EZEKEL 1 - Sumi Naga CL (Re-edited) Bible (BSI)

Ezekiel no Babylon lo Wu

¹ Atsala apunguu, aqhi abidiu, ampe chighiaküthüu lo, ni ye Khebar züla lo haphe sawuve kemi gholo ae, tile kungugha kokiyeve eno I no Alhouw kungunhetsü ithulu.

² Tipa qhi atsala apunguu lo (ti ye Akükau Jehoiachin haphe sawuve keu mpe apunguu shi ae),

³ Chaldeami yeghi lo Khebar züla lono Ampeu tsa Buz nu achineu Ezekiel lau ighi, Ampeu u no pa shou ae.

Ampeu Juküvü

⁴ I no ju akelo pasapagha mülhü lakhi ahuu no ighi eno khüngküsü kije lakhi yevüqai keu no vehomxape ae, ami no tamono kulophapha ae, eno ami mta lo ayi no yepüvü ketoi ae.

⁵ Eno tipau mta lono aküxüküa lhoxü jukimihi bidi ipeghi. Panoqo ju ye hitoi: timi jukimihi,

⁶ ikemu tipaqo lakhikhi no agi bidi eno achishibo bidi puae.

⁷ Tipaqo pukhu ye müzüchoi, eno panoqo phitsü ye amishi pukhu mütsü toike. Eno tipaqo ye alazayi süpheve ketoi phuphushi.

⁸ Tipaqo ye achishibo qhou ako bidi lo timi u xapu ae, eno kümtsü agi ngo achishibo bidi hitoi pua:

⁹ achishibo lakhi no lakhi chokilepe ae. Tipaqo lakhikhi no azüu vejoi yewu, eno yewu chekelo tsüghüve moe.

¹⁰ Panoqo lakhikhi ju ye hitoi: agi ye timi jumihi, ajeu küdau no abongshuu gi xapu, piyiu no amshitsü gi xapu, eno tipano bidi ye alhuqu gi xapu ae.

¹¹ Panoqo gi ye titoi ke. Panoqo chishibo ye kunguu küdau xakhope ae. Lhoxü lakhikhi no achishibo kinini xapu ae, eno tipaqo lakhino lakhi chishibo chokilepe ae, eno achishibo kinini no panoqo phimpi küzüpe ae.

¹² Panoqo lakhikhi no vejoi azüu yewu. Khile khilemu aghungu no wu kelo panoqo ghi tsüghü mono vejoi wue.

¹³ Aküxüküa lhoxü jukimihi ye, amibalu iqü akeu jumihi, akuluqhe hula-hila kulophapha iqü aketoi ke. Eno ami ye vüqai, eno ami mta lono tsütsüpha kulopha ipeghi.

¹⁴ Tsütsüpha kulopha akeshi, aküxüküa lhoxüqo ghi ilhe ipeilo ae.

¹⁵ I no aküxüküa lhoxüqo ju akelo, kuluho lakhi ayeghi shou aküxüküa lhoxüqo phivilo ae, eno lakhikhi no tipaqo lakhikhi ghenguno ae.

¹⁶ Kuluho ju akoghe ye hitoi: akughupu tu yevüqai keu ju toike. Kuluho bidi ye aju aphiphi, tipaqo ju akoghe ye kuluho alou kuluho akeu toike.

¹⁷ Kughou kuluho no iluwuni keno, tipaqo ye itsü eno ithamo namu ako bidi lo khila khilamu wuve.

¹⁸ Tipaqo mütsü ye qhemghai eno akümzapu, eno amtsü bidi kümtsü anhethi no chhitoi ae.

¹⁹ Kughou aküxüküa lhoxüqo no wuni keno, kuluhoqo no tipaqo papewu; eno kughou aküxüküa lhoxüqo no ayeghi lono kunguu ikuni keno kuluhoqo ghi kunguu ikue.

²⁰ Aghungu no khile wukeno, kuluho ghi wue, eno kuluho no tipaqo gholono kunguu iku, kughengu aküxüküa lhoxüqo ghungu ye kuluho lo ake.

²¹ Kughou tipaqo no itha wuni keno, hipaqo ghi wu; kughou tipaqo no puthughoni keno, hipaqo ghi puthugho, eno kughou tipaqo no ayeghi lono kunguu ikuni keno, hipaqo ghi tipaqo gholono kunguu iku, kughengu aküxüküa lhoxüqo ghungu ye tipaqo lolo ae.

²² Aküxüküa lhoxüqo kütsü shou aliho toikeu ae, tsüghükhüi keu tu toi phuphushi keu no panoqo kütsü shou nhape ae.

²³ Lakhino lakhi shelo shino aliho qholo panoqo chishibo ye müzüchoi xachhope ae. Aküxüküa lhoxüqo lakhikhi no achishibo kinini xapu no panoqo phimpi küzüpe ae.

²⁴ Kughou tipaqo no wuni keno, tipaqo chishibo kukulo no azüghi zü qowu akeshi, Akughushuu ghügha toi, ghüshimi no iqhaighu akeshi ighae.

²⁵ Eno tipaqo kütsü lo aliho shou no asütsa lakhi ighi. Kughou tipaqo no inaqhoi puthughove keno, tipaqo chishibo ghi inaqhoi ngove.

²⁶ Tipaqo kütsü shou aliho lo kükalakhü toike lakhi ae, tipau ye sapphire tu mihi; eno kükalakhü toike shou timi jukimihi toike lakhi no iqa ae.

²⁷ Kiu pa chita toi ithulu akeno tipau nguno kunguu ayi kipti yepüvü aketoi I no ithulu, ti ye ami no vehomxa iqü aketoi ke. Eno pa chita toi ithulu akeu aqhou ami toi I no ithulue, vüqai keu no pa vehomxape ae.

²⁸ Tsüghu ake tsalani khüngküsü lo milisü ju kimihi toi tipau ju ye yevüqai keu no vehomxape ae. Ampeu juküvü ju kimihi ye titoi ke. Kughou I no ti ithulu keno, I no agi pishiqho luve, eno asütsa lakhi I pütsa keu I no chilu.