EZEKEL 3 - Sumi Naga CL (Re-edited) Bible (BSI)

¹ Pa no I vilo pi, “Timi nu, kiukiumu nono hile ithulu keu chulo. Liküküzü kaku hipau chulo, eno wulo, Israel laghami vilo pilo.”

² Tighenguno I no I kichi xükho, eno Pa no liküküzü kaku hipau chupe nike I tsü.

³ Pa no I vilo pi, “Timi nu, I no liküküzü kaku hipau o tsü akeu chulo eno hipau pesü o po shepichhi lulo.” Tileno I no chu keloye I kichi lo akhingozü toi ngonyi chulue.

⁴ Pa no I vilo pi, “Timi nu, Israel laghami lau wuno I tsa panoqo vilo pilo.

⁵ Kughengu inaghami tsa piche kemi eno atsa vetha mlakemi lau o puwu anike kumoe, ikemu Israel laghami lau ke,

⁶ inaghami tsa piche kemi momu atsa vetha mlakemi kutomo, khunoqo tsa nono vethamla keno panoqo gholo puwu anike kumoe. Tsala I no kuchou no tipaqo gholo o puwu aghi aye, panongu ye o tsa initsü monani.

⁷ Ikemu Israel laghami ye o tsa inini ke pulomo nani, kughengu panongu ye I tsa inini ke pulomoe: kughengu Israel laghami ye kümtsü no kuthovi eno amlo mkake.

⁸ Julo, I no pano gi shishoive tsü ketoi o gi ghi tishive tsüae eno panoqo mlo toi o mlo kuthovive tsüae.

⁹ Atuyitu nguno akümkau shi I no o gi shishoive tsüae. Panoqo msa kevilo momu panoqo ju ithulu pesü aghüthisüve kevilo, kughengu panongu ye hekibide laghami ke.”

¹⁰ Tinguno alau, Pa no I vilo pi, “Timi nu, I no o vilo piniye akeqo tsa kümtsü o mlo lo qhilulo eno o kini xükhope inilo.

¹¹ Ow timi haphe sawuve keqo lau wulo, eno panoqo no inina monamu panoqo pütsa no, ‘Ampeu Alhou no ishi piani,’ ipilo.”

¹² Tithiu Aghungu no I sünheqhe luve eno I thiu ayeghi küghütha kije lakhi sütsa I no chilu: “Tipa-a lono Ampeu juküvü sheqhelo!”

¹³ Ti ye aküxüküa lhoxüqo chishibo lakhino lakhi dilu, eno tipau shelo kuluhoqo ngo ayeghi küghütha ghügha kije igha keu ghügha ke.

¹⁴ Aghungu no I peqheluve eno I sawuve, eno ni ye kukhukimji shive, Ampeu u no I shou akumto shi ikughive ke.

¹⁵ Ni ye Tel-abib lo haphe sawuve kemi, Khebar züla lo küghüna akeqo gholo ighive, eno panoqo no küghüna akeu lo I no iqave. Eno tilau I mhoqhipe panoqo gholo atsala tsüni ngove.

Israel Ghenguno Aghukheu

¹⁶ Atsala tsüni kishekhave kethiu, Ampeu tsa I lau ighi:

¹⁷ “Timi nu, I no o pesü Israel laghami ghukheu shive tsüae. Kughou nono I kichi lono atsa chiluni keno, no ye I ghenguno panoqo ghutu pilo.

¹⁸ Tsala I no kixikilau vilo, ‘No ye mtsüqheino thive niae,’ ipini eno nono pa kütüghü move momu pa küxü xalu tsüniye paw kixikila laghi lo ideighi penike kütüghü move aye, pa ye pa xine ghenguno thive nani, ikemu pa ji ghenguno nono kihikülai tsü masa nani.

¹⁹ Ikemu nono kixikilau kütüghüve eno pa no paw kixikila momu paw tipa laghi lono tsüghü lumo aye, pa ye pa xine lono thive nani, eno no ye o ngulho xaphe luve nani.

²⁰ Itaghi, amikuchomi lakhi no pa mikucho lono tsüghüsü achipi kumo shive eno I no pa zülo apukhu küpsüpu qhivetsü aye, pa ye thive nani. Kughengu nono pa kütüghü move keke pa ye pa xine ghenguno thive nani, eno pa mikucho kümla pa no mlapüa keqo ye kümsülu tsümo nani, eno pa ji ghenguno no ye kihikülai tsümo nani.

²¹ Ikemu tsala nono amikuchomi pelo axine shipemo nike kütüghü no pa no axine shimove aye, pa ye mtsüqheino xalu nani, kughengu pa no kütüghü keu luveke, eno no ye o ngulho xaphe luve nani.”

²² Tilau Ampeu u no I shou ae. Pa no I vilo pi, “Ithulo, akhila lo iqilo, tilau no I no o pütsani.”

²³ Ikehu I no ithu no akhila lo iqive, eno julo, Khebar züla lo I no ajuküvü ithulu ketoi Ampeu juküvü tilau aghie, eno I no I gi pishiqho luve.

²⁴ Ikemu Aghungu no I lolo iloghive no I pelo puthughope, Pa no I pütsa no pi, “Wulo, o kilo khatha ilovelo.

²⁵ O timi nu, julo, akighikipili no o shou benani eno no ye panoqo gholono tsüghave nani, tishikeu lono no ye timi gholo ipelumo nani.

²⁶ Eno I no o mili pesü o taha lo daluvepe nani, tishikeu lono no ye atsa pimlave no panoqo shikithe tsümlave nani, kughengu panongu ye hekibidemi laghami ke.

²⁷ Ikemu kughou I no o pütsani keno, I no o kichi xükho tsü nani, eno nono panoqo vilo, ‘Ampeu Alhou no ishi piani’ ipi nani. Khuu no chiluni keno, pa no chilu pelo; eno milive keu no milive pelo, kughengu panongu ye hekibide laghami ke.