EZEKEL 42 - Sumi Naga CL (Re-edited) Bible (BSI)

Achineki lo Acheboqo

¹ Tithiu pa no akikhala nguno khalau, ahuu küdau I saipe, eno akikhala ghüngüu, aki ahuu akeu ghüngüu achebo akeu lo I saighi.

² Aki khikhi ahuu küdau akeno tipau hukikha ye akushulau auxakuchho lhopungu eno akijelau auxakuchho muku pungu ae.

³ Akikhala alou akeu küdau auxakuchho chighi aghi, eno alaghi khikhi akikhala ashou akeno ti ye akujukhache ke, aki jolha küthü akeu lo akujukhache ghüngü lo ake.

⁴ Acheboqo zülo alou ilokepu alaghi ae, akijelau auxakuchho pungu eno akushulau auxakuchho lhopungu ae, tipaqo hukikha ye ahuu ae.

⁵ Ahuu achebo akeqo ye kibikhoi, kughengu akujukhacheqo no ajolha aqhou ngo amta lo achebo akeqo nguno a-a alau vekhave ke.

⁶ Kughengu tipaqo ye aki jolha küthü ake, eno tipaqo ye akikhala lo atsükucho aketoi keu kühae. Ikehu ahuu acheboqo ye aqhou ngo amta jolhaqo nguno athiu ake.

⁷ Tile akuptu lakhi khalau acheboqo ghüngüu ae, ti ye khalau akikhala, acheboqo ghüngüu, akushulau auxakuchho muku pungu ae.

⁸ Kughengu akikhala nguno khalau acheboqo akushulau auxakuchho muku pungu ake, eno tipaqo ghüngüu aküpüla la ye akushulau auxakuchho lhopungu ae.

⁹ Achebo hipaqo qhou timi no ashou akikhala lo iloghi kelo kipelau ipeve kepu laghi ae.

¹⁰ Akikhala kuptu shishoi keu lono apeu akikhala ghüngüu eno aki akeu ghüngüu acheboqo ae

¹¹ tileno tipaqo zülo püla kepu laghi ae. Tipaqo ye ahuu achebo akeqo kimihi ke, akije-akushulau aqhemi eno ikipe-ikulo laghi, akikithi eno ahukikhaqo ye aphiphi ke,

¹² ti ye apeu acheboqo akeu lo ikipe-ikulo laghi toi shike. Tipau ipeilo keu hukuthu lono alaghi lakhi ae, alaghi ye kipelau timi no iloghi chekeu lo akuptu akeu kimihi ke.

¹³ Tithiu pa no I vilo pi, “Ahuu eno apeu acheboqo akikhala ghüngüu akeqo ye akimthe cheboqo ke, tilehi achinemi no Ampeu zülo ighi no shishe akimthe kümllagho chucheni. Panongu no shishe akimthe kümllagho—athi kümllagho, axine kümllagho, eno akipimi kümllagho tile süpe qhicheni—kughengu ti ye akimthe-a ke.

¹⁴ Kughou achinemi no Akimthe-a lo iloghini keno, panongu ye aphimini khikhi panongu no pepu ani keno tipaqo tile xaqhimo kelo khalau kikhala vechesü ipemo nani, kughengu hipaqo ye akimthe ke. Panongu ye timiqo gholo ipekumo züuno aphimini kütau pepu luveni.”

¹⁵ Kughou pa no achineki alou mighiju akeu kishekhave keno, pa no khagho kipelau akeu lono I saipeve, eno achineki kupuju vehomxa mighijue.

¹⁶ Pa no akimghipu süta pesü kipelau mighiju, ti akupuju lo auxakuchho 250.

¹⁷ Pa no ahuu mighiju, ti akupuju lo auxakuchho 250.

¹⁸ Pa no apeu mighiju, ti akupuju lo auxakuchho 250.

¹⁹ Tishino pa no kulolau küdau tsüghüwo mighiju, ti akupuju lo auxakuchho 250.

²⁰ Pa no ako bidi mighiju. Tipau lo akuptu homxape ae, akushulau auxakuchho 250, eno akijelau auxakuchho 250 ae, tipau no akimthe ngo balha dolo kothape ae.