EZEKEL 4 - Sumi Naga CL (Re-edited) Bible (BSI)

Jerusalem Leluveni keu Michipu

¹ “No timi nu no pititu lakhi ikhipe o zülo qhilo, eno tipau lo Jerusalem mishighüna je kixi puku lo.

² Tipau leluveni keu kümla shilo, atupi yepuku lo, eno ayeghi pekumqope qhilo. Tipau bothape aphiki shilo, ti shopho ilo kepu sübolu pesü vehomxa qhilo.

³ Ayipa lakhi ikhipe no eno Jerusalem dolo ayi liwo shipe qhilo; o gi pesü ti küdau jupuwo no khasüpe aketoi pelo, eno khasüpe leluve lo. Hi ye Israel laghami ghenguno amchipu lakhi ke.

⁴ “Tithiu o u piyiu küdau ihozü lo, eno Israel laghami ghime o shou belo. Atsala khije nono tile ihozüni keno tijehi no ye panoqo ghime xapu nani.

⁵ Kughengu I no atsala 390 kihithape o tsü ani, ti ye panoqo ghime kikihi mpe qhemike. Titohi no ye Israel laghami ghime xapu nani.

⁶ Eno kughou nono tipaqo shitaveni keno, no ye akiniu ihozü nani, ikemu tithiu ye o u ajeu küdau, eno Judah laghami ghime xapu lo. I no atsala lhobidi kihithape o tsü ani, ampe lakhikhi ghenguno atsala lakhikhi.

⁷ No ye Jerusalem leluve ke küdau o gi jupuwo lo, o u kümsa sükhope mishighüna lachile keu shi tungkuptsa pilo.

⁸ Julo, I no akighikipili o shou be nani, tishikeu lono no ye aphi tüxau no tüxau idewo lumo nani, khasüpe leluve keu tsala kupu moke kutolo tishi nani.

⁹ “Nono ashothi-barleythi, khetsüthi-khuyithi, aghina-asüna ishi ikhipe ali lakhi lo kümtsa süvelo, eno tipaqo pesü o chuqupu mlalo. Ti ye nono atsala khijehi ihozüni keno tijehi ghenguno ke, atsala 390 no ye tipau chu nani.

¹⁰ No ye achuqupu ahu shino chuni, atsala lakhi lo gram 210; tsalakipetsü no ye tipau chuni.

¹¹ Azü ghi no ye akimghi lono yelo, ti ye ajukhu kini yeni; tsalakipetsü no ye ti yeni.

¹² Ashothi anau sho toi no ye tipau chuni, timi tübatüzü zülono asho mlalo.”

¹³ Ampeu no pi, “Israelmi ye shiye khunoqo lau I no panoqo hapuwuveni keno tilau no hitoi panow mithekumo chuqupu chunani.”

¹⁴ Tileno I no pi, “Aha Ampeu Alhou! Julo, ni ye khilemu ni ampi shikitiqe mphie. I lhothe lono itehi kutolo ni ye khilemu pakutoshi no thive keu momu tüghashi no tsüve keu chuju mphi momu shikitiqe keu shi I kichi lo sümphie.”

¹⁵ Pa no I vilo pi, “Julo, timi tübatüzü züqhulo I no amishiba o tsü ani, tipau shouno no ye o chuqupu kutolo.”

¹⁶ Tinguno alau Pa no I vilo pi, “Timi nu, julo, Jerusalem lo asho xapu ighi chekeu I no lakhave tsüni. Panongu ye ahu eno kütakihi keu lono achuqupu chu nani akimghipu eno aghüthiküsü lono azü yenani.

¹⁷ I no hipau shi nani eno tishikeu lono panongu ye chusho kepu püqüve nani, eno aghüthisüpe lakhino lakhi jukile no aghime lono hailove penani.