EZEKEL 28 - Sumi Naga CL (Re-edited) Bible (BSI)

Tyre Kükau shou Tungkuptsa

¹ Ampeu tsa I lau ighi:

² “Timi nu, Tyre kükapuu vilo pilo, Ampeu Alhou no ishi piani: “O mlo ye aqheküza eno nono pike, ‘Ni ye alhou, ni ye alhouqo lakhü lo eno azüghi mta lo iqa acheni,’ ikemu nono alhou toi kümsü anamu no ye timi thono alhou kumoe,

³ no ye mtsüqheino Daniel nguno alokütsüu; kiu tuqhoumu o launo küsü mla;

⁴ o lokütsü eno ow vethakulu vecheo nono o sala küakini heshelu eno ameshoyi ngo ghükayi pesü o kinibo lo pekütsü lue;

⁵ ow lhidikishi lo o lokütsü vecheo nono o küakini kughuko luno o küakini shou qheza ke,

⁶ ikehu Ampeu Alhou no ishi piani: Nono o mlo pesü alhou mlo toi shike ghenguno,

⁷ julo, I no shiye dolo shishe ayiküsau inaghami o lau saghini; panoqo no azütakikihi pesü o lokütsü kivi lachile nani eno o jekipi shipütha nani.

⁸ Panongu no aqolo o vesüve nani, eno no ye azüghi mta lo ghiqhi pithive kemi shi thive nani.

⁹ O ghiqhini kemi zülo no ye timi thono alhou kumo keghi pano nhethe lono no ye itaghi, ‘Ni ye alhou ke,’ ipi ani keshea?

¹⁰ No ye inaghami aphighüyiko ghamo kemi u lono thive nani; kughengu I no piqhivae ipi Ampeu Alhou no asheshu.”

Tyre Kükau shou Akumlo

¹¹ Tinguno alau, Ampeu tsa I lau ighi:

¹² “Timi nu, Tyre kükau shou akumlo le phelo, eno pa vilo pilo, Ampeu Alhou no ishi piani: “No ye kupukulu jedapu nguthi, alokütsü no chhitoi eno jukivi no kupukülai ke.

¹³ No ye Eden, Alhou ghutu lo ache; akughupu tu jeli no o küzüpe ache, sardius, topaz, eno mlaputu, beryl, onyx, eno jasper, sapphire, emerald, eno carbuncle; ameshoyi no meda eno kixi puku o nanu shiche. O lhoke tsalani no tipaqo kutope qhitsüe.

¹⁴ Hikujuu cherub toi o nukishe I no o kimkhipe qhi; no ye Alhouw akimthe toghi lo atu iqü akeqo dolo alache ae.

¹⁵ Amikuchokumo o lolo ithulu moke kutolo o lhoke tsalani no o laghi ye tukutiye kühake.

¹⁶ Ow kilhisho kupukuno shikeu lono no ye ngukangugha no chhitoive no axine shive kehu I no Alhouw naghuto lono kitiqeve keu thime toi o peve, eno atu iqü akeqo dolono o kütsave ke, O hikujuu cherub.

¹⁷ O jukivi ghenguno no ye qhezave; o jekipi ghenguno nono o lokütsü shipüsave. I no ayeghi lo o peve; kükami shipiye no o ju peniye shike.

¹⁸ O xine kütsasa, ow kilhisho mikuchokumo vecheo nono o kimthe-aqo shikitiqe ke; ikehu I no ami pesü o lau ighi; tino o pitiqhive, eno no ithulu akemi kümtsü nhethe lono I no o pesü ayevu kughulhove.

¹⁹ No ithi kemi shiaye kümtsü no o jupe thüghüive; no ye akümsapu shi kishekhave no alholo ghenguno kühave nani.”

Sidon shou Tungkuptsa

²⁰ Ampeu tsa I lau ighi:

²¹ “Timi nu, Sidon küdau o gi kughopuwo no li lachile tungkuptsa pilo

²² Ampeu Alhou no ishi piani: “Ni ye o lachile ani, O Sidon, I no o lau I juküvü pephe nani. Kughou I no li shou küghathani, eno li lau I kimthe pepheni keno panongu no Ni ye Ampeu kepi ithi nani;

²³ kughengu I no li lau püsa ngo ajikuqo puwu nani; azütakikihi no ako kümtsü lono li shou ikughi kelo akumo no li zülo ikiqi nani. Tileno panongu no Ni ye Ampeu kepi ithi nani.

²⁴ “Eno Israel kibolomi ghengu ye pano kisüghümi khunoqo no küthaküghapu shi pano peitha cheni keno panongu ye ayemhi no qhukepu momu asahu no ghüza kepu kühave nani. Tileno panongu no Ni ye Ampeu Alhou kepi ithi nani.

Israel Hekütsü luve

²⁵ “Ampeu Alhou no ishi piani: Kughou I no ashiaye gholo kuthole puwuve keqo Israel laghami hekütsü luve no shiyeqo nhethe lono I kimthe panoqo gholo pephe piyeni keno, tileno I no I qeu Jacob tsükeu yeghi lo panongu no küghünauve nani.

²⁶ Panongu no sükusho lono küghünauve nani, panongu no atsaibo shosü eno aki shiqhe puku nani. I no pano kisüghümi khunono küthaküghapu shi pano peitha keno panoqo kümtsü lau Iw küghakütha bekelo panongu ye sükusho lono küghünauve nani. Tileno panongu no Ni ye Ampeu pano Lhou kepi ithi nani.”