EZEKEL 18 - Sumi Naga CL (Re-edited) Bible (BSI)

Axine shikeu ye Thi nani

¹ Ampeu tsa I lau ighi:

² “Israel yeghi lo aholetsa hi, ‘Apunoqo no atsaithi kiqhi chu, eno anuliqo no ahu müqüe’ ipi pi-ide chekeu ye kiu kiqi kea?

³ I no xüake toi, Ampeu Alhou no asheshu, nongu ye Israel lo ahole hipau peitha kithe moae.

⁴ Julo, angulho kümtsü Iw ke; apu ngulho ngo anu ngulho ghi Iw ke: Khuu no axine shini keno thive nani.

⁵ “Tsala milakhi no amikucho eno kiu no achipi eno kuchou keno shi cheghi aye,

⁶ tsala pa no naghutoqo shou no chushomo momu Israel kibolomi sü-atu julhoqo shou pa nhethi jupukumo, pa kisüghüu nipu shikitiqemo momu aqhi lo aji wokeu dolono totimi ika wumo,

⁷ khumu shikughujumo, ikemu apiagha kupumiw aküna shoqhi tsüchileve, kiumu pükamo, pa sho pesü müzüthi akemi tsü eno aphimini pesü aphikümsa shi akemi pipe,

⁸ akighishe lono pünamo momu ala kiumu lumo, achipikumo lono pa u süchile luve, timi dolo kuchou xakütha shitsü,

⁹ I zakütsü pape, eno pükhükulu shi mlaitha keu vecheo Iw pimheye pape aye, pa ye amikuchomi; pa ye mtsüqheino xülu nani ipi Ampeu Alhou no asheshue.

¹⁰ “Tsala pa no anu lakhi ajiküxü, hekibideu, khuu thime hipaqo shi cheni keno, papu shiaghi aye

¹¹ (pa ampi no hipaqo kiumu shicheghi mo namu), pa no naghutoqo lono chusho, pa kisüghüu nipu shikitiqe,

¹² kumlhomi ngo akukuphu avehupu shi akemi shikughuju, pükaqhi, aküna shoqhi tsüchile mo, asü-atu julhoqo shou pa nhethi jupuku, aphikümqhüpu mlaitha,

¹³ akighishe lono püna, ala lu cheghi aye, pa ye xülu nani keshea? Pa ye xümo nani. Pa ye aphikümqhüpu hi kümtsü shivae; pa ye mtsüqheino thinani; pa ji ye pa ampi shou anani.

¹⁴ “Tsala timi hipau no anu lakhi, khuu no papu no axine shikeu kümtsü ithuluve akeno; pa no ithulu kemu titoi shimo aye:

¹⁵ pa no naghutoqo lono chusho chemo momu Israel kibolomi sü-atu julhoqo shou pa nhethi jupukumo, pa kisüghüu nipu shikitiqemo,

¹⁶ khumu shikughujumo, aküna shoqhi lumo, kiumu pükamo, ikemu müzüthi akemi lau pa sho tsü eno akuuphi pesü aphikümsa shi akemi pipe,

¹⁷ axine lono pa u süchile luve, akighishe momu ala lumo, Iw pimheye gholu, eno I yezah pape aye; pa ye papu xine ghenguno thimo nani; pa ye mtsüqheino xü nani.

¹⁸ Papu ghenguu ye, pa no süxachu, pa thiküzüu pükaqhi, eno paw timi gholo kiu no akivi kumo keno tipau mla ishi kehu, julo, pa ye pa xine ghenguno thinani.

¹⁹ “Ikeghi nongu no pi, ‘Anu ye kushiye apu kipimi ghenguno aghime shimoni kea?’ Kughou anu no kiu achipi eno kuchou keno shi aye, eno I yezah kümtsü kutokupui pape aye, pa ye mtsüqheino xü nani.

²⁰ Khuu no axine shini keno mtsüqheino thinani. Anu ye apu kipimi ghenguno aghime shimo nani, momu apu ye anu kipimi ghenguno aghime shimo nani. Amikuchomi mikucho ye pa ampi shou ikughi nani, eno kixikilamiw küsakügha ye pa ampi shou ikughi nani.

²¹ “Ikemu tsala kixikilami no pa no mlaitha chekeu xineqo lono tsüghü ighi no I yezah kümtsü pape eno kiu no achipi eno kuchou keno shi aye, pa ye mtsüqheino xü nani; pa ye thimo nani.

²² Pa no mla ithave keqo xine kiumu pa lachile kepu shi kümsüchile tsümo nani; pa no achipiu mikucho shive keu ghenguno pa ye xülu nani.

²³ Ni ye kixikilami no pa laghi lono tsüghü ighi no xülu keu lono kumono pa kithi lou no aloqilu cheni keshea? ipi Ampeu Alhou no asheshu.

²⁴ Ikemu kughou amikuchomi no pa chipiu mikucho lono tsüghüsü idewove no kuchou xakütha shimo eno kixikilami no shiche keu paphi shi aphikümqhüpu shini keno, pa ye xülu nani keshea? Pa no amikucho kümla shi keqo kiumu kümsülu tsümo nani; pa no pishikiqhi kiu shi keno tipau kipimi xapu akeu eno axine shive keu ghenguno pa ye thinani.

²⁵ “Ikeghi nongu no pi, ‘Ampeu laghi ye achipi kumoe.’ Itehi inilo, O Israel laghami: I laghi ye achipiu kumo keshea? Nongu laghiqou no achipikumo ke kumo?

²⁶ Kughou amikuchomi no pa chipiu mikucho lono tsüghüsü wuve no achipikumo shiveni keno, pa ye tipau ghenguno thinani; pa no achipikumo shiveke ghenguno thinani.

²⁷ Itaghi, kughou kixikilami no pa no küsakügha mlaitha chekeu lono tsüghü ighi no achipiu eno kuchou shini keno, pa ye pa küxü xalu nani.

²⁸ Kughengu pa no kümsüju no pa no axine shiche keqo lono tsüghü ighike, pa ye mtsüqheino xü nani; pa ye thimo nani.

²⁹ Ikeghi Israel laghami no pi, ‘Ampeu laghi ye achipi kumoe.’ O Israel laghami, I laghiqo ye achipikumo keshea? Nongu laghiqo no achipikumo ke kumo?

³⁰ “Tighenguno, O Israel laghami, timi lakhikhi shou pütüta laghi kiqi lono I no küghatha nani, Ampeu Alhou no asheshu. Xaidelo, eno nongu xine kümtsü lono tsüghüve lo, tikumo aye axine no nongu kütsakungove nosae.

³¹ Nongu no axine shive keu kümtsü nongu launo pevelo, eno nongu ampi no amlo kithe eno aghungu kithe shilu lo! O Israel laghami, nongu ye kushiye thiveni kea?

³² Kughengu Ni ye khuu kithi lomu aloqilu chemoe ipi Ampeu Alhou no asheshu; ikehu tsüghü ighilo eno xülulo.”