EZEKEL 2 - Sumi Naga CL (Re-edited) Bible (BSI)

Ezekiel Kukulu

¹ Pa no I vilo pi, “Timi nu, puthugho lo, I no o sasü küptsani.”

² Pa no I pütsa, Aghungu huno I lolo iloghive, eno I pelo puthugho lupe, eno Pa no I pütsa keu I no chilu.

³ Pa no I vilo pi, “Timi nu, I no Israelmi, hekibide shiye, khunoqo I ghobide ani keno tipaqo lau o puwu ani. Ishi tsala kutolo panongu eno pano puasüqo ye I hebide ghi axine shivae.

⁴ Pano kughukoqo ghi ayekümtha eno kuthovi ke: I no panoqo lau o puwu ani, no ye panoqo vilo pilo, ‘Ampeu Alhou no ishi piani.’

⁵ Panongu no chilu na chilu monamu (kughengu panongu ye hekibide lagha ke) panongu pelo tungkupu lakhi panoqo gholo ache kepi ithi penie.

⁶ Eno no, timi nu, ye asahubo ayemhi gholo aghina achuwopaza shou iqalu namu panoqo msa kevilo momu panoqo tsa ini pesü ighü kevilo. Panoqo tsa inipe msave kevilo momu panoqo ju ithulupe aghüthisüve kevilo, kughengu panongu ye hekibide laghami ke.

⁷ Panongu ye hekibide lagha kehu panongu no chiluna monamu no ye I tsa pesü panoqo vilo pilo.

⁸ “Ikemu no timi nu ye I no o vilo kiu pi keno inilo. Hekibide lagha hupau toi hebide kevilo; o kichi xükho no I no kiu o tsü keno tipau chulo.”

⁹ Kughou I no jupuwo keno au lakhi I küdau chhopuwo, eno julo, liküküzü kaku lakhi tipau lo aghi.

¹⁰ Pa no tipau I zülo xükho tipau lo azüu ngo athiu yepuku püaghi, eno akumlo, amloghuju eno ahasapu tsa yepuku püaghie.