EZEKEL 33 - Sumi Naga CL (Re-edited) Bible (BSI)

Israel Ghukheu Ezekiel

¹ Ampeu tsa I lau ighi:

² “Timi nu, ow timiqo pütsa no panoqo vilo pilo, Tsala I no ayeghi lo azütakikihi süghi aye, eno ayeghi lo timiqo no pano gholo milakhi pesü pano ghukheu shipe aye,

³ tsala pa no azütakikihi ayeghi lo cheghi keu ithulu no afuko küigha eno timiqo ghutu aye,

⁴ tileno khukhumu afuko ghügha chilu anamu ghutu keu lumove, eno azütakikihi no pa yive aye, pa ji ye pa ampi kütsü lo ikughi nani.

⁵ Pa ye afuko ghügha chilu kemu ghutu keu lumove ke; pa ji ye pa ampi shou ikughi nani. Ikemu pa no ghutu keu luke aye, pa ye pa küxü xaluni cheke.

⁶ Ikemu aghukheu no azütakikihi cheghi keu ithulu anamu afuko küigha move, tishikeu lono timiqo ghutu move, eno azütakikihi ighive no panoqo khukhumu yive aye, timi tipau ye pa kipimi lono yivae, ikemu pa ji ye I no aghukheu launo khu nani.

⁷ “Ikehu no, timi nu, I no Israel kibolomi ghenguno o pesü aghukheu shivae. Kugho kughomu I kichi lono atsa chilu kelo, no ye I no panoqo ghutu keu pilo.

⁸ Tsala I no kixikilau vilo, O kixikilau, no ye mtsüqheino thinani, eno nono ti pimove no kixikilau pelo pa laghi lono tsüghü pemo aye, kixikilau huye pa kipimi ghenguno thive nani, ikemu pa ji ye I no o launo khu nani.

⁹ Ikemu nono kixikilau pelo pa laghi lono tsüghülu peniye ghutu kemu pa no pa laghi lono tsüghü move aye, timi tipau ye pa kipimi lono thive nani, ikemu no ye o ngulho xaluve nani.

Kushiye Thiveni Kea, Israel?

¹⁰ “No, timi nu, Israel kibolomi vilo pilo, Nongu no ishi pike: ‘Mtsüqheino ni kipimi eno ni xine ye ningu shou ani, eno ningu ye tipaqo ghenguno tsümavae. Imaye ningu ye kishino xüluni kea?’

¹¹ Panoqo vilo pilo, I no xüake toi, Ampeu Alhou no asheshu, Ni ye kixikilami kithi lo aloqi chemoe, ikemu pa pelo pa laghi lono tsüghü luve no xülu penishie; tsüghü ighilo, now kixikila laghi lono tsüghüve lo, kughengu O Israel kibolomi, nongu ye kushiye thiveni kea?

¹² “Eno no, timi nu, ow timiqo vilo pilo, Kughou amikuchomi no hebideveni keno pa chipiu mikucho ye pa xalumo nani, eno kixikilamiw kixikila ghengu ye, kughou pa no paw kixikila lono tsüghü luni keno, pa ye pa kipimi lono thimo nani, eno kughou amikuchomi no axine shiveni keno, pa ye pa chipiu mikucho lono xülumo nani.

¹³ I no amikuchou vilo pa ye mtsüqheino xülu nanie pi püaghi namu, pa no pa chipiu mikucho lo pükhübe no athiu ye achipikumo shive aye, pa mikucho kümla ye kiumu kümsülu tsümo nani, ikemu pa chipikumo ghenguno pa ye thive nani.

¹⁴ Itaghi, I no kixikilau vilo, ‘No ye mtsüqheino thinani,’ ipi püaghi namu, pa no pa xine lono tsüghüve no kiu no achipi eno kuchou keno mla aye,

¹⁵ eno pa no aküna shoqhi tsüchileve, kiu pükave keno tsüchileve, aküxü khuaye lono cheche, eno achipikumo shimove aye, pa ye mtsüqheino xülu nani; pa ye thimo nani.

¹⁶ Pa no shive keqo xine kiumu pa lachile keu shi kümsülu tsümo nani. Pa ye kiu no kuchou eno achipi keno shivae; pa ye mtsüqheino xülu nani.

¹⁷ “Ikeghi now timiqo no pano laghiu no achipikumo mu ishi picheni, ‘Ampeu laghi ye achipi kumoe.’

¹⁸ Kughou amikuchomi no pa chipiu mikucho lono tsüghüsü achipikumo shiveni keno, pa ye tipau ghenguno thinani.

¹⁹ Ikemu kughou kixikilami no paw kixikila lono tsüghüsü achipiu eno kuchou shini keno, pa ye hipau vecheo xülu nani.

²⁰ Ikeghi nongu no pi, ‘Ampeu laghi ye achipi kumoe.’ O Israel kibolomi, I no milakhikhi laghi kiqi lono kümtsü shou küghathabe nani.”

Jerusalem Kütsave

²¹ Ningu haphe sawuve keu ampe chighiakiniu, aqhi achighiu eno atsala apunguu lo Jerusalem lono pokaighi kemi lakhi I lau ighi no pi, “Mishighüna ye kütsalevae.”

²² Pokaighi keu huno ighini ke jilo Ampeu u no I shou ae; eno thanau timi huno ighike ghuloki lo Pa no I kichi xükhotsü, ikehu I kichi ye xükho luve no ni ye atsa pimlave keu shimove.

²³ Ampeu tsa I lau ighi:

²⁴ “Timi nu, Israel yeghi kütsave keu lo küghüna akeqo no pi ani, ‘Abraham ye pa likhie, ikeghi pa ye ayeghi amheghi shilue; ikemu ningu ye kutomoe; mtsüqheino ayeghi ye amheghi shi penike ningu tsüvae.’

²⁵ Tighenguno panoqo vilo pilo, Ampeu Alhou no ishi piani: Nongu no aji pusüsü keu shi chu, nongu nhethi no ajulhoqo ju, eno aji peleke; tishiaye nongu ye ayeghi amheghi shilu nani keshea?

²⁶ Nongu no azütakikihi shou pükhü, nongu no aphikümqhüpu shike, eno nongu lakhikhi no akisüghüu nipu shipixi ke; tishiaye nongu ye ayeghi amheghi shiluni keshea?

²⁷ Panoqo vilo hi pilo, Ampeu Alhou no ishi piani: I no xü aketoi, mtsüqheino khunoqo no kütsakungo keu-a lo küghüna ani keno azütakikihi lono ikiqi nani, khunono aluza lo ani keno I no tüghashiqo pelo tsüchuve penike tsüve nani, khunono sükusho-a eno atuki lo ani keno püsa lono thive nani.

²⁸ I no ayeghi pesü küghüküghalei amekühave tsü nani, li kumto qheküza kishekhave tsü nani, eno Israel lo naghutoqo agha itsüvepe nani tishikeu lono khumu katha move nani.

²⁹ Kughou panoqow aphikümqhüpu ghenguno I no ayeghi pesü küghüküghaleive tsüni keno tileno panongu no Ni ye Ampeu kepi ithi nani.

³⁰ “Timi nu, ow timi khunoqo atupikiye eno ahukikha lono o ghili küptsa cheni keno, panongu lakhino lakhi vilo picheni, ‘Ighi no Ampeu launo ighikeu tsa ye kiu keno inilo.’

³¹ Panongu no lakhi shi o lau ighi no o zülo iqa eno nono kiu pi keno chilu ikemu panongu ye ti papemo nani; kughengu pano kichi lo ghaghughale tsa pike toi mlaitha ke; pano mlo ye pano no ala shinikeu lo ghope ani.

³² Julo, no ye panoqo zülo akughoki kivishi ghaghu le phe eno akighilebo lebo küigha chekemi toi shilo kughengu panongu ye nono kiu pi keno ini nani, ikemu tipau shimo nani.

³³ Kughou hipau ighini keno—eno ti ye ighi nani—tileno panongu no tungkupu lakhi panoqo gholo ache kepi ithi nani.”