EZEKEL 34 - Sumi Naga CL (Re-edited) Bible (BSI)

Israel Mbekhemi lau Tungkuptsa

¹ Ampeu tsa I lau ighi:

² “Timi nu, Israel lo ambekhemi shou tungkuptsa pilo: panoqo vilo tungkuptsa pilo, ambekhemi vilo pilo, Ampeu Alhou no ishi piani: Ya, Israel lo ambekhemi ye nongu ampi loji auvae! Ambekhemi ye ambe loji kepu ke kumo keshea?

³ Nongu no atha chu, amhiphi pepu, atha pubeyi keu ghiqhi ikemu nongu ye ambe lojimoe.

⁴ Nongu no miqemlei kemi shikumto tsümoe, aküsüu shipivi moe, aghüza kupuu khakide küdai tsümoe, itsüsü wuve keqo sachile ighimoe, pühave keqo phuwu moe, eno mkamihi panoqo shou ayepeke.

⁵ Ikehu panongu ye apanagha khavae, kughengu ambekhemi khumu kühave eno panongu ye tüghashiqo chuqupu shiveke.

⁶ I mbeqo ye apanagha khavae; panongu ye naghuto eno atoghi kümtsü lo itsüsü wuvae. I mbeqo ye ayeghi kümtsü lo apanagha khavae, panoqo phuwu momu juwuni kemi khumu kühavae.

⁷ “Tighenguno, nongu ambekhemiqo, Ampeu tsa inilo:

⁸ I no xüake toi, Ampeu Alhou no asheshu, mtsüqheino I mbeqo ye tsüqhi chuniye shivae, I mbeqo ye tüghashiqo chuqupu shivae, kughengu ambekhemi khumu kühavae, eno I mbekhemi no I mbeqo phusaghi movae, ikemu ambekhemi ye pano ampi likhi loji auvae, eno I mbeqo loji movae,

⁹ tighenguno nongu ambekhemiqo, Ampeu tsa inilo:

¹⁰ Ampeu no ishi piani, Julo, Ni ye ambekhemi lachile ani, I no I mbeqo ghenguno panongu launo kihikülai keu khu nani eno panoqo no ambe loji akeu lakhave nani. Ambekhemi ye pano lojilu moae. I no panoqo kichi lono I mbeqo xaphe luve nani, tishino panoqo chuqupu shipe move nani.

Ampeu no Phuwu nani

¹¹ “Kughengu Ampeu Alhou no ishi piani: Julo, I no, Ni ampi no I mbeqo phuwu nani eno panoqo juwu nani.

¹² Ambekheu no ambe hami pa gholo akelono apanaghave keqo phuwu ketoi, I no I mbeqo phuwu nani, eno khüngküsü ngo aküzü kutho tsala lo panongu no khile apanaghave keno tilau no I no panoqo xaphelu nani.

¹³ I no ashiayeqo dolono panongu saipeghi nani, aghakhuqo lono panoqo hekütsü nani, eno pano yeghi lo saighive nani. I no Israel lo naghutoqo, aghokitiqo, eno aghakhu lo küghüna akeu-aqo lono panoqo loji nani.

¹⁴ I no atsüni kümtsha-a kivi lono panoqo loji nani, eno Israel lo naghuto kiqhe-a pesü panoqo sala achu kümza-a shivetsü nani. Panongu no tilau achu kümza yeghi lo ihozü nani, eno atsüni kümtsha-a kivi lono panongu loji nani.

¹⁵ Ni ampi no I mbeqo kheu shinani, I no panoqo pelo ihozüpe nani, ipi Ampeu Alhou no asheshu.

¹⁶ I no pühave keqo phuwu nani, eno I no itsüsü wuve keqo sachile ighi nani, izapusü akeqo khakide küdai tsü nani, miqemlei keqo shikumto tsü nani, eno atha pubeyi akeqo ngo akumto shi akeqo ye I no kütsave nani. Achipiu lono I no panoqo loji nani.

¹⁷ “I mbelojiqo, nongu ghengu ye, Ampeu Alhou no ishi piani: Julo, I no ambe ngo ambe, eno ambetsü ngo anetsü dolo küghatha nani.

¹⁸ Atsüni kümtsha-a kivi lono loji akeu ye nongu ghenguno aghaqi move kesheno apukhu pesü nongu tsüni kümtsha-a qodave; eno azü kütsüghü ye akeu ye aghaqi move kesheno apukhu pesü azü qhoi shipuqo masave keshea?

¹⁹ I mbeqo ye nongu pukhu no qodave keu chumasa eno nongu pukhu no shipuqove keu yemasa keshea?

²⁰ “Tighenguno Ampeu Alhou no ishi piani: Julo, Ni ampi no ambe atha kupuu eno aghi kümsa keu dolo küghatha nani.

²¹ Kughengu panoqo no inaghau apanagha wuve moke kutolo nongu no nongu kibo pesü miqemlei kemi kümtsü shoqhi eno tuha no qodaqhi kehu,

²² I no I mbeloji xaphe luve nani; panongu ye tüghashi chuqupu shi tsüqhi chuve kepu shimove nani. I no ambe ngo ambe dolo xakütha shi nani.

²³ I no panoqo shou ambekheu lakhi, I qeu David, qhinani eno panoqo mbekheu shive nani.

²⁴ Eno Ni, Ampeu no panoqo Lhou shive nani, I qeu David no panoqo gholo kükapuu shive nani. Ni ye Ampeu ke; I no piqhivae.

AMPEUw Külakishi Puloshoqhi

²⁵ “I no panoqo sasü külakishi puloshoqhi shi nani eno pano yeghi lono tüghashi hapupove nani, tishikeu lono panongu ye asayeqha lo sükushopu shi küghünalu eno aghasüqo lo zühulu nani.

²⁶ I no panoqo eno I toghi hokümxa-a kümtsü lo kükümgha shitsü nani, eno I no panoqo tusho lo tsütsüghu ghuqhitsü nani; tile kükümgha tsütsüghu anani.

²⁷ Aluza lo asüboqo no axathi pithi nani, ayeghi no ikoishe athi pithi nani, eno panongu ye pano yeghi lo sükusho lono anani. Kughou I no panow kuokhasü hephove eno panoqo qhasüpe akemi u lono xaphe luni keno panongu no Ni ye Ampeu kepi ithi nani.

²⁸ Panongu ye shiyeqo no ghime keu shimo nani momu tüghashiqo no tsüqhimo nani. Panongu ye sükusho lono küghünalu nani eno khunomu panoqo shikümsa mla nani.

²⁹ I no panoqo ghenguno akighiche ghutu tsü nani tishikeu lono panongu ye pano yeghi lo akhüava shimo, eno shiyeqow küthakügha xapumo nani.

³⁰ Panongu no Ni ye Ampeu panoqo Lhou kepi ithi nani eno Israel kibolomi ye Iw timi kepi ithi nani, Ampeu Alhou no asheshu.

³¹ Nongu ye I mbeqo ke, I tsüni kümtsha-a lo ambe timiqo ke, eno I no nongu Lhoue, ipi Ampeu Alhou no sheshu.”