EZEKEL 11 - Sumi Naga CL (Re-edited) Bible (BSI)

Kixikila Mijekütsümi shou Küghatha

¹ Aghungu no I sünheqhepe Ampeu kilo khagho kipela küdau I saighi. Julo, khagho kulaghi lo timi muku pungu aghi. Panoqo gholo Azzur nu Jaazaniah, Benaiah nu Pelatiah eno timiqow sakiphemi ghi aghi keu I no ithulu.

² Pa no I vilo pi, “Timi nu, hipaqo ye axine kuchughu akeqo eno mishighüna hipau lo küsakügha kichetsü keqo ke;

³ panongu no pi, ‘Aki mlani keu do ighi mphie. Mishighüna hipau ye aliqu ke eno ningu no ashileqhi ke.’

⁴ Tighenguno panoqo lachile tungkuptsa pilo, tungkuptsa pilo, O timi nu.”

⁵ Ampeu Ghungu no I shou ikughive, eno Pa no I vilo pi, “Ampeu no ishi piani pilo: Israel laghami, nongu no kümsüju lo. Kughengu nongu kükümsü lo iloghi akeu thimeqo I no ithi ani.

⁶ Nonguw hekiqhi bukiqhi no küghüsü mishighüna chhivae, eno tipa laghila lo hekiqhi bukiqhi no chhivae.

⁷ Tighenguno Ampeu Alhou no piani: Nonguw hekiqhi bukiqhi khikhi nongu no alaghila lo qhipüani keno, tipaqo ye ashileqhi ke, eno mishighüna hipau ye aliqu ke, ikemu nongu ye tipau lono saipeghive nani.

⁸ Nongu no azütakikihi msa chenike I no azütakikihi nongu shou süghi nani, ipi Ampeu Alhou no asheshu.

⁹ I no aghakhu lono nongu saipeghive nani, nongu ye inaghami u lo phesüve tsü nani, eno nongu shou küghakütha benani.

¹⁰ Nongu ye ghüyi lono wove nani. I no Israel lughi lono nongu shou xakütha shi nani, eno Ni ye Ampeu kepi nongu no ithi nani.

¹¹ Mishighüna hipau ye nongu liqu shimo nani momu nongu ye hipau lo ashileqhi shimo nani. I no Israel lughi lono nongu shou xakütha shi nani,

¹² eno nongu no Ni ye Ampeu kepi ithi nani. Kughengu nongu ye I kükütsü lo cheche movae momu Iw pimheyeqo gholu movae, ikemu shiye nongu homxape akeqow pimheye kiqi lono mlaitha cheni ke.”

¹³ Hipa thiu I no tungkuptsa pi akelo, Benaiah nu Pelatiah hupau ye thive. Tithiu I no I gi pishiqho luve no asütsa kuloghi lono qa no pi, “Ya, Ampeu Alhou! No ye Israelmi ghükulumi kümtsü pühaveni keshea?”

Israel Mlo Kithe eno Aghungu

¹⁴ Ampeu tsa I lau ighi:

¹⁵ “Timi nu, o thiküzümi, o bolomiu ghi, Israel laghami kümtsü ghili Jerusalem lo küxümi no ishi pivae, ‘Ampeu launo putosüve lo; ayeghi hipau ye amheghi shi ningu tsüvae.’

¹⁶ Tighenguno pilo, ‘Ampeu no ishi piani: I no putou shiyeqo gholo panongu puwuve na, aghakhuqo lo panoqo kutholeve puwuve namu itaghi aghakhu khilehi panongu no wuve keno tilau ghi Ni ye panoqo lau achineki lakhi shi achenie.’

¹⁷ Tighenguno pilo, ‘Ampeu Alhou no ishi piani: I no timiqo gholono nongu hekütsü nani eno aghakhu khipaqo lo nongu kutholeve puwuve keno tipaqo lono nongu kumqo nani, eno I no Israel yeghi pesü nongu tsü nani.’

¹⁸ Eno kughou panongu no tile ighini keno, panongu no tile aphikümqhüpu thime eno kuchhube kütsüla kümtsü ikhive nani.

¹⁹ I no amlo lakhi panoqo tsü nani, eno aghungu kithe panoqo lolo sütsü nani. I no panoqo phimpi lono atu mlo ikhive tsü nani eno aghokulu mlo panoqo tsü nani,

²⁰ tishikeu lono panongu no I kükütsü lo cheche nani eno Iw pimheye papelu no tipaqo gholu nani. Eno panongu ye Iw timi shive nani eno I no pano Lhou shive nani.

²¹ Ikemu khuno mlo no aphikümqhüpu thime ngo kuchhube kütsülaqo pape cheni keno I no panoqo kütsü shou pano kümlaqo lepukutsü nani, ipi Ampeu Alhou no asheshu.”

²² Tithiu cherubim no panoqo chishibo süqhe luve, kuluho no panoqo shelo shi, eno Israel Lhou juküvü no panoqo shou auve.

²³ Ampeu juküvü no mishighüna lono ikuve no kipelau naghuto akeu lo ngoluve.

²⁴ Alhou Ghungu huno I süqhe luve eno kungunhetsü lono I sasü Chaldea lo haphe sawuve kemi gholo ighive. Tishino kungunhetsü khikhi I no ithulu keno tino I zülono kunguu ikuve.

²⁵ I no haphe sawuve kemi lau Ampeu no I piyekeu kümtsü pive tsü.