EZEKEL 32 - Sumi Naga CL (Re-edited) Bible (BSI)

Pharaoh ngo Egypt shou Akumlo

¹ Atsala atüghüu, aqhi chighiakiniu, ampe chighiakiniu lo Ampeu tsa I lau ighi:

² “Timi nu, Egypt kükau Pharaoh lau akumlo le phelo eno pa vilo pilo: “Nono o pesü shiyeqow abongshuu kepi kümsü cheni, ikemu no ye azüghi lo dragon ke; nono o ghoki lono ilhe ipeghi cheni, o pukhu no azü shipuqove, eno aghokiqo qonyive ke.

³ Ikehu Ampeu no ishi piani: ashiaye kütsasa gholono I no I khame pesü o shou vepuku no panongu no o meluve nani.

⁴ I no ayeghi lo o vepheve nani; I no aluza lo o kihive nani, eno atsütsü lo aghau kümtsü o shou ikughipe nani, I no ayeghiqha lo tüghashiqo pelo külhü chuvepe nani.

⁵ I no naghutoqo shouno o shi kuthole nani eno o kumo pesü akhilaqo shepichhi nani.

⁶ O ji kuqo pesü I no ayeghi eno naghutoqo ghi vapütsü nani, aghokitiqo ye o ji no chhi nani.

⁷ Kughou I no no ikhiveni keno, I no atsütsü küzüve nani, eno ayepuqo zümoive tsü nani, I no khüngküsü pesü khetsünhe nhave tsü nani eno aqhi no aküvü tsümove nani.

⁸ O shou atsütsü lo vüqai keu küvü kümtsü zümoive tsüno o yeghi lo aküzü süvetsü nani, ipi Ampeu Alhou no asheshu.

⁹ “Kughou nono ithimo keu ghakhuqo lo, shiyeqo dolo I no o kütsakungo keu süghini keno I no timi kutomo mlo küpünave tsü nani.

¹⁰ I no timi kutomo pelo o jupe apuchopungope nani, eno kughou I no panoqo zülo I zütakikihi pepheni keno panow kükami no o jupe thüghüi kelauno akütsüsa itho nani. Ow vekiqhi tsalani, timi kümtsü pütüta küxü ghenguno atüqhüdo kümtsü lo khokhoshi nani.

¹¹ “Kughengu Ampeu Alhou no ishi piani: Babylon kükau zütakikihi o shou ikughi nani.

¹² I no akughushu shiyeqo dolo ayiküsau zütakikihi pelo ow aqokitikhi shou ikughipe nani. “Panongu no Egypt qheküza shou kütsale ighi nani, panow aqokitikhi ye pühave nani.

¹³ Azüghi lono I no tüghashi kümtsü kütsave nani; eno timi pukhu no panoqo küpüna monani, tüghashi pukhu mu panoqo küpüna monani.

¹⁴ Tishino I no panoqo zü tsüghükhüive tsüno aghokiqo no thazü toi qope nani, ipi Ampeu Alhou no asheshu.

¹⁵ Kughou I no Egypt yeghi pighive eno ayeghi tile akeqo kümtsü kütsaveni keno, kughou I no tile akeqo kümtsü pithiveni keno tileno panongu no Ni ye Ampeu kepi ithi nani.

¹⁶ Hi ye akumlo le shi phe nani; shiye ngaqo no ti phe nani; Egypt shou eno liw aqokitikhi kümtsü shou panongu no hi phe nani, ipi Ampeu Alhou no asheshu.”

¹⁷ Atsala chighiapunguu, aqhi chighiakiniu, ampe chighiakiniu lo Ampeu tsa I lau ighi:

¹⁸ “Timi nu, Egypt aqokitikhi shou mloqa lo, eno li ngo akumto shiye ngaqo ghi khunoqo no kithimi yeghi lo iqive akeno panoqo gholo piqive lo:

¹⁹ ‘Nongu ye khunow jukivi shoqalu kea? Iqive lo eno aphighüyiko ghamo kemi gholo akulho qhivelo.’

²⁰ Panongu no ghüyi lono wove keqo gholo ikiqive nani. Egypt ye azütakikihi lau pephe tsüvae; li eno liw aqokitikhi sünhe sawuvelo.

²¹ Kithigha lono aghütomi no panoqo eno pano kukuphumi ghili pi nani: ‘Panongu ye iqighivae, panongu ye aphighüyiko ghamo kemi, khunoqo ghüyi lono wove keno panoqo gholo ihozü ani.’

²² “Assyria ye li loji sasü tile ani, li no ghiqhive keqo, khunoqo li zütakikihi no pithive keno panoqo sükumo no li vehope ani.

²³ Panoqo sükumo ye kithimi yeghi shekhau ani eno li loji no li sükumo vehope ani. Küxümi yeghi lo kichi kümsa chekemi ye kümtsü ghiqhivae, azütakikihi lono ikiqivae.

²⁴ “Elam ye tilau ani, eno liw aqokitikhi ye li sükumo vehope ani; panoqo kümtsü ghiqhivae, azütakikihi lono ikiqivae eno khunono küxümi yeghi lo kichi kümsa chekeno panongu ye aphighüyiko ghamo no akuthoku lo iqivae; eno kithimi yeghi lo wuve kemi gholo panongu ye pano kukujo xapu wuvae.

²⁵ Ghiqhive kemi gholo panongu no li lüpa mlatsü, liw aqokitikhi no li sükumo vehope ani, panongu kümtsü aphighüyiko ghamo kemi, azütakikihi no ghiqhive kemie; kughengu xüküami yeghi lo panongu no kichi kümsa keu veküpha ke, eno akuthoku lo iqive kemi gholo panongu no pano kukujo xapu ke; panongu ye ghiqhive kemi gholo ngovae.

²⁶ “Meshech-Tubal eno liw aqokitikhi ye tilau ani, li sükumo no ti kuchopu vehope ani, panongu kümtsü aphighüyiko ghamo kemi, azütakikihi no ghiqhive kemi; kughengu panongu no küxümi yeghi lo kichi kümsa keu veküpha ke.

²⁷ Panongu ye akumtomi, aphighüyiko ghamo kemi thive keqo dolo, aghüshi nanu xapusü Kithigha lo iqive keqo, panongu ye azütakikihi pano kütsü qholo qhi eno axine no pano saghi shou ani; kughengu akumtomi no kichi kümsa keu ye küxümi yeghi lo ani.

²⁸ Ikemu o ghengu ye, no ye kubove nani eno aphighüyiko ghamo kemi, khunoqo ghüyi lono wove keno panoqo gholo ngo nani.

²⁹ “Edom ye tilau ani, li kükau eno li yepemi, pano ye pano kumto kümtsü xapu khunoqo azütakikihi no ghiqhive keno panoqo gholo ani; panongu ye aphighüyiko ghamo kemi, khunoqo akuthoku lo iqive akeno pano gholo ani.

³⁰ “Ahuu kükapumi ye tilau ani, eno Sidonmi kümtsü pano kumto vecheo kichi kümsa keu ghenguno akukujopu shi ghiqhive kemi gholo iqivae; panongu ye aphighüyiko ghamo no ghiqhive kemi gholo ani, eno akuthoku lo iqive kemi gholo pano kukujo xapu ani.

³¹ “Kughou Pharaoh no panoqo ithulu keno, paw aqokitikhi jupe pa lopiqilu nani, Pharaoh eno paw ghüshimi kümtsü azütakikihi lono ghiqhivae ipi Ampeu Alhou no asheshu.

³² Kughengu I no küxümi yeghi lo kichi kümsa keu veküpha ke; Pharaoh eno paw aqokitikhi ye aphighüyiko ghamo kemi, khunoqo azütakikihi lono ghiqhive akeno panoqo gholo qhovae, ipi Ampeu Alhou no asheshu.”