EZEKEL 30 - Sumi Naga CL (Re-edited) Bible (BSI)

Egypt Ghenguno Akumlo

¹ Ampeu tsa I lau ighi:

² “Timi nu, tungkuptsa pilo, Ampeu no ishi piani: “Mloqa lo, ‘Atsala ghenguno Ahae!’

³ Kughengu atsala ye kupunuvae, Ampeu tsala ye kupunuvae; ti ye khüngküsü no nhapho keu tsala, shiyeqo ghimepu tsalae.

⁴ Azütakikihi Egypt shou ikughi eno Cush shou kütakihi ighi nani, kutomo no Egypt lo ikiqive nani, liw küakini xapu wuve nani, li boqhaqo tulaqhive tsü nani.

⁵ Cush, Put, Lud, Arabia qha kümtsü, Libya eno kütsape akeqo timi ghi Egypt gholono azütakikihi lono ikiqive nani.

⁶ “Ampeu no ishi piani: Egypt sakuphumi ye ikiqive nani, li kumto qheküza ye ikiqive nani; Migdol lono Syene kutolo panongu ye azütakikihi lono ikiqive nani, Ampeu Alhou no asheshuvae.

⁷ Küghüküghaleive keu ghakhuqo dolo alhoksau shinani, eno kütsave keu phughiqo dolo pano phughiqo anani.

⁸ I no ami pesü Egypt piti eno li kukuphumi qhoi kütsale kelo tileno panongu no Ni ye Ampeu kepi ithi nani.

⁹ “Tipa tsalani I launo atsapemi no zükiluqo lono wuno pülüküpsa küha kemi Cush lo timiqo kichi kümsa niye shinani, eno Egypt mhekiqi tsalani kütakihi keu no panoqo shou ikughi nani; kughengu julo, ti ye ighivae!

¹⁰ “Ampeu Alhou no ishi piani: “I no Babylon kükau Nebuchadnezzar vecheo Egypt küakini kishekhave tsü nani.

¹¹ Pa eno pa paw timi, shiyeqo dolo ayiküsau, ayeghi kütsani ke saghi nani, panongu no Egypt mjochileni ke azütakikihi pesü ghiqhi no akumo no ayeghi chhitoi nani.

¹² I no Nile qhaive tsü nani eno ayeghi pesü kixikilami u lo jesüve tsü nani; inaghami vecheo I no ayeghi eno tile akeu qhoi kütsave tsü nani; Ni ye Ampeu ke; I no piqhivae.

¹³ “Ampeu Alhou no ishi piani: “I no ajulhoqo kütsave nani eno Memphis julhoqo kishekhave tsü nani; Egypt yeghi lo kükapuu kühave nani; ikehu I no Egypt yeghi lo akümsa süve tsü nani.

¹⁴ I no Pathros pighive nani eno Zoan lo ami süvetsü nani, Thebes shou küghatha nani.

¹⁵ Egypt sükusho-a Pelusium shou I no I loghu lepuku nani, Thebes lo aqokitikhi kütsa nani.

¹⁶ I no Egypt lo ami süvetsü nani; Pelusium ye ighono iju nani; Thebes ye hepho iloghive nani, Memphis no tamono avesa nani.

¹⁷ On ngo Pi-beseth lo lhothemi ye ghüyi lono wonani, eno totimiqo ye akughu lo wuve nani.

¹⁸ Kughou I no Egypt kuokhasü hephove tsüni keno, Tehaphnehes lo tsüküvü no tsüküzü shive nani, eno li kumto qheküza ye kishekhave tsü nani; li ye khüngküsü no küzüve nani, li ngaqo ye akughu lo wuve nani.

¹⁹ I no ishi Egypt shou küghathabe nani, tileno panongu no Ni ye Ampeu kepi ithi nani.”

Egypt ye Babylon zülo Ikiqive

²⁰ Ampe chighiaqhaqhiu, aqhi atüghüu, atsala akütsüniu lo Ampeu tsa I lau ighi:

²¹ “Timi nu, I no Egypt kükau Pharaoh umlo hechheve tsüae, julo, ti viluve penike aphi kümtsha pesü khapipe moe, tishikeu lono ti ye akumto shive no azütakikihi tsüqülu peniye ke.

²² Tighenguno Ampeu Alhou no ishi piani: Julo, Ni ye Egypt kükau Pharaoh lachile ani eno I no pa umlo alo akeu ngo hechheve keu gha hechheve tsü nani, eno I no azütakikihi pa u lono ikiqivepe nani.

²³ I no shiyeqo dolo Egyptmi kutholeve nani, eno aghakhuqo lo panoqo hale puwuve nani.

²⁴ I no Babylon kükau umlo shikumtove tsü nani eno I zütakikihi pa u lo sütsü nani, ikemu I no Pharaoh umlo ye hechheve tsü nani, eno pa ye timi lakhi no akithipu ghüzaku xapu aketoi Babylon kükau zülo aküsü ghügha igha nani.

²⁵ I no Babylon kükau umlo shikumtove tsü nani, ikemu Pharaoh umlo ye ikiqive nani. Kughou I no I zütakikihi pesü Babylon kükau u lo süve tsüno pa no Egypt yeghi mjochile ghi ti chhopuwoni keno panongu no Ni ye Ampeu kepi ithi nani.

²⁶ I no shiyeqo dolo Egyptmi kutholeve nani, eno aghakhuqo lo panoqo hale puwuve nani. Tileno panongu no Ni ye Ampeu kepi ithi nani.”