EZEKEL 14 - Sumi Naga CL (Re-edited) Bible (BSI)

Ajulho Kümllami Layemi Kileve

¹ Tithiu Israel lo layemi khami I lau ighi no I zülo iqave.

² Eno Ampeu tsa I lau ighi:

³ “Timi nu, timi hipaqo ye panow asü-atu julho pano mlo lo xapu ani, eno panoqo xine küpxalu kepu pano zülo anie. Mtsüqheino Ni ye panoqo pelo I launo kighinikile lupeni keshea?

⁴ Tighenguno panoqo pütsa no pilo, Ampeu Alhou no ishi piani: Israel laghami khukhumu pa sü-atu julho pesü pa mlo lo xapu eno pa xine küpxalu kepu pa zülo qhi pülaghi tungkupu sasü kushoni ye ighi keu ye Ni Ampeu no asü-atu julhoqo ithulu keu qhemi khochile tsü nani,

⁵ tishianguno Israelmi no pano julhoqo vecheo pano mlo I launo tsüghüsü wuve keu I no luchile luniye ke.

⁶ “Tighenguno Israel laghami vilo pilo, Ampeu Alhou no ishi piani: Xaidelo eno now asü-atu julhoqo launo tsüghüve lo, eno now aphikümqhüpu kümtsü launo agi kughove lo.

⁷ Kughengu Israel laghami momu inaghami Israel lo akemi khukhumu I launo kütüta shive no asü-atu julho pesü pa mlo lo qhive eno pa xine no apukhu küpsüpu shi pa zülo aghi, tishimu tungkupmi lau ighi püzü pa vecheo I vilo kighinikile aye, Ni Ampeu no pa khochile nani.

⁸ I no pa launo I gi kughove nani; pa pesü amchipu eno küghakichepu shitsü nani, eno Iw timi gholono ikhive nani, eno Ni ye Ampeu kepi nongu no ithi nani.

⁹ Tsala tungkupu pishiqhive no atsa pi aye, Ni Ampeu no tungkupu tipau pishiqhive ake, eno I no I pa lachile I u peqhe no Iw timi Israelmi launo pa kütsave nani.

¹⁰ Panongu no pano ghime puqhe nani—tungkupu ngo kighinikile ighikeu pama aghime aphiphi shi nani—

¹¹ tishikeu lono Israel kibolomi ye I launo ala vepimive monani momu pano xine vecheo pano shikitiqe monani, ikemu tishikeu vecheo panongu ye Iw timi shilu nani eno I no panoqo Lhou shive nani ipi Ampeu Alhou no asheshue.”

Jerusalem Msape Qhimo Nani

¹² Ampeu tsa I lau ighi:

¹³ “Timi nu, kughou aküpülü küküha kümla vecheo ayeghi no I hebide ghi axine shini keno, I no tipau lachile ghi I u süqhe nani eno tipau lo chuqu-kusho süghi chekeu lakhave tsüno püqümiye puwu nani, eno tipau lono timi eno tüghashi pithive nani,

¹⁴ tsala timi hipano küthü, Noah, Daniel eno Job noqo no tile aghi namu, panongu ghi pano chipiu mikucho vecheo pano küxü likhi xalu nani, Ampeu Alhou no asheshue.

¹⁵ “Tsala I no tüghashi pelo ayeghi hipau lo ighipe no tipaqo no kütsave eno küghüküghaleive tsü aye, eno tüghashiqo ghenguno timi khumu kathasü wumo aye,

¹⁶ timi hipano küthü no tile aghi namu, I no xüake toi, Ampeu Alhou no asheshu, panongu ghi pano nuliqo ngo angaqo xalumo nani. Panongu likhi xalu nani, ikemu ayeghi hipau ye küghüve nani.

¹⁷ “Momu I no ayeghi tipau shou azütakikihi süghi no, azütakikihi no ayeghi hipau kathawu pelo, eno I no tile timi ngo tüghashi ghiqhive tsüniye shi aye,

¹⁸ timi hipano küthü no tile aghi namu, I no xüake toi, Ampeu Alhou no asheshu, panongu ghi pano tianuliqo mu xalumo nani, ikemu panongu küxü likhi xalu nani.

¹⁹ “Momu I no ayeghi tipau lo timi eno tüghashi ghiqhiveni ye püsa puwu eno I loghu pephe no tipau shou aji pele aye,

²⁰ Noah, Daniel eno Job noqo no tile aghi namu, I no xüake toi, Ampeu Alhou no asheshu, panongu ghi pano tianuliqo mu xalumo nani. Panongu ye xaluve nani ikemu pano chipiu mikucho vecheo pano küxü xalu nani.

²¹ “Kughengu Ampeu no ishi piani: I no Jerusalem lo timi eno tüghashi kütsaveni kehu tile I mhekiqi küghakütha bidi: azütakikihi, püqümiye, tüghashi, eno püsa puwu kelo ti ye kishi alhoksa shinani kelae!

²² Ikemu julo, tile xülu kemi atianuli saipeghi luni kemi khami anani; kughou panongu no nongu lau ighi kelo nongu no pano küxü eno akümla ithuluni keno, I no Jerusalem shou amhekiqi süghi keu ye kümtsü akivi kepi nongu lopiqilu nani.

²³ Kughou nongu no pano küxü eno akümla ithuluni keno, panongu no nongu lopiqi tsü nani, eno tipau lono I no kiu shi keno ti kümtsü Ni ye akiqi küha keu lono kumo kepi nongu no ithi nani, Ampeu Alhou no sheshue.”