EZEKEL 36 - Sumi Naga CL (Re-edited) Bible (BSI)

Israel Naghutoqo lau Tungkuptsa

¹ “Timi nu, no ye Israel lo naghutoqo lau tungkuptsa pilo, O Israel lo naghutoqo, Ampeu tsa inilo.

² Ampeu no ishi piani: Kughengu aghümi no nongu vilo, ‘Aha!’ eno ‘Khaghilo toghiqo ye niw shivae,’ ipi kehu,

³ tighenguno tungkuptsa pilo, Ampeu Alhou no ishi piani: Kughengu mtsüqheino panongu no nongu pesü kütsaleve eno ako kümtsü lono nongu chisheqhi kehu nongu ye shiye kütami no lepuwuve, timi tsa kipipu eno kixikila shi xishi-jeku keu shive kehu,

⁴ tighenguno, O Israel lo naghutoqo, Ampeu Alhou tsa inilo: Ampeu no naghutoqo ngo atoghiqo, aghokitiqo ngo akhilaqo, küghüküghalei akeqo ngo pighive keu mishighünaqo, khikhi shiye hokümxa lo akeqo no küthakügha shi ani keno tipaqo vilo ishi piani,

⁵ tighenguno Ampeu Alhou no ishi piani: Mtsüqheino shiye kütami eno Edommi kümtsü, khunono alokivishi eno shishe küthaküghapu shi I yeghi pesü pano ampi tsüve, tishikeu lono ayeghi tipau pesü atsüni kümtsha-a shiniye shikeno, panoqo lau I no I loghu külü lono pivae.

⁶ Tighenguno Israel yeghi ghenguno tungkuptsa pilo, eno naghutoqo ngo atoghiqo, aghokiti ngo akhilaqo vilo pilo, Ampeu Alhou no ishi piani: Julo, I no I loghu nhekushu lono pivae, kughengu nongu no shiyeqow küthakügha xapuke.

⁷ Tighenguno Ampeu Alhou no ishi piani: I no tushoqhive ake nongu hokümxa lo akeu shiye kümtsü küthaküghapu sholu nani.

⁸ “Ikemu, O Israel lo naghutoqo, nongu no nongu loka lono mini ipeghi nani eno Iw timi Israelmi ghenguno nongu xathi pithi nani, kughengu panongu ye kighithe aki lo ighive nani.

⁹ Kughengu julo, Ni ye nongu ghenguno ani, I no nongu lau tsüghü ighi nani, eno nongu pesü hokide no athi xusü nani.

¹⁰ I no Israel kibolomi kümtsü kughuko tsü nani. Mishighünaqo ye küghünauve nani eno kütsape akeqo-a ye shiqhe puku nani.

¹¹ I no timi ngo tüghashiqo o lau kughuko tsü nani, eno panongu no kughuko no athi pithi nani. I no nongu pelo khaghi lo toi küghüna lupe nani, eno püzüu nguno alau nongu lau akivi alau shinani. Tileno nongu no Ni ye Ampeu kepi ithi nani.

¹² I no timiqo, eno Iw timi Israelmi pelo nongu shouno chewupe nani, nongu ye pano mheghi shive nani, eno nongu tianuli ye khilemu akhüava shipemo nani.

¹³ Ampeu Alhou no ishi piani: Kughengu panongu no nongu vilo, ‘Nongu no timi tsüchuke, eno no shiye nuliqo mloghujue,’ ipi kehu

¹⁴ tighenguno nongu ye khilemu timiqo tsüchu monani eno no shiye nuliqo mloghuju kithemo nani, ipi Ampeu Alhou no asheshu.

¹⁵ I no nongu pelo shiyeqow küthakügha chilu pemove nani, nongu ye ashiayeqow küthakügha xapu move nani eno no shiye pelo küpxalu pemo nani, Ampeu Alhou no asheshu.”

Ampeu Kimthe Je

¹⁶ Ampeu tsa I lau ighi:

¹⁷ “Timi nu, kughou Israel kibolomi no pano yeghi lo xüache keno, panongu no pano laghi eno pano kümla vecheo ayeghi shipixive ke. Pano laghi ye totimi lakhi no aqhilo mithekumo lo aketoi I zülo mithe move.

¹⁸ Ikehu panongu no ayeghi lo aji pelekeu ghenguno, asüatu julho vecheo panongu no tipau shipixive ke ghenguno I no I loghu panoqo shou lepukue.

¹⁹ I no shiye gholo panoqo kutholeve, eno panongu ye aghakhuqo lo apanagha wuve. Pano laghi eno pano kümla kiqi lono I no panoqo shou küghatha ke.

²⁰ Ikemu kughou panongu no shiyeqo lau ighi keno, khile khilemu panongu no ighi aye I je kimthe shikitiqe, tipau vecheo timiqo no panoqo vilo pi, ‘Hipaqo ye AMPEUw timi, ikeghi panongu ye Pa yeghi lono ipeve masave ke.’

²¹ Ikemu Ni ye I je kimthe, khikhi Israel kibolomi no khile khile ighimu shikitiqe acheni keno, tipau ghenguno alomsü anie.

I Ghungu Nongu lolo Sütsü Nani

²² “Tighenguno Israel kibolomi vilo pilo, Ampeu Alhou no ishi piani: O Israel kibolomi, I no mla niye akeu ye nongu ghenguno kumono nongu no shiye khunoqo gholo ighi keno panoqo zülo shipixive keu I je kimthe ghenguno ke.

²³ I no I je kimthe khikhi shiyeqo gholo shipixive keno, eno khikhi nongu no panoqo zülono shipixive keno, tipau chipi phuphe nani. Kughou I no nongu vecheo panoqo nhethe lono I kimthe phupheni keno shiyeqo no Ni ye Ampeu kepi ithi nani, ipi Ampeu Alhou no asheshu.

²⁴ I no shiyeqo launo nongu salu nani eno aghakhu kümtsü lono nongu hekütsü no nongu yeghi lo saighi nani.

²⁵ I no nongu shou azü kimthe küzüte puku nani eno nongu ye now mithekumo kümtsü lono mqhamqhive nani, eno nongu julho kümtsü lono I no nongu shikimtheve nani.

²⁶ I no amlo kithe nongu tsü nani, eno aghungu kithe nongu lolo sütsü nani. I no nongu lolo atu mlo ikhive tsüno ashi mlo pesü tsü nani.

²⁷ Eno I no I Ghungu nongu lolo sütsü no nongu pelo I yezah pape eno Iw pimheye gholuni ke kutokupui penani.

²⁸ Nongu ye I no nongu puasüqo tsükeu yeghi lo küghünalu nani, eno nongu no Iw timi shi, eno I no nongu Lhou shinani.

²⁹ I no now mithekumo lono nongu xalu nani. I no ashothi kupukuno shi nongu tsü nani eno püqümiye kiumu nongu shou bemo nani.

³⁰ I no asübo lo axathi eno aluza lo tüxatini kupukuno shi ikoishe lupe nani, tishikeu lono nongu ye khilemu shiyeqo gholo püqümiye kukujopu shimo nani.

³¹ Tileno nongu no now kixikila laghi, eno akümla lhoksaqo kümsülu nani, no kipimi eno aphikümqhüpu ghenguno nongu no nongu ampi ju aphimqhü nani.

³² I no mla niye akeu ye nongu ghenguno ke kumoe pi ithilo, Ampeu Alhou no asheshu. O Israel kibolomi, nongu laghi ghenguno kujo eno ighü alo.

³³ “Ampeu Alhou no ishi piani: Nongu kipimi kümtsü I no shikimthe tsüke tsalani, I no mishighünaqo lo küghüna lupe nani, eno kütsave keu shiqhekithe lupe nani.

³⁴ Pighive keu yeghi ye, kathawu chekemi kümtsü nhethe lo küghüküghalei apenike züqhulo mlaphelu keu yeghi shivepe nani.

³⁵ Eno panongu no pi nani, ‘Ayeghi hipau küghüküghalei achekeu ye Eden ghutu toivae, eno kütsave keu, ixapinyi shipüsape akeu mishighünaqo ye itehi ye kümtsü shiqhevae eno küghüna luvae.’

³⁶ Tileno shiye nongu hokümxa lo akeqo no Ni ye Ampeu kepi ithi nani; kütsave keu-aqo ye I no shiqhevae eno khikhi pighive keno tipau lo sübo tsüni shosü kithevae. Ni ye Ampeu ke; I no piqhivae, eno I no tipau shinani.

³⁷ “Ampeu Alhou no ishi piani: I no Israel kibolomi ghenguno shitsüni ke pano pelo ambeloji toi panow timiqo kughukotsü penike hi ghi I vilo khupe nani.

³⁸ Aghakishi mbe, Jerusalem lo tiqhetini ghulhu lo ambeloji toi, ixapinyi akeu mishighünaqo ye timi loji no chhive nani. Tileno panongu no Ni ye Ampeu kepi ithi nani.”