EZEKEL 29 - Sumi Naga CL (Re-edited) Bible (BSI)

Egypt shou Tungkuptsa

¹ Ampe achighiu, aqhi achighiu, atsala chighiakiniu lo Ampeu tsa I lau ighi:

² “Timi nu, Egypt kükau Pharaoh lau o gi kughopuwo lo, pa eno Egyptmi kümtsü lachile tungkuptsa pilo;

³ Ampeu Alhou no ishi piani pi pütsa: “Julo, Egypt kükau Pharaoh, Ni ye o lachile ani, dragon kije pa ghoki mta lo ani, tipau no pi, ‘Nile ye Iw ke; I no I ghenguno mlae.’

⁴ I no ayikuho pesü o mükhü lono fuluve nani, eno o ghoki lo akha no o yiko lo meluvepe nani; akha o gholo meluve keqo qhoi I no o gholono sünhephe nani.

⁵ I no asayeqha lo o peve nani, no eno o ghoki lo akha kümtsü; no ye aluza lo ikiqive nani eno khunomu o hekütsümo nani. I no o pesü ayeghi lo tüghashi eno atsütsü lo aghau chuqupu shi tsüve nani.

⁶ Tileno Egypt lo küxümi kümtsü no Ni ye Ampeu kepi ithi nani. “Nono Israel kibolomi ghenguno ayeghü küsü shike ghenguno

⁷ kughou panongu no au lono o tsüqü luve keno, nono pano bighi kuchopu hechhe eno kubove tsü; eno kughou panongu no o mungupe ngo keno nono pano shitsa kuchopu sülave tsüe.

⁸ Tighenguno Ampeu no ishi piani: Julo, I no o shou azütakikihi süghi nani eno ow timi ngo tüghashi ghiqhive tsü nani,

⁹ Egypt yeghi ye küghüküghalei kütsaleve nani. Tileno panongu no Ni ye Ampeu kepi ithi nani. “Nono, ‘Nile ye Iw eno I no mlake,’ ipike ghenguno

¹⁰ julo, Ni ye o lachile ani eno o ghoki lachile ani, Migdol lono Syene kuto eno Cush lughi kutolo I no Egypt yeghi pesü shishe küghüküghalei kütsave tsü nani.

¹¹ Khuu pukhu nomu tipau katha wumo nani, eno kiu tüghashi pukhu nomu ti katha wumo nani; ti ye ampe lhobidi ghenguno küghüna move nani.

¹² Küghüküghaleive keu ghakhuqo dolo I no Egypt yeghi pesü küghüküghaleive tsü nani, eno ampe lhobidi ghenguno liw mishighünaqo ye kütsape akeqo mishighünaqo dolo küghüküghaleive nani. I no Egyptmi pesü kutholeve nani, eno aghakhuqo dolo hale puwuve nani.

¹³ “Kughengu Ampeu Alhou no ishi piani: Ampe lhobidi kishekhave kethiu, panoqo kuthole puwuve kemi dolono I no Egyptmi hekütsü nani,

¹⁴ I no Egypt ngukümgha tsüchile nani eno Pathros yeghi, panow hukuthu yeghi lo, panoqo sachile saghi nani, eno tilau no panongu ye miqemleike kükaqha shive nani.

¹⁵ Ti ye kükaqhaqo dolo ighono miqemleive nani, eno shiyeqo shou khilemu pa pesü süqhe kithe move nani. I no panoqo pesü ighono aghulo shive tsüno shiyeqo shou khilemu ayepe kithe pemove nani.

¹⁶ Panoqo lau akukuphu ghenguno tsüghü wukeu xine kümsüchile luno Israel laghami ye pükhükulu shi Egypt lau wumove nani. Tileno panongu no Ni ye Ampeu Alhou kepi ithi nani.”

¹⁷ Ampe muku akütsüniu, aqhi atüghüu, atsala atüghüu lo, Ampeu tsa I lau ighi:

¹⁸ “Timi nu, Babylon kükau Nebuchadnezzar no paw ghüshimi pelo akaghashi Tyre mjochile peke. Timi kümtsü kütsüsa miyeve tsü, eno kümtsü bighi kiyisho tsü, ikeghi pa eno paw ghüshimi ye Tyre shou akaghashi mlakeu ghenguno ame tsükepu kiumu ithulumoe.

¹⁹ Tighenguno Ampeu Alhou no ishi piani: Julo, I no Egypt yeghi pesü Babylon kükau Nebuchadnezzar tsüve nani; eno pa no tipau xüle no küakini xulepuwuve nani; eno tino paw ghüshimi ghenguno ajume shi nani.

²⁰ Pa no akaghashi mlave keu jumeshi I no Egypt yeghi pesü pa tsü nani, kughengu panongu ye I ghenguno mlave akepi Ampeu Alhou no asheshu.

²¹ “Tipa tsalani I no Israel laghami ghenguno akibo lakhi pipetsü nani, eno I no panoqo gholo o kichi xükhotsü nani. Tileno panongu no Ni ye Ampeu kepi ithi nani.”