EZEKEL 38 - Sumi Naga CL (Re-edited) Bible (BSI)

Gog shou Tungkuptsa

¹ Ampeu tsa I lau ighi:

² “Timi nu, Magog yeghi lo Meshech ngo Tubal lo kükapuu atou Gog küdau o gi kughopuwo no pa lachile tungkuptsa pilo,

³ Ampeu Alhou no ishi piani: Julo, O Gog, Meshech ngo Tubal kükapuu atou, Ni ye o lachile ani.

⁴ I no o tutsüghüve nani eno o mükhü lo ayikuho süvetsü nani, no eno ow ghüshimi, khurshi ngo khurshimi, aqokitikhi kije, aghünanu qhoi xapusü azüto kije-kitila eno azütakikihi xapu akemi kümtsü I no sünhe saipeghi nani.

⁵ Persia, Cush, eno Put noqo ye panoqo gholo ani, panongu kümtsü azüto ngo akütsükuqho xapu ani;

⁶ Gomer ngo paw aqokitikhi; ighono ahuu Beth-togarmah lono paw aqokitikhi, ashiaye kutomo pa gholo ani.

⁷ “Kutolo eno kutope ngolo, no eno ow aqokitikhi o hokümxa lo akeqo kümtsü, panoqo jukuto alo.

⁸ Atsala kutomo thiuno no hekütsü nani. Ampe kutomo thiu aghüshi lono athoputho luve keu yeghi nongu no lewu nani, tipa yeghi lo timiqo ye ashiaye kutomo xuküqhape alhokuthu kütsape achekeu Israel naghutoqo lo acheni. Pano timiqo ye ashiaye kutomo gholono saighi no itehi ye kümtsü sükusho qholono küghüna ani.

⁹ Pasapagha cheke toi nongu no azüu wunani. No eno ow aqokitikhi eno ashiaye kutomo o gholo akeqo no khüngküsü toi ayeghiqha küzüluve nani.

¹⁰ “Ampeu Alhou no ishi piani: Tipa tsalani, o lolo akükümsü iloghi no nono küsakügha kuchughu nani

¹¹ eno ishi pi nani, ‘I no aliwo kühakeu yeghi lo wuno aphuqo lewuni. Timi khunoqo aliwo kühakeu lo küghüna cheni, eno akhadu momu khagho kiumu kühakeu lo iqüghai sükusho qholo acheni keno, tipaqo leni,’

¹² I no azüu ixapinyi achekeu lo timi küghünauve keqo haleve no pano nhemghaqo hakhope wuveni, tile ashiaye kutomo xuküqhape akeqo, eno panow pichepighi ngo tinhemgha pighi akeqo hakho luveni, panongu ye ayeghi pola lo achenie.

¹³ Sheba ngo Dedan eno Tarshish lo kilhikishimi ngo panow sakiphemi no o vilo pi nani, ‘No ye aghüshi lono hakholu keu luniye ighi ani keshea? No ye xulelu keu thime, ghükayi ngo ameshoyi, atsüaqu, eno tinhemgha jeli xapu wuveni ye ow aqokitikhi hekütsüpe ani keshea?’

¹⁴ “Tighenguno, timi nu, tungkuptsa Gog vilo pilo, Ampeu Alhou no ishi piani: Tipa tsalani Iw timi Israelmi no sükusho qholono küghüna akelo, no ye ti ithimo nani keshea?

¹⁵ No ye iqho ahuu yeghi, o kungo-a lono ashiaye kutomo, akumto ghüshimi kümtsü sasü khurshi lono ighi nani.

¹⁶ Khüngküsü kije no ayeghi küzüpe aketoi nono Iw timi Israelmi leighi nani. O Gog, hithiu tsala lo I no o sawo I yeghi lepe nani, tishikeu lono shiyeqo nhethe lo o vecheo I no I kimthe chipiu phuphe kelono panongu no Ni ithi nani.

¹⁷ “Ampeu Alhou no ishi piani: No ye khuu I no khaghi I qemi Israel lo tungkupmi vecheo pipüa keno tihuke kumo? Tipa ghuloki lo panongu no I no o sawo Israel lepe nani kepi ampe kutomo tungkuptsa piche.

¹⁸ Ikemu tipa tsalani Gog no Israel yeghi leighi kelo, Ampeu Alhou no asheshu, I no mqhumza I loghu pephe nani.

¹⁹ Kughengu I nhekushu lono eno I loghu miküqü lono I no asheshu, Tipa tsalani ayeghi küghütha kije Israel yeghi lo ighi nani.

²⁰ Azüghi lo akha, atsütsü lo aghau, aluza lo tüghashi, ayeghi lo itikiche, eno ayeghi lo timi kümtsü I zülo khokhoshi nani. Naghutoqo no ikiqive nani, anhepho no ipaiqive nani, eno aliwo tupi kümtsü ilaqive nani.

²¹ I no Iw naghutoqo lono Gog shou azütakikihi süghipe nani ipi Ampeu Alhou no asheshu. Timi kümtsü no pa thiküzüu mjochile azütakikihi penani.

²² I no püsa ngo ajikuqo pesü pa shou küghatha nani, I no pa ngo paw aqokitikhi eno timi kutomo khunoqo pa gholo ani keno panoqo shou pasapagha tsütsüghu, mürasü, ami eno amichu ghuqhitsü nani.

²³ Ikehu I no I kughushu eno I kimthe piye nani eno shiye kutomo pelo Ni ithipe nani. Tileno panongu no Ni ye Ampeu kepi ithi nani.