EZEKEL 35 - Sumi Naga CL (Re-edited) Bible (BSI)

Seir Toghi shou Tungkuptsa

¹ Ampeu tsa I lau ighi:

² “Timi nu, Seir Toghi küdau o gi kugho puwolo, eno tipau lau tungkuptsa pilo,

³ eno tipau vilo pilo, Ampeu Alhou no ishi piani: Julo, Seir Toghi, Ni ye o lachile ani, eno o shou I u chho ani, I no o pesü küghüküghalei pighive tsü nani.

⁴ I no ow mishighünaqo kütsave tsü nani, no ye pighive nani, eno Ni ye Ampeu kepi nono ithi nani.

⁵ Kughengu nono pülhapuju aghümi shi acheni eno Israelmi mhekiqi tsalani eno panow ashekhau ghime sholuke tsalani nono Israelmi pesü azütakikihi küka lau pephe tsüve kehu,

⁶ tighenguno I no xüake toi, Ampeu Alhou no asheshu, aji peleni ke I no o kutope qhini, eno ajikuqo no o haighi nani; kughengu nono ajikuqo mithimo ke, tighenguno ajikuqo no o haighi nani.

⁷ I no Seir Toghi pesü kütsa keu eno küghüküghalei keu shivetsü nani, eno hu-wo chekemi kümtsü I no ghiqhive nani.

⁸ Ghiqhive kemi pesü I no naghutoqo shepichhi nani. O toghi, akhila, eno aghokiti kümtsü lo ghüyi lono wove kemi no chhitoi nani.

⁹ I no o pesü alhokupuju küghüve tsü nani, eno ow mishighünaqo lo küghüna move nani. Tileno nongu no Ni ye Ampeu kepi ithi nani.

¹⁰ “Kughengu Ampeu no tile akeghi nono pike, ‘Shiye hiküma eno aghakhu hiküma ye Iw shive nani, eno ningu no hipaqo leluve nani’

¹¹ tigheno, I no xüake toi, Ampeu Alhou no sheshu, nongu kimthi panoqo shou akeu eno amlokighide ngo anhekushu piye keu kiqi lono I no nongu peitha nani. Kughou I no nongu shou küghathani keno, I no panoqo pelo Ni ithipe nani.

¹² Eno nongu no Ni ye Ampeu kepi ithi nani. “Israel lo naghutoqo lachile nongu no küthakügha pikeu tsa kümtsü I no chiluvae, nongu no pi, ‘Panongu ye küghüküghaleivae; panongu ye kütsaleve penike tsüvae.’

¹³ Nongu kichi pesü nongu no I lachile ghi nongu sheqhe, eno I lachile ghi nongu tsa küghüsü ke; I no chiluvae.

¹⁴ Ikehu Ampeu Alhou no ishi piani: Ayeghiqha kümtsü no alovi akelo I no o pesü küghüküghaleive tsü nani.

¹⁵ Nono Israel kibolomi mheghi shou alovi ke, kughengu ti ye küghüküghaleive ke, ikehu I no o peitha nani; Seir Toghi eno Edom kümtsü küghüküghaleive nani. Tileno panongu no Ni ye Ampeu kepi ithi nani.