EZEKEL 19 - Sumi Naga CL (Re-edited) Bible (BSI)

Israel Kükapumi ghenguno Akumlo

¹ No ye Israel kükapumi ghenguno akumlo shilo,

² eno pilo: O za ye kiu kea? Abongshuuqu! Abongshuuqo dolo li no ipuu; abongshuu lhotheqo gholo li no atiqo saputhu ke.

³ Eno li no li tiqo dolo lakhi saputhu; pa ye abongshuu lhothe shi ipeghive, eno pa no ashi hanikeu shika luve; pa no timiqo tsüqhive ke.

⁴ Shiyeqo no pa ghili chiluve; pa ye panongu qo lono küghaluve, eno panongu no ayikuho pesü Egypt yeghi lo pa fusaghive.

⁵ Kughou li no adou lono ngokhe akeu eno liw lajupu kühave keu ithive keno, li no atiqo dolo lakhiu saluve no pa pesü abongshuu lhothe lakhi shivepe.

⁶ Pa no abongshuuqo gholo itsüwu, eno abongshuu lhothe shi ipeghive, pa ye ashiha shika luve, eno timi tsüqhi pithive,

⁷ pa no chimemi kügha luve. Pano phughiqo kütsave tsü kehu pa ghügha chilu kelo ayeghi eno tile akemiqo ye thüghüive.

⁸ Tileno shiyeqo no akuaqha ako kümtsü lono pa lachile ipeghive; pano khame sükhope pa shou qhi; eno aqo lono pa küghaluve.

⁹ Ayikuho pesü akughu lo vesüve eno Babylon kükau lau saighi; pa pesü akughu shive, tishikeu lono Israel naghutoqo lo pa sütsa chilu pemoni ye shive.

¹⁰ O za ye atsailu lo azü phivilo atsaibo toie, azü kupukuno shi akeu lono axathi kutomo pithi eno alokaqo no chhitoi ke.

¹¹ Tipau loka mtotoi keu no yepemi kükaküsü shive; tino aghasa dolono chuqumghai thuikughi; aloka tubolei ipeghi keu no qhemghai ithulue.

¹² Ikemu axukighide lono atsaibo pigheve, eno ayeghi lo veqhive; kipela mülhü no tipa xathi fukighichive tsü; tipaqo ye ighive no thizümüive. Abo kumtoqo ye ami no pitive.

¹³ Tipau ye asayeqha lo qhai ghoike-a lo shosüpe qhivae.

¹⁴ Eno ami no tipa bo lo akhuni lono ipeghi no axathi pitivae, ikehu abo mtotoi keu kühavae, kükaküsü küsü kühavae. Hi ye akumlo le lakhi eno akumlo shivae.