimini shi achita lono küzüpu nani. Panongu ye kiu kiumu atsünhizü ipeghi kepu phi pepumo nani.

¹⁹ Kughou panongu no timiqo lau akikhala khalau lo ipeni keno achine kümla phimini ye xape akimthe cheboqo lo qhive nani. Panongu ye aphimini kütau xapuveni, tikumo aye panoqo phimini vecheo kütami lau akimthepu ikuve nosae.

²⁰ Panongu ye akütsüsa miye moni momu asa kushuo thuwupe moni; mtsüqheino panongu ye pano kütsü lo asa ikhonhei tsaveni.

²¹ Achinemi khumu akikhala alou iloghi kelo aji shomoni.

²² Panongu ye chimemi momu ixave kemi sasü külakupu shimoni, ikemu Israel kibo lo kughukomi athathelimi momu achinemi kütami nipu shiche no chimemi shive kemi sasü külakupu shini.

²³ Panongu no Iw timiqo lau akimthe ngo balha dolo kiyeqü keu shika nani, eno kishino akimthe ngo mithekumo dolo kishe kütüta shilu nani keno piyetsü nani.

²⁴ Aküküpna lo panongu no xaküthami shini, eno Iw küghakütha kiqi lono küghathabeni. Panongu no Iw tiqhetini kümtsü lo I yezah eno akhuayeqo papeni, eno akimthe shi Iw Sabbath papeni.

²⁵ Panongu ye akithi kumo phivilo wuno pano ampi shikitiqe moni. Tishimu, apu-aza, apu-anga, momu athiküzüu-achepu külamo no akeu ghenguno panongu ye pano ampi shikitiqe luvi.

²⁶ Pa no mithe move kethiu, panongu no pa ghenguno atsala tsüni kihini.

²⁷ Pa no akikhala alou lo Akimthe-a lo huthuni ye iloke tsalani, pa ye axine kümllagho mllani ipi Ampeu Alhou no asheshu.

²⁸ “Hi no panoqo mheghi shini: pano mheghi ye Ni ke: nongu ye Israel lo kiu mheghimu panoqo tsümoni.

²⁹ Panongu no athi kümllagho, axine kümllagho, akipimi kümllagho, eno Israel lo ikhiphe tsükeu thime kümtsü pano salashi chuni.

³⁰ Axathi amsüu jeli kümtsü eno akümllagho jeli kümtsü achinemi sala shini. Nongu no asho kunu keu atüghüu pesü achinemi tsülo, tishianguno nongu kibo lo kükümgha apenie.

³¹ Achinemi ye aghau momu tüghashi pakutoshi no thive keu momu tüghashi no tsüqhive keu kiumu chumoni.