EZEKEL 12 - Sumi Naga CL (Re-edited) Bible (BSI)

Judah Küghakulu Michipu

¹ Ampeu tsa I lau ighi:

² “Timi nu, no ye hekibide kibo lo xüanie. Panongu ye anhethi animu ithulu chemo, akini xapu animu chilu chemoe, kughengu panongu ye hekibide kibolomi ke.

³ Timi nu, o ghenguno haphe sawuve kemi toi akho kutolo, eno tsüküvü lono panoqo nhethe lono haphe sawuve kemi paphishi wuvelo. No ye haphe sawuve kemi toi o kungo-a lono a-a kütau lo panoqo nhethe lono wuve lo. Ishiake panongu no hekibide kibolomi lakhi shi aghimu panongu ghi vethaluvi ke.

⁴ Tsüküvü lono no ye haphe sawuve kemi no akho kutope akeshi panoqo nhethe lono o kho xapu ighilo, eno avelau panoqo nhethe lono wuvelo, ti ye haphe sawuve kemi no shimasa keu hutoi shilo.

⁵ Panoqo nhethe lono atupikiye chhupholo, eno tipau kathasü akho pewulo.

⁶ Panoqo nhethe lono o bighi lo akho xapu luve lo, eno tipau xapusü züghüi kelono wuvelo. No ye o gi küzüluve lo, tishianguno ayeghi ithulumo nani, kughengu Israel laghami ghenguno I no o pesü amchipu lakhi shipe qhivae.”

⁷ Azah I tsü ketoi I no tishie. Haphe sawuve kemi kho toi I no tsüküvü lono I kho xapu ighi no avelau I u no atupikiye chhupho ilo. Züghüive kelo I no panoqo nhethe lono I bighi lono akho xapu ipeve.

⁸ Inaqhe Ampeu tsa I lau ighi:

⁹ “Timi nu, Israel laghami, hekibide kibolomi ye o vilo, ‘No ye kiu shi ania pi inijumo keshea?’

¹⁰ Panoqo vilo pilo, ‘Ampeu Alhou no ishi piani: Tungkuptsa hipau ye Jerusalem lo sakiphemi ngo Israel laghami tile akemi kümtsü ghenguno ke.’

¹¹ Pilo, ‘Ni ye nongu ghenguno amchipu ke: I no shi aketoi, nongu lau hipau shi nani. Panongu ye akughu shi haphe sawuve nani.’

¹² Kükapuu khuu panoqo gholo ani keno pa no züghüive kemtsa pa bighi lo pa kho xapuqhe luve no wuve nani. Panongu no tipau lono pa saipe niye atupikiye chhupho ilo nani. Pa no pa gi küzüluve nani tishino pa ye pa nhethi tsükho pesü ayeghi hipau jumoni ye shi nani.

¹³ Eno I no pa shou I khame vepuku nani, I lichhe lo pa kitime luve nani. Chaldeami yeghi Babylon lo I no pa saighive nani, ikemu pa ye ti ithulumo nani eno pa ye tilau no thive nani.

¹⁴ Khunoqo no pa homxape ani keno, pa kukuphumi ngo paw ghüshimi ghi kümtsü I no amülhü süvela lo kuthole puwuve nani, eno I no azütakikihi süjope panoqo pape nani.

¹⁵ Kughou I no shiyeqo gholo panoqo hale eno aghakhuqo lo panoqo kuthole puwuni keno panongu no Ni ye Ampeu kepi ithi nani.

¹⁶ Ikemu I no panoqo dolo khami ye azütakikihi, püqümiye eno püsa lono pojo lupe nani, tishikeu lono panongu no panow aphikümqhüpu pesü shiye khunoqo lau wu keno tipaqo lau asheshu nani, ti ye Ni ye Ampeu kepi ithi peniye ke.”

¹⁷ Ampeu tsa I lau ighi:

¹⁸ “Timi nu, thüthüshi o sho chulo, eno khokhoshi kütakihi azü yelo.

¹⁹ Ayeghi hipau lo timiqo vilo pilo, Ampeu no Israel yeghi lo Jerusalem lo küxümi vilo ishi piani: Panongu no kütakihi panow sho chunani, eno aghüthisü azü yenani. Hipa ghola lono li yeghi lo akeu thime kümtsü xaleve tsü nani, ti ye hipau lo küxümiqo no heqhi buqhi keu ghenguno ke.

²⁰ Küghüna akeu mishighünaqo ye kütsave nani, eno ayeghi ye küghüküghaleive nani; eno nongu no Ni ye Ampeu kepi ithi nani.”

²¹ Ampeu tsa I lau ighi:

²² “Timi nu, Israel yeghi lo nongu no aholetsa hipau, ‘Atsala ye kushuo, eno kungunhetsü ye shikupu movae’ ipi chekeu ye kiu kea?

²³ Tighenguno panoqo vilo pilo, ‘Ampeu Alhou no ishi piani: Aholetsa hipau I no kishekhave tsüni, eno Israel lo aholetsa shi hipau peitha move nani.’ Ikemu panoqo vilo pilo, Atsala ye kupunuvae, kungunhetsü kümtsü shikupu nani.

²⁴ Kughengu Israel lagha lo kichile kungunhetsü momu tungkuptsa ala phasü piche keu kühave nani.

²⁵ Kughengu Ni ye Ampeu ke; I no pinikeu tsa I no pi nani, eno tipau ye shikupu nani. Tipau ye munuve monani, ikemu O hekibide laghami, nongu ghuloki lono I no atsa pi nani eno tipau shikupu nani, Ampeu Alhou no asheshuvae.”

²⁶ Ampeu tsa I lau ighi:

²⁷ “Timi nu, julo, Israel laghami no pie, ‘Pa no kungunhetsü ithulu keu ye ghulo kütau ghenguno ke, eno hithiu ado kushuo lo ghenguno ke.’

²⁸ Tighenguno panoqo vilo pilo, Ampeu Alhou no ishi piani: I tsa kiumu munu kitheve moae, ikemu I no atsa pikeu ye shikupu nani, Ampeu Alhou no asheshuvae.”