EZEKEL 27 - Sumi Naga CL (Re-edited) Bible (BSI)

Tyre Ghenguno Akumlo

¹ Ampeu tsa I lau ighi:

² “Timi nu, no ye Tyre shou akumlo le phelo,

³ eno Tyre, azüghi kulaghi lo küghüna achekeu, azüghimkü lo küxümi kutomo sasü lhidi shichekeu vilo, Ampeu Alhou no ishi pianie pilo: “O Tyre, nono pi ke, ‘Ni ye kupukülai jukivi ke.’

⁴ O lughi ye azüghi mta lo ani; o shiqhe kemi no o jukivi kupukülai shitsüe.

⁵ Panongu no Senir milisübo pesü o süpa mlatsü; Lebanon cedarbo pesü ow zükilu tsükucho mlatsüe.

⁶ Panongu no Bashan phisüqo pesü ow helisa mlatsü; Cyprus züghimkü lono asahusü pesü o ghüza qhatsü, akühahu pesü tipau shou meda tsüe.

⁷ O shuka fusawuke phi no Egypt lono phepheike phi aye shisükeu, tino ow michiphi; Elishah züghimkü lono atsüla ngo hughaike phi no o pusho mlae.

⁸ Sidon ngo Arvad lo küxümi no ow helisa kipemi shiche; O Tyre, ow kütshaküghami no o shuka küsami shiche.

⁹ Gebal lo layemi ngo kütshaküghami no akighipe mekükhami; azüghi lo zükilu sakichemi no o nhemgha kilhishoni ye o gholo acheke.

¹⁰ “Persia, Lud eno Put ye ow ghüshimi shiche. Panongu no azüto ngo akütsükuqho o liwo lo pufupe qhiche; panongu no ajekipi o tsüche.

¹¹ Arvad ngo Helech timiqo no homxape o tupikiye shiche, eno Gamad timiqo no o qogheqo shiche. Panongu no pano zütoqo pesü o tupikiye vehope qhiche; panongu no o jukivi kupukülai tsüe.

¹² “O küakini jeli kutomo achekeu ghenguno Tarshish no o sasü lhidi shiche: panongu no ghükayi, ayi, ayipa eno aküsayi pesü ow tinhemgha kilhisho cheke.

¹³ Javan, Tubal, eno Meshech no o sasü lhidi shiche; panongu no timi ngo alazayi liqo pesü o nhemgha kilhisho che.

¹⁴ Beth-togarmah lono panongu no khurshi, aghükishi khurshi, eno khurha pesü ow tinhemghaqo kilhisho che.

¹⁵ Dedan timiqo no o sasü lhidi shiche. Azüghimkü ghakhu kutomo no ow kütavi kilhikishi-a shiche; panongu no ame tsüno akühahu ngo tsübuike sü o lau peighi che.

¹⁶ Ow tinhemgha kupukuno shi akeu vecheo Syria no o sasü lhidi shiche; panongu no emerald, hughaike phi, aye shisükeu phi, phepheike phi, azükhenu ghitu eno ruby tu pesü ow tinhemgha kilhisho che.

¹⁷ Judah ngo Israel yeghi no o sasü lhidi shiche; panongu no Minnith shothi, achuqupu, akhingozü, thazü eno nukümtshau pesü ow tinhemgha kilhisho che.

¹⁸ Ow tinhemgha kupukuno shi akeu thokha jeli lo o küakini kutomo akeu ghenguno Damascus no o sasü lhidi shiche; Helbon tsaizü, Sahar mhiphi,

¹⁹ eno Uzal lono peighi keu aji hughi pesü ayi hephave keu, aküsa kola eno vekujumkhu pesü ow kilhikishi nhemgha kilhisho cheke.

²⁰ Khurshi shou qhaiqa chekeu ashiyiko pesü Dedan no o sasü kilhisho che.

²¹ Arabia ngo Kedar lo kükapumiqo no o mbeti, ambetsü, eno ane küqhükili shikeu lo o pulou shilu chekemi ke; thime hipaqo lono panongu no o sasü lhidi shiche.

²² Sheba ngo Raamah timiqo no o sasü lhidi shiche; panongu no vekujumkhu kivi eno akughupu tu kümtsü eno ameshoyi pesü ow kilhikishi nhemghaqo kilhisho che.

²³ Haran, Canneh, Eden, Sheba, Asshur, eno Chilmad lo lhidikishimi no o sasü lhidi shike.

²⁴ Ow kilhikishi-a lo hipaqo no o sasü aphi akivi, atsüla phi eno aye shisükeu phi, alabe jeli no aghüza qhakeu phi, akighikipili pesü mtotoi tsügha keu pesü lhidi shiche.

²⁵ Tarshish lo zükiluqo no ow kilhikishi nhemghaqo pesü izüwu che. Ikehu no ye chhitoive no azüghi mta lo akho mishisheipe ngove.

²⁶ “Ow helisa kipemi no o sasü azüghi kutho lo saghivae. Kipela mülhü no azüghi mta lono o fuchhe pinyive tsüae.

²⁷ O küakini, o nhemghaqo, zükilu lo kichemi, sakichemi, akighipe mekükhami, lhidimi eno ghüshimi o gholo akemi, tipaqo gholo zükilu lo kichemi kümtsü nono ikiqive ke tsala lono azüghi lo ikiqi ilove ke.

²⁸ Ow zükilu sakichemi küqa sütsa no aghakhu qha süküthü,

²⁹ panow zükilu lo helisa kipemi kümtsü no kunguu ikughive. Azüghi lo kichemi eno zükilu küsami no amkü lo puthughove

³⁰ eno asütsa vekipighi ighamku eno kukhukimji shi qae. Panongu no pano kütsü lo ayevu ayeghimkhu lepuku no ihie;

³¹ o ghenguno panoqo no asa miyeve no yeqhiyephi pepuve, eno kukhukimji shi o kümsü qae.

³² Pano mloküqa lono panongu no o ghenguno akumlo shie: ‘Azüghi dolo akeu Tyre toike kütsave keu khuu ani kea?

³³ Azüghi lono o nhemgha ighi kelo kutomo ghapiqi tsüche; o küakini eno anhemgha pofushi pesü nono ayeghi lo kükami pelo kinimi shilupe.

³⁴ Itehi no ye azüghi eno azü kutho lono fuchhe pinyivae; o nhemgha eno o shuka küsami kümtsü o gholono azü lo ilovae.

³⁵ Azüghimkü lo küxümi kümtsü no o jupe thüghüivae, kükami kütsüsa no puthughovae; akümsa no agi no sükughuvae.

³⁶ Ashiayeqow kilhikishimi no o cheqhi ani; no ye akümsapu shi kishekhavae eno alholo ghenguno kühave niae.’”