EZEKEL 25 - Sumi Naga CL (Re-edited) Bible (BSI)

Amon Shou Tungkuptsa

¹ Ampeu tsa I lau ighi:

² “Timi nu, Ammonmi küdau o gi kugho puwo no panoqo vilo tungkuptsa pilo.

³ Ammonmi vilo pilo, Ampeu Alhou tsa inilo: Ampeu Alhou no ishi piani, Kughou I chineki shipixive, Israel yeghi pesü küghüküghaleive tsü, eno Judah kibolomi haphe sawuve keno nongu no, ‘Aha!’ ipike ghenguno,

⁴ julo, I no amheghi shi nongu pesü Kipelaumi lau phesüve tsü ani, eno panongu no nongu gholo aghazüqo shipe qhino nongu gholo panoqo kungo-a shi nani. Panongu no nongu xathi xochu nani, eno nongu kichhizü sho nani.

⁵ I no Rabbah pesü sayeshi sala achu kümza-a shivetsü nani eno Ammon pesü ambeqo qhikepu-a shivetsü nani. Tileno nongu no Ni ye Ampeu kepi ithi nani.

⁶ Kughengu Ampeu no ishi piani: Nongu no au kukhu eno apukhu peqhepe ilhe no nongu lolo küthakügha kümtsü süno Israel yeghi shou alokivi shie,

⁷ tighenguno julo, I no nongu shou I u chhovae, eno xulepuwuve keu küakini toi nongu pesü shiyeqo lau tsüve nani. Ashiayeqo gholono nongu kütsaleve nani eno nongu ye aghakhu lono pühave nani; I no nongu kütsave nani. Tileno nongu no Ni ye Ampeu kepi ithi nani.

Moab ngo Seir shou Tungkuptsa

⁸ “Ampeu Alhou no ishi piani: Moab ngo Seir no, ‘Julo, Judah laghami ye shiye kütamiqo toivae,’ ipike ghenguno

⁹ Moab sükusho-a ye alughi lo mishighünaqo lono ajekipipu ghakhu, Beth-jeshimoth, Baal-meon ngo Kiriathaim, ishi I no xaqhive nani.

¹⁰ I no Moabmi pesü Ammonmi gholono kipelaumi lau amheghi shi tsüve nani, tishino Ammonmi ye shiyeqo gholono kümsümavepe nani,

¹¹ eno I no Moab shou küghathabe nani. Tileno panongu no Ni ye Ampeu kepi ithi nani.

Edom shou Tungkuptsa

¹² “Ampeu Alhou no ishi piani: Edom no Judah laghami shou amkhülu kelono akithipu shi ghüzave ke ghenguno,

¹³ Ampeu Alhou no ishi piani, I no Edom shou I u chho nani eno timi na tüghashi namu kütsave nani. I no tipau pesü küghüküghaleive tsü nani; Teman lono Dedan kutolo azütakikihi lono ikiqive nani.

¹⁴ Iw timi Israelmi vecheo I no Edom shou amkhülu nani, eno panongu no Edom shou I mlokighide eno I loghu kiqi lono mla nani, panongu no I mkhükulu ithi nani, Ampeu Alhou no asheshu.

Philistia shou Tungkuptsa

¹⁵ “Ampeu Alhou no ishi piani: Philistiami no alolo timi mithi keu xapu aküxü tivilo ghümi kütsaveni ye amkhü luke ghenguno,

¹⁶ Ampeu Alhou no ishi piani, Julo, I no Philistiami shou I u chho nani, I no Kherethmi peve nani eno azüghimkü lo akeqo kütsave nani.

¹⁷ I no aloghu lono amkhükulu kije panoqo shou benani.”