EZEKEL 23 - Sumi Naga CL (Re-edited) Bible (BSI)

Oholah ngo Oholibah

¹ Ampeu tsa I lau ighi:

² Timi nu, aza lakhi nga totimi kini ache.

³ Pama ye Egypt lo kütüqha che; pama ye alhothe lono kütüqha che; pama kichhi tsüqü tsüche eno athathe kichhi pemghave tsüe.

⁴ Akichiu je ye Oholah eno li tsünipu je no Oholibah. Pama ye Iw shive eno pama no apu-angaqo punue. Pama je ye ishi, Oholah no Samaria, eno Oholibah no Jerusalem.

⁵ “Oholah no Iw shi apülaghi kütüqhae, eno li lojipumi Assyriami, aghütomi mine,

⁶ hughaike phi pepu kemi, angh ngo zatsümi, panoqo kümtsü apulhothe ajukivimi, khurshi shou iku iqa no khurkulu sache kemi.

⁷ Li no panoqo sasü kütüqha, panongu ye kümtsü Assyriami kishekiphemi ke, eno li no khunoqo sasü ghaghu shi cheni keno panoqo sü-atu julho pesü li shikitiqe ke.

⁸ Li ye asalha khikhi li no Egypt lono huthu keno ti phevemoe; kughengu li lhothe lono apulhothemi no li shou iku eno li thathe kichhi pemgha no panoqow kütüqha keu pesü li shou lepuku ke.

⁹ Tighenguno, I no li lojipumi Assyriami khunoqo li sasü ghaghu shi akeno panoqo u lo li phesüve tsüae.

¹⁰ Hipaqo no li phimpi lhapheve tsüe; panongu no li pu-angaqo küghaluve; eno panongu no azütakikihi pesü li ghiqhive; kughou küghakütha li shou bekeno li ye totimiqo zülo küghakiche lakhi shive.

¹¹ “Li tsünipu Oholibah no hipau ithulu, li ye li ghaghughale ngo kütüqha keu lo li pafo nguno alau alhoksa shive, ti ye li pafo nguno alhoksau shive ke.

¹² Li ye Assyriami, anghqo ngo zatsümi, ghüshimi aghü nanu chhitoi pepu akemi, khurshi shou iku iqa no khurkulu sache kemi, apulhothe ajukivimi pape ghaghu shike.

¹³ I no li ye kitiqeve keu ithulu; pama gha alaghi aphiphi lo pülake.

¹⁴ Ikemu li no liw kütüqha keu alau shive. Putukha keu tupikiye lo li no timiqo jutho ithulu, ti ye Chaldeami julhoqo huchuyi keu pesü ajutho shisü keu,

¹⁵ panoqo polo apokha tsüghapu, akütsü lo akütsü küküzüphi chijeboi pepu no kümtsü hiyampemi mihie, Babylonmi khuno ghakhu Chaldea keno pano mihike.

¹⁶ Kughou li no panoqo ithulu keno, li no panoqo pape ghaghu shino Chaldea lo panoqo lau atsapemi puwu.

¹⁷ Babylonmi no kikivi keu lüpa lo li lau ighi no panow ghaghughale pesü li shikitiqeve. Panoqo no li shikitiqeve kethiu, li ye inhilai panoqo launo tsüghüve.

¹⁸ Kughou li no li salha pekiphe shi eno aphikümsa pephe piye keno, I no aphimqhü qhiyi li pafo launo tsüghüve ketoi, Ni ye li launo aphimqhü qhiyi tsüghüve.

¹⁹ Ikeghi li no li lhothe tsala lo Egypt yeghi lo kütüqha chekeu kümsülu ghi alau kütüqhauve,

²⁰ tilau li no alojipumi sasü ghaghu shi ache. Panoqo phighü ye khurhaqow toi, eno aphizü ipeghi keu no khurshiw toike.

²¹ Ikehu kughou Egyptmi no o kichhi pemgha eno o lhothe kichhi tsüqü tsü keno no ye o lhothe lo kipti-toti dolo akimthe kumo kümla shikeu khelho ke.”

²² Tighenguno, O Oholibah, Ampeu Alhou no ishi piani: “Julo, nono o lojipumi khunoqo launo inhilai tsüghüve keno I no panoqo xukutho nani eno ako kümtsü lono o lachile penike panoqo saighi nani:

²³ Babylonmi eno Chaldeami, Pekod, Shoa, Koa, eno Assyriami kümtsü gholono apumi ajukivi, angh, zatsümi, hiyampemi, akighichemi, khurshi küsami kümtsü saighi nani.

²⁴ Eno panongu no ahuu no khurkulu ngo akhokupu tuhakulu, eno timi aqokitikhi ishi o mjochile ighi nani. Panongu no azüto kije kitila, eno akütsükuqho xapusü ako kümtsü lono o shou aghili kutope khe nani; eno I no küghakütha panoqo shou qhivetsü nani, panongu no panoqow küghakütha kiqi lono o shou küghatha nani.

²⁵ I no I mlo kishikumo o shou puku nani, tishikeu lono panoqo no aloghu lono o peitha nani. Panongu no o nigipe eno o kini ghithave tsü nani, eno nongu ghülu kemi ye ghüyi lono wove nani. Panongu no o pu-angaqo küghaluve nani, eno nongu ghülu kemi ye ami lono pitiqhive nani.

²⁶ Panongu no o phimini ghi xaleve tsü no ow jukivi chiku-chila ghi pewuve nani.

²⁷ Ghaghughale eno kütüqha keu khikhi Egypt yeghi lono huthu keno I no ti kishekhave tsü nani, tishikeu lono no ye panoqo lau o nhethi jupuku move momu Egypt kümsü kithe move nani.

²⁸ “Kughengu Ampeu Alhou no ishi piani: Julo, nono khunoqo mithi cheni eno khunoqo launo inhilai shi tsüghüve keno I no panoqo u lo no phesüve nani,

²⁹ panongu no akimthipu shi o peitha nani eno nono aghimeshi mlaitha keu xathi pewuve nani, eno aphimini pepipe mono aphikümsa o qhive nani, nono kütüqha keu phikümsa shi akeu ye lhapheve tsü nani. O salha eno kütüqha keu

³⁰ huno o shou hi süghivae, kughengu nono shiyeqo sasü kütüqha eno asü-atu julho pesü o shikitiqeve ke.

³¹ No ye o fo laghi lo wuvae; tighenguno I no li jukhu pesü o u lo süvetsü nani.

³² Ampeu Alhou no ishi piani: “No ye o fo jukhu lono sho nani ti ye kije eno thonhei; o junuqhi nani eno cheqhi nani, kughengu ti ye chhitoi ani;

³³ no ye shokümzü ngo amloksa likhi nani. Akümsapu ngo kütsakungo jukhu, o fo Samaria jukhu ke;

³⁴ nono ti qhoi tayeve nani, eno ajukhu tsapho no atachu pesü o kichhi ghale nani; kughengu I no piqhivae, Ampeu Alhou no asheshu.

³⁵ Tighenguno Ampeu Alhou no ishi piani: Nono I kümsümave eno I pesü o thiu qhiveke ghenguno no ampi no o salha ngo kütüqha keu shekichile xapu masa nani.”

³⁶ Ampeu no I vilo pi: “Timi nu, no ye Oholah ngo Oholibah pama shou küghathabeni kema? Pama vilo pamaw aphikümqhüpu sheshu lo.

³⁷ Kughengu pama ye shupuvae, eno pama u lo aji hedape ani. Pamaw asü-atu julho sasü shupuvae, eno pama ye anuli khunoqo pama no punu keno tipaqo pesü achuqupu shi asü-atu julhoqo mllavae.

³⁸ Tinguno alau, pama ye I lau hipau shivae: pama ye atsala lakhi lono I kimthe chineki shipixi eno Iw Sabbath shikitiqevae.

³⁹ Kughengu kughou pama no asü-atu julho lau pama nuliqo akümllagho shi ghiqhive keno, tipau tsalani no pama no I kimthe chineki shikitiqe niye tile ighike. Eno julo, pama no I kilo shikeu ye hipau ke.

⁴⁰ Pama no putou ghi atsapemi puwu no timiqo kusaghipe; eno panongu no ighi. Panoqo ghenguno nokujo no azü kuchhuve, anhethi lo nudapuve, eno chiku-chilaqo xapuke.

⁴¹ Nokujo no amekusho lakhü lo iqae, tipau zülo aghulhu lüpa qhi eno tipau shou Iw axokütsüngü ngo Iw thazü ghope qhike.

⁴² Ghuthoghüzai kemi sütsa chilu ae, eno asayeqha lono shokümzümi saghi; panongu no totimiqo u lo asapu sütsü eno jukivi kütsüqho pipeke.

⁴³ “Tithiu asalha lono süqo sünheve keu li vilo I no pi, Itehi li ye kütüqhalimi shi panongu no peitha nani!

⁴⁴ Kughengu kiptimi no kütüqhalimi lakhi lau wuche ketoi panongu no li lau wuvae. Panongu no Oholah ngo Oholibah, ghaghulimi lau wuke.

⁴⁵ Ikemu amikuchomi no shupu-salha kemi eno totimi aji pele kemi lau küghakütha shikeu pesü panoqo lau küghatha nani, kughengu pama ye shupu-salha chekemi eno pama u lo aji hedape ani.”

⁴⁶ Kughengu Ampeu Alhou no ishi piani: “Pama lachile kepushi aqokitikhi saghilo eno pama shithüghüi no pükaqhi pelo.

⁴⁷ Aqokitikhi no atu pesü pama veqhi nani eno panoqo zütakikihi pesü pama ghiqhive nani. Panongu no pama pu-angaqo ghiqhive nani eno pama kiqo pitive tsü nani.

⁴⁸ Tishino I no ayeghi hipau lono ashupu asalha kishekhave tsü nani, tishikeu lono totimi kümtsü ghutu luno nokujo toi shupu-salha move nani.

⁴⁹ Panongu no nokujo salha pesü nokujo shou lepuku tsü nani, eno nokujo no asü-atu julho xine makho xapu nani, eno Ni ye Ampeu kepi nongu no ithi nani.”