EZEKEL 10 - Sumi Naga CL (Re-edited) Bible (BSI)

Ampeu Juküvü no Achineki Qhive

¹ Tithiu I no jukelo cherubim kütsüqa shou aliho akeu lo thime lakhi sapphire toikeu ipeghi, kükalakhü lakhi jukimihi shi ipeghi.

² Eno Pa no timi hi phepheike phi pepu akeu vilo pi, “Cherubim qholo iluche keu kuluhoqo dolo ilove lo. Cherubim dolono amibalu iqü akeu pesü o u shepichhi lo, eno tipaqo pesü mishighüna shou küza pukulo.” Pa no I nhethe lono wuve.

³ Tipau dolo cherubim ye achineki apeu puthugho ae, kughou timi huno tipau lo ilove keno, khüngküsü no achebo alou chhitoive.

⁴ Ampeu juküvü cherub launo ikuve no achineki kulaghi küdau wuve, achineki lo khüngküsü no chhitoive, eno achebo ye Ampeu juküvü yevüqai keu no chhitoive.

⁵ Cherubim chishiboqo ghügha ye khalau achebo kutolo chilue, ti ye Akughushu Lhou no atsa pikeu sütsa toike.

⁶ Pa no timi hi phepheike phi pepu akeu azah tsü, “Ilu chekeu kuluhoqo mta lo cherubim mta lo no ami ikhilu lo,” pa no ilove no kuluho lakhi phivilo puthugho luve.

⁷ Cherub lakhi no cherubim mta lo ami akeu küdau au chhophe, eno ami hami ikhilu no tipau pesü timi hi phepheike phi pepu akeu u lo sütsü, pa no tipau ikhiluve no ipeve.

⁸ Cherubimqo ye pano chishibo qholo timi u toike xapu ae.

⁹ I no jupuwo keloye cherubim phivilo kuluho bidi aghi, cherub lakhikhi shelo kuluho lakhikhi ae, eno kuluho ye beryl tu toi mülapui ipeghi ke.

¹⁰ Tipaqo ju ithulu kelo pano bidi gha aju kimihi ke, kuluho lakhi lo kuluho lakhi aghi kepu toie.

¹¹ Kughou tipaqo no iluwuni keno, tipaqo ye xatsüghü mono ako bidi khiküdau wunishi keno wulu ke, ikemu kuluho azüu chekeu no khiküdau tsüghü woni keno, kütauqo ghi xatsüghü mono apape wue.

¹² Tipaqo phimpi, amtsü, kuluho kuchoyi, eno achishiboqo kümtsü anhethi chhitoi xapu ae, kuluho bidi gha tishi ake.

¹³ I no chilu ghi kuluhoqo kukeu ye, “chhekütsüghü kuluhoqo.”

¹⁴ Eno lakhikhi no agi bidi xapu ae: agi atüghüu ye cherub gi, agi akiniu ye timi gi, agi aküthüu ye abongshuu gi eno agi abidiu ye alhuqu gi.

¹⁵ Cherub no kunguu ikuve. Hipaqo ye I no Khebar züla lo ithulu keu aküxüküa lhoxüqo ke.

¹⁶ Kughou cherubim no wuve keno, kuluhoqo no pano shelo apape wuve. Eno kughou cherubim no ayeghi lono yeikuni ke panoqo chishibo xakho keno, kuluhoqo ye panongu zülono ithave moe.

¹⁷ Kughou panongu no inaqhoi puthugho luve keno, hipaqo ghi puthugho luve, eno kughou panongu no kunguu yeiku keno, hipaqo ghi panongu gholono kunguu ikuve, kughengu aküxüküa lhoxüqo ghungu ye tipaqo gholo ae.

¹⁸ Tithiu Ampeu juküvü ye achineki hukikha lono wuve no cherubim shou ngoluve.

¹⁹ Cherubim no yewu chekelo panoqo chishibo xakho no, kuluhoqo no panongu shelo shipüzü I nhethe lono ayeghi lono kunguu yeikuve. Eno panongu no kipelau khagho Ampeu ki kulaghi lo puthugho luve, eno Israel Lhou juküvü no panoqo shou ikughive.

²⁰ Hipaqo ye Israel Lhou qholo aküxüküa lhoxüqo I no Khebar züla lono ithulu keqo ke; eno tipaqo ye cherubim kepi I no ithi ae.

²¹ Tipaqo lakhikhi no agi bidi xapu, achishibo bidi, eno panoqo chishibo qholo timi u kimihi xapu ae.

²² Panoqo gi jukimihi ye I no Khebar züla lo khunoqo gi ithulu keno panoqo ju kimihi ke. Lhoxü lakhikhi no azüu küdau müzüchoi vejoi wuve.