EZEKEL 26 - Sumi Naga CL (Re-edited) Bible (BSI)

Tyre shou Tungkuptsa

¹ Atsala atüghüu, aqhi atüghüu, ampe chighiaqhaqhiu lo Ampeu tsa I lau ighi:

² “Timi nu, Tyre no Jerusalem vilo, ‘Aha, timiqow khagho ye kubovae; tipau ye I lau khaqhi püani. Itehi li ye kütsape ani keke niu no chhitoilu niae,’ ipike ghenguno,

³ Ampeu Alhou no ishi piani: Julo, O Tyre, I no o mjochile ani, azüghi no azü fukucho süghi ketoi, I no shiye kutomo o shou süghi nani.

⁴ Panongu no Tyre tupikiye kütsave nani eno li qogheqo kuboleve tsü nani, I no li yeghi muxulepe atuqu kümsa shivetsü nani.

⁵ Li ye azüghi mta lo akhameqo vesü kepu-a shive nani, kughengu I no piqhivae ipi Ampeu Alhou no asheshu. Li ye shiyeqo no xulepuwuve kepu shive tsü nani,

⁶ eno li ngaqo ye aphughi mta lono azütakikihi pesü ghiqhive nani. Tileno panongu no Ni ye Ampeu kepi ithi nani.

⁷ “Kughengu Ampeu Alhou no ishi piani: Julo, I no Tyre lachileni ke ahuu no Babylon kükau Nebuchadnezzar, kükamiqo akükau, khurshi ngo khurkuluqo eno khurshimi ngo ghüshimi kutomo aqokitikhi saighi nani.

⁸ Pa no azütakikihi pesü aphughi mta lono nongu ngaqo ghiqhive nani. Pa no o lenike khasüni keu tupikiye kuto nani eno amoqhe puku nani, eno azüto kumtoqo pesü o mjochile nani.

⁹ Pa no o tupikiye shoxü ilokepu sübolu peighi nani, eno pa müghü pesü o qogheqo loqhive tsü nani.

¹⁰ Paw khurshiqo ye kütsasa kehu tipaqo mqhu no nongu küzüpho luve nani. Kughou timiqo no atupi hephove no pa no ow khagho lo iloghini keno, khurshimi, mishikulu, eno khurkuluqo ghügha no o atupikiye ithauve nani.

¹¹ Paw khurshi pukhuqo pesü pa no o laghi qoqhi nani. Pa no azütakikihi pesü ow timiqo ghiqhi nani, eno o kumto tsükuchoqo ye ayeghi lo ikiqive nani.

¹² Panongu no o küakini xülepe wuve nani eno ow lhidi nhemgha xupuwuve nani. Panongu no o tupikiye kuboleve tsü nani eno o lokughunopu ki kütsave tsü nani. Ow atu, asüpa eno ayeghi ye panongu no azü lo vesüve tsü nani.

¹³ I no o lekungo kishekhave tsü nani, eno o kighilebo ghügha ye chilu kithe move nani.

¹⁴ I no o pesü atuqu lakhi shive tsü nani. No ye akhameqo vesü kepu-a shive nani. No ye khilemu shiqhe puku moae, kughengu Ni ye Ampeu ke; I no piqhivae, ipi Ampeu Alhou no asheshu.

¹⁵ “Ampeu Alhou no Tyre vilo ishi piani: Nono ikiqi keu ghügha mtsa izape akemi no aküsü ghügha igha, eno nongu dolo ghiqhi keu huno azüghimkü lo akeqo ye thüthüshi moni keshea?

¹⁶ Tileno azüghimkü lo kükapumi kümtsü no pano kükalakhü lono iqighive no chijeboike phi ngo aye shisükeu phimini xaqhive nani. Msaighü keu no panongu kuuphi shi pepu nani; panongu no ayeghi lo iqave no atüqhüdo kümtsü khokhoshi nani eno nongu jupe akichiqhi nani.

¹⁷ Panongu no nongu shou akumlo le phe nani eno nongu vilo pi nani, “‘Nongu azüghi mkülo küami, nongu ye kishi pühave akea, O ajekipi mishighüna, no ye azüghi lo akumtou; li eno li ghakütsami no tile akemi shithüghüi cheke!

¹⁸ Ow vekiqhi tsalani azüghimkü lo küami ye khokho shivae, eno no pühave keu lo azüghimkü qha ye apuchopungovae.’

¹⁹ “Kughengu Ampeu Alhou no ishi piani: Kughou I no o pesü pighive keu, timi küghünamo keu mishighüna toi shive tsüni keno, kughou I no azüghi pesü o shou puku no azü kije pesü o küzü luveni keno,

²⁰ tileno I no o pesü khaghi no akuthoku lo ilove keqo gholo puwuve nani, eno ayeghi qhou khaghi no kütsave keqo gholo o pelo küghünape nani; tishikeu lono o ghakhu ye küghüna kithepe moveni; ikemu I no küxümi yeghi lo jukivi kutope qhitsü nani.

²¹ I no o pesü akümsapu shi kishekhave tsü nani, eno no ye kühave nani. O phuighi anamu no ye khilemu ithulu kithe move nani ipi Ampeu Alhou no asheshu.”