EZEKEL 31 - Sumi Naga CL (Re-edited) Bible (BSI)

Pharaoh Ghiqhive Nani

¹ Atsala atüghüu, aqhi aküthüu, ampe chighiaqhaqhiu lo, Ampeu tsa I lau ighi:

² “Timi nu, Egypt kükau eno paw aqokitikhi vilo pilo: “O kughushu ye khuu mihi kea?

³ Julo, Assyria ye Lebanon lo cedarbo lakhi ke, jukivi loka eno aghasü kicheqho, chuqumghai iku khüngküsü toe.

⁴ Azü no tipau vapütsü; azükutho no tipau pelo kushuo thuwu lupe, ti shosü püake-a homxa aghokiqo no qowu, aluza lo asübo kümtsü lau aghokitiqo puwu ke.

⁵ Ikehu ti ye aluza lo asübo kümtsü nguno qhemghaive; tipau khuni lo azü no kupukuno kehu alokaqo ye kije kushuo shi thuikuve.

⁶ Atsütsü lo aghau kümtsü no tipa loka lo apüsü pesü; tüghashi kümtsü no tipa loka qholono atiqo piti, tipa kicheqho lono shiye kuloghi kümtsü no xüche.

⁷ Tipau jukivi ye akighiche, alokaqo no kushuo; kughengu pa kuhu ye azü kupukuno shi akeu qhou qüilo ke.

⁸ Alhou ghutu lo cedarboqo ye tipau sasü kimghi mlae, momu asahu sübo ye tipau sasü aqhemi shimlae; fir süboqo ye pa loka toimoe; Alhou ghutu lo asübo lakhimu titoi jukivi kühae.

⁹ I no tipa lokaqo sükhotsü eno jukivi shitsüe, Alhou ghutu lo Eden süboqo kümtsü no tipau jumine ke.

¹⁰ “Tighenguno Ampeu Alhou no ishi piani: Tino qhemghai thuiku khüngküsü tove no chuqumghaive keu lono qhezave kehu

¹¹ I no tipa pesü shiyeqo gholo akumtou u lo süvetsü nani. Pa no mtsüqheino paw küsakügha kiqi lono peitha nani. I no tipau peve ake.

¹² Shiyeqo dolo ighono ayiküsau, inaghami no tipau yeqhive no qhivae. Naghutoqo lo eno akhilaqo lo tipau lokaqo ye ikiqivae, tipau lokaqo ye ayeghi lo kipekuloi ke-a kümtsü lo ikiqivae, eno ayeghi lo timiqo ye tipau kicheqho qhive no wukhavae.

¹³ Tipau iluqive keu züngü lo aghau kümtsü no ngoe, eno aluza lo tüghashiqo no tipau lokaqo lo ani.

¹⁴ Hi kümtsü shikeu ye azü no vapütsü puthu keu süboqo kiumu chuqumghai thuiku khüngküsü topemo, eno kiukiu sübo namu azü itsülu keu ye thuiku tipaqo tolupe moniye ke. Kughengu tipaqo ye kümtsü ayeghi qhou, timi nuli khunoqo no akithi yeghi lo ilove akeno panoqo gholo thive penike ikhiphe tsüvae.

¹⁵ “Ampeu Alhou no ishi piani: Tipa tsalani cedar no Kithigha lo ikiqi ilove kelo I no mloqape ke; I no akuthoku nhave tsü, eno tipau ghokiqo ghasüve, eno azü kutomo lakhave tsü. Aküzü pesü I no Lebanon küzüve, eno tipau ghenguno aluza lo asübo kümtsü thizümüivae.

¹⁶ Tipau ikiqi keu ghügha mtsa I no shiyeqo pelo ithape ke, ti ye aqo lo ikiqi ilove keqo gholono I no tipau Kithigha lo vesüve ke. Eno Eden lo asübo kümtsü, Lebanon sübo kishekiphe eno akiviu khikhi azü no pütsü cheni keno tipaqo ye ayeghi qhou alokughuno shive.

¹⁷ Panongu ghi khunoqo ghüyi lono wove keno panoqo gholono Kithigha lo ilove; iyei, ghüshimi nanu xapu akemi khunoqo no tipau kicheqho lo akeno panoqo gholono ilove.

¹⁸ “Imaye Eden süboqo dolo ajekipi eno akughushu gholo no ye khikhiu toi kea? No ye Eden süboqo gholono ayeghi qhou sailove nani. No ye azütakikihi lono ghiqhive kemi, aphighüyiko ghamo kemi gholo ngove nani. “Hi ye Pharaoh eno paw aqokitikhi kümtsü ghenguno, ipi Ampeu Alhou no asheshu.”