EZEKEL 13 - Sumi Naga CL (Re-edited) Bible (BSI)

Kichile Tungkupmi Kileve

¹ Ampeu tsa I lau ighi:

² “Timi nu, Israel lo tungkupmi khunoqo no tungkuptsa pi ani keno, panoqo lachile tungkuptsa pilo, eno tungkupu khunoqo no pano mlo lono tungkuptsa pi ani keno panoqo vilo pilo: ‘Ampeu tsa inilo!’

³ Ampeu no ishi piani, Mbomzü tungkupmi khunono pano ampi kükümsü pape cheni, eno kiumu ithulu chemo keno ahasapue!

⁴ O Israel, now tungkupmi ye kütsakungope ake alo atineqo toie.

⁵ Nongu ye atupikiye ileqive keu-a lo wumoe, momu Ampeu tsala, aghükishi lo akumto shilu kepushi Israel laghami ghenguno atupikiye shiqhe tsümoe.

⁶ Panongu no kichile kungunhetsü eno pishikiqhi chineye ithulu. Ampeu no panoqo puwumo keghi panongu no, ‘Ampeu no asheshuvae,’ ipi cheni, eno Pa pelo pano tsa shikupu tsü peniye laju cheni.

⁷ I no pimo keghi nongu no, ‘Ampeu no asheshuvae,’ pikeu ye nongu ye kichile kungunhetsü ithulu eno pishikiqhi chine pi anike kumo keshea?”

⁸ Tighenguno Ampeu no ishi piani: “Nongu no kichile tsa piqhi eno pishikiqhi kungunhetsü ithuluke ghenguno, julo, Ni ye nongu lachile ani, ipi Ampeu Alhou no asheshue.

⁹ Tungkupmi khunoqo no kichile kungunhetsü ithulu eno pishikiqhi chine picheni keno panoqo shou I u pesü lachile nani. Panongu ye Iw timi hoho lo ngolumo nani momu Israel laghamiw ajeyeküsü kaku lo yesü mla nani, momu Israel yeghi lo iloghi lumo nani. Ni ye Ampeu Alhou kepi nongu no ithi nani.

¹⁰ Panongu no thebei Iw timi saküghüzüve no külakishi küha keghi ‘külakishi’ ipike ghenguno, eno timiqo no atupikiye shiqhe puku aye, tungkupmi hipaqo no tipau lo metsüghoi nudave tsüke ghenguno

¹¹ khunoqo no metsüghoi nudave tsü keno panoqo vilo hipau ye ikiqive nani ipi lo! Tsütsüghu kije ghuqhi nani, O mürasü kije eno pasapagha mülhü ighi nani eno nongu ye ikiqive nani.

¹² Kughou atupikiye ikiqiveni keno, nongu vilo ishi pimoni keshea, ‘Nongu no tipau lo nudapuku keu ye khilave akea?’

¹³ Ikehu Ampeu Alhou no ishi piani: I loghu lono I no pasapagha mülhü puwu nani, I mlokighide lono tsütsüghu kije ghuqhi nani, eno aloghu lono mürasü kije puwu no qhoi kütsaleve nani.

¹⁴ Nongu no metsüghoi nuda püakeu tupikiye I no hephove nani, eno ayeghi lo tipau tulaqhive nani, tishikeu lono tipau boqha ghopuku püakeu ye thoqhaleive nani. Kughou tipau ikiqiveni keno, nongu ye tipau lono pühave nani, eno Ni ye Ampeu kepi nongu no ithi nani.

¹⁵ Ikehu I no atupikiye eno khunono tipau lo metsüghoi nuda keno panoqo shou I loghu puwu nani, eno I no nongu vilo pi nani, atupikiye eno tipau shou nudapuku keqo ye kühavae,

¹⁶ Israel lo tungkupmi khunoqo no Jerusalem ghenguno tungkuptsa pi eno tipau lo külakishi küha keghi külakishi kungunhetsü ithulu keno panongu ye kühave nani ipi Ampeu Alhou no asheshu.

¹⁷ “Eno no, timi nu, ye ow timi ngaqo, khunoqo no panoqo mlo lotsü lono tungkuptsa pi keno panoqo lau o gi kughopuwo no lachile ghi tungkuptsa pilo,

¹⁸ Ampeu no ishi piani: Topumi khunoqo no küdüu u kükha tsüghupe au kümtsü lo tsüghapu, eno timi jeli ghenguno agi künhaphi mlano timiqo kitime luve niye shi keno ahasapue! Nongu ye Iw timiqo ngulho pithive no nongu ngulho püxüpe qhilu nani keshea?

¹⁹ Nongu ye ashothi anau au kichhi lakhi eno asho kughupo kititiqo ghenguno Iw timiqo zülono I shikitiqevae, Iw timiqo lau akimki tsa pi eno akimki tsa ini kemi no pithimo kepu timiqo pithive eno püxümo kepu timiqo püxüve ke.

²⁰ “Tighenguno Ampeu Alhou no ishi piani: Julo, Ni ye nonguw küdüu u kükha lachile ani, tipaqo vecheo nongu no aghau toi timiqo kitime luve kehu I no nongu u lono tipaqo süthave tsü nani, eno nongu no khunoqo kitime keno aghauqo toi panoqo khaqhi pheve nani.

²¹ Nongu gi künhaphi ghi I no süxüve tsü nani eno nongu u lono Iw timiqo xaphe luve nani, panongu ye nongu u lo kitimepe ngo move nani, eno Ni ye Ampeu kepi nongu no ithi nani.

²² I no amikuchomi püqapunu mo keghi nongu no akumou lono amikuchou ghüthi püsüve tsü, eno kixikilami shikumto no pa pelo kixikila laghi lono tsüghü idelu no pa küxü xalu pemoke ghenguno

²³ nongu ye kichile kungunhetsü momu saqhisali shimo nani. I no nongu u lono Iw timi xaluve nani. Eno Ni ye Ampeu kepi nongu no ithi nani.”