EZEKEL 40 - Sumi Naga CL (Re-edited) Bible (BSI)

Achineki Kithe Kungunhetsü

¹ Ningu haphe sawuve keu mpe muku apunguu ampe hukuthu lo, atsala achighiu, mishighüna hexave keu mpe chighiabidiu lo, tipa tsalani Ampeu u I shou ikughive, eno Pa no mishighüna lo I sailoghi.

² Kungunhetsü lono Alhou no Israel yeghi lo I saighi, eno shishe qhemghai keu naghuto lo apeu küdau mishighüna shiqhe aketoi keu-a lo I küghüqa.

³ Kughou Pa no I saighi keno, julo, timi lakhi aju ye alazayi toi eno phepheike phi kipili ngo akimghipu süta pesü ipeghi. Pa ye khagho kulaghi lo puthugho ae.

⁴ Pa no I vilo pi, “Timi nu, o nhethi tsükhope julo, o kini kughope inilo, eno I no o piyeni ye akeu kümtsü lo o mlo tsüqhiyi shilo, kughengu ni ye o piyeni ye hile o saighi ani. Nono ithulu keu kümtsü Israel kibolomi lau asheshu lo.”

Kipela Khagho

⁵ Julo, achineki khala hokümxa kümtsü atu no putu püa, timi tipau u lo akimghipu süta akushulau auxakuchho küthü pesü pa no atupikiye akishilau mighiju kelo akimghipu süta akupuju lakhi eno akiqhelau ghi akupuju lakhi aghi.

⁶ Tishino pa no khagho kulaghi kipela küdau ilo no tipau nepa lo ikuve eno khagho lo alashe mighiju, ikelo akutholau akimghipu süta kupuju lakhi aghi.

⁷ Aphe lo achebo akeqo no akushulau eno akijelau akimghipu süta kupuju lakhikhi aghi; acheboqo dolo auxakuchho kini tüxa ae; eno abo alou lo khagho lashe no akimghipu süta kupuju lakhi aghie.

⁸ Tithiu pa no khagho kulaghi lo achebo alou lo ilo no mighiju kelo akimghipu süta kupuju lakhi aghi.

⁹ Tishino pa no khagho kulaghi lo achebo mighiju kelo auxakuchho bidi tüxa aghi, alashe nhakeu no auxakuchho lakhi aghi; eno khagho kulaghi lo achebo ye abo alou ashekha küdau ae.

¹⁰ Kipela khagho lo hula-hila achebo küthüthü ae. Achebo küthü ye akimghi aqhemi eno tipaqo nhakeu ye ako hula-hila akimghi aqhemi.

¹¹ Tithiu pa no khagho laghi akijelau mighiju, auxakuchho pungu tüxa aghi eno khagho ikulo no akushulau auxakuchho tsügho tüxa shou aghi.

¹² Apheu cheboqo zülo putukha keu ae, ti ye hula-hila ghi auxakuchho tüxa qhemi. Eno apheu cheboqo ye hula-hila auxakuchho küthüthü.

¹³ Pa no achebo lo amqha lakhi lono achebo lakhi kutolo khagho mighiju, ti ye akijelau auxakuchho chighiküthü; ahukikhaqo ye lakhino lakhi küdau küghüngü kilepe ae.

¹⁴ Pa no achebo alou akeu ghi mighiju kelo auxakuchho chighi ae. Khagho ikulo lo achebo lo akikhala ae.

¹⁵ Azüu khagho ikulo lono khagho ikulo alou chebo kutolo auxakuchho muku tsüni ae.

¹⁶ Acheboqo jibo khala küdau eno acheboqo dolo ajibo alou küdau no akighipe kititi ae. Alaghi sholu keu küdau akuptu lo amsabo toikeu shisü püae.

Akikhala Khalau

¹⁷ Tishino pa no akikhala lo I sailo. Julo, tile acheboqo ngo alaghi no akikhala homxape ae. Achebo shighi alaghi jolo shisüpe ae.

¹⁸ Eno alaghi ye khaghoqo phelo ae, ti ye akushulau khaghoqo qhemi kiqi lono ae. Hi ye alaghi aqhou ke.

¹⁹ Pa no khagho aqhou abocho alou akeu lono khagho ashou abocho alou kutolo mighiju, ti ye kipelau no ahuu kutolo auxakuchho lhopungu küthü ae.

Ahuu Khagho

²⁰ Khagho ahuu küdau akeu, akijelau eno akushulau pa no mighiju.

²¹ Tipau lo apheu hula-hila chebo küthüthü akeu nhasü keu eno tipau lo achebo ye khagho atüghüu lo akeqo toi aqhemi. Ti ye akushulau auxakuchho muku pungu eno akijelau auxakuchho chighikini no tüxa.

²² Tipau lashe, achebo eno amsaboqo ye kipela khagho küdau akeqo toi akije akushulau aqhemi. Anepa tsüni iku kelo timiqo ye tipau tove no achebo panoqo zülo ithulue.

²³ Ahuu khagho akeu ghüngü lo, kipelau akeu toi, abocho alou ilo akeu khagho lo ighive. Pa no khagho lono khagho kutolo auxakuchho lhopungu mighilu.

Apeu Khagho

²⁴ Pa no apeu küdau I sasü wu, eno julo, tile khagho lakhi apeu ae. Pa no tipau lo nhasükeu ngo achebo mighiju; tipaqo ye kütauqo toi akije-akushulau aqhemi shiae.

²⁵ Kütauqo lo alasheqo toi tiküma lo alasheqo homxa ghi shisü püae. Ti ye akushulau auxakuchho muku pungu eno akijelau auxakuchho chighikini no tüxa.

²⁶ Anepa tsüni iku kelo tipau ikutove, eno achebo ye tipaqo zülo ae, tile amsaboqo ye nhasü püakeu ako hula-hila shisü püae.

²⁷ Tilehi abocho alou apeu khagho lakhi ae. Pa no khagho lono apeu khagho akeu kutolo mighiju, ti ye auxakuchho lhopungu aghie.

Abocho Alou Kikhala

²⁸ Tithiu pa no khagho apeu akeu kathasü abocho alou kikhala lo I saighi, eno pa no apeu khagho mighiju. Ti ye kütauqo toi akije-akushulau aqhemi shi aghi.

²⁹ Aphe lo achebo akeqo, eno tipau nhasü keqo ye kütauqo toi akije-akushulau aqhemi, tipaqo lo alasheqo homxa ghi ae. Akushulau auxakuchho muku pungu eno akijelau auxakuchho chighikini no tüxa.

³⁰ Acheboqo no homxape ae, akushulau auxakuchho chighikini tüxa eno akijelau auxakuchho kini tüxa.

³¹ Tipau chebo ye akikhala khalacheu shisüpe ae eno amsaboqo no tipau nhasü keu lo shisü püa eno tipau laghi ye anepa tache ae.

³² Tithiu pa no kipelau abocho alou kikhala lo I saighi, pa no khagho mighiju. Ti ye kütauqo toi akije-akushulau aqhemi shi aghie.

³³ Apheu cheboqo, tipau nhasü keqo, eno tipau chebo ye kütauqo toi akijelau akushulau aqhemi, tipau ngo achebo ye alashe homxape ae. Ti ye akushulau auxakuchho lhopungu eno akije lau auxakuchho chighikini tüxa.

³⁴ Tipau chebo ye ashou kikhala küdau ae, tipau nhasü keu lo hula-hila amsaboqo ae eno alaghi lo anepa tache ae.

³⁵ Tithiu pa no ahuu khagho lo I saighi eno tipau mighiju. Ti ye kütauqo toi akije-akushulau aqhemi.

³⁶ Apheu cheboqo, nhasü keu eno tipau ikulo lo achebo akeqo ye akijelau akushulau kütauqo toi aqhemi, eno tipau lo alasheqo no homxape ae. Ti ye akushulau auxakuchho lhopungu eno akijelau auxakuchho chighikini tüxa.

³⁷ Tipau chebo ye akikhala khalau küdau ae, tipau nhasü keu lo amsaboqo hula-hila ae, eno ikipe-ikulo laghi lo anepa tache ae.

³⁸ Tile achebo lakhi ahukikha shisüpe khagho lo abo ae, tileno akipti kümllagho qhuche.

³⁹ Khagho chebo lo aghulhu lüpa kinini no hula-hila ae, tipaqo shouno akipti kümllagho eno akipimi kümllagho ghiqhiche.

⁴⁰ Khalacheu ahuu khagho ikuqho laghi lo aghulhu lüpa kini ae; khagho chebo khalacheu aghulhu lüpa kini ae.

⁴¹ Aghulhu lüpa bididi no hula-hila ae, aghulhu lüpa tache shouno mllani ke ghiqhi ae.

⁴² Tilehi akipti kümllagho ghenguno aghulhu lüpa bidi atu yethape shikeu ae, akushulau aunhekipshe kini eno akijelau aunhekipshe kini, eno akiqhe lau aunhekipshe lakhi tüxa ae, tipa shou akipti kümllagho eno aghakishiqo ghiqhini keu tinhemghaqo qhipüae.

⁴³ Ayikuho akushulau aulotikipshe küthü qhemi no achebo homxa ghi pufu püa. Eno aghulhu lüpa shou akümllagho shileqhi qhipüae.

Achinemi sala Achebo

⁴⁴ Alou khagho khalacheu achebo kini akikhala alou ae, lakhino ahuu khagho apheu apeu jupiqi ae eno lakhiu no apeu khagho apheu ahuu jupuqho ae.

⁴⁵ Pa no I vilo pi, “Achebo hipau apeu küghüngüpe akeu ye achinemi achineki lo mlaitha akeqo ghenguno ke,

⁴⁶ eno achebo ahuu küdau küghüngüpe akeu ye achinemi akiptia lo mla akeqo ghenguno ke. Hipaqo ye Zadok nuliqo, Levimi kughuko dolo panoqo likhi no Ampeu kupunu ighi no Pa qelu nani.”

⁴⁷ Pa no akikhala mighiju, ti ye akushulau auxakuchho lhopungu eno akijelau auxakuchho lhopungu, kobidi shi aghi. Eno akiptia no achineki zülo aghie.

Achineki Chebo

⁴⁸ Tithiu pa no achineki chebo lo I sailoghi eno achebo lo akulaghi mighiju, ako hula-hila auxakuchho kini tüxaxa aghi. Khagho no akijelau auxakuchho tsüni eno khagho apheu akuptu no auxakuchho lakhi tüxaxa hula-hila aghi.

⁴⁹ Achebo ye akushulau auxakuchho chighighi ako hula-hila aghi, akijelau auxakuchho tsügho, eno timiqo no tipau lono anepa chighi chesü ikue. Ahukikha phivilo atsükuchoqo ako hula-hila lakhikhi ae.