ESTHER 9 - Sumi Naga CL (Re-edited) Bible (BSI)

Jewmi no Aghümi Kütsave

¹ Adar qhi atsala chighiaküthüu, ti ye aqhi chighiakiniu lo kughou akükau yezah pephe niye shi akeno, tipani Jewmi ghümi no panongu shou ampeu shive niye laju ake lono bidelau shive: Jewmi no pano mithi akeqo shou ampeu shiluve.

² Jewmi no Akükau Ahasuerus ghakhu kümtsü lo khunono panongu ghüza niye phuche keno tipaqo shou au benike panow mishighünaqo lo hekütsü luve. Eno khunomu panongu mjochile ithughi mlave, kughengu panongu kümsa no ashiaye kümtsü shou ikughive ke.

³ Aghakhuqo lo hiyampemi, yepemi, angh, eno akükau züqhukishimi kümtsü no Jewmi kuphu, kughengu Mordecai sükümsa no panoqo tsüqü luve.

⁴ Kughengu Mordecai ye akükau kilo kijemi lakhi shive, pa jekipi ye aphughi kümtsü lo veküpha wove, eno pa ye itaghi alau mto kitheve.

⁵ Jewmi no azütakikihi pesü pano ghümi ghiqhi eno panongu kütsave, panongu no pano mithi akeqo lau pulo aketoi shive.

⁶ Susa lo likhino Jewmi no timi 500 ghiqhive tsü,

⁷ eno Parshandatha, Dalphon, Aspatha,

⁸ Poratha, Adalia, Aridatha,

⁹ Parmashta, Arisai, Aridai eno Vaizatha,

¹⁰ Hammedatha nu, Jewmi ghümi, Haman nu chighi, hipaqo pithive, ikemu panongu ye tinhemgha kiumu xulepuwu moe.

¹¹ Tipani Susa lo timi khije pithi keno asütsa pesü akükau tsüve.

¹² Akükau no Kükaliu Esther vilo pi, “Susa lo Jewmi no timi 500 eno Haman nu pano chighi ghi pithive tsüae. Imaye panongu ye akükau phughi kütauqo loye kiu shive akelae! Itehi o kupulo ye kiu eno nono qhüiniju akeu ye kiu kea? Ti shikupu tsü nanie.”

¹³ Eno Esther no pi, “Akükau lopu shi aghi aye, Jewmi Susa lo akeqo pelo akükau yezah kütsü kiqi lono thoghiu ghi tishilu pelo. Eno Haman nuliqo ghi tshükiqhi-a lono tshüqhive pelo.”

¹⁴ Tighenguno akükau no tishilu penike azah tsüve. Ayezah lakhi Susa lono tsü puwu, eno Haman nuli pano chighi ye tshüqhive.

¹⁵ Jewmi khunoqo Susa lo akeno panongu no Adar qhi atsala chighiabidiu lo ghi hekütsü no Susa lo timi 300 pithive, ikemu panongu ye tinhemgha shou au bemoe.

¹⁶ Jewmi kütami akükau phughiqo lo akeqo ghi panongu küxü süsho nike hekütsü luve, eno pano ghümi launo akulhoqhi luno pano mithi chekeqo qhethonhe lhotsüni pungu heqhive, ikemu panongu ye tinhemgha shou au bemoe.

¹⁷ Hi no Adar qhi atsala chighiaküthüu lono shikeu, eno atsala chighiabidiu loye panongu no akulhoqhi no tipa tsalani no aghulhu eno alokivi tsala shi.

¹⁸ Ikemu Jewmi Susa lo akeqo ye atsala chighiaküthüu eno chighiabidiu lo ghi hekütsü eno atsala chighiapunguu lono akulhoqhi no tipa tsalani no aghulhu eno alokivi tsala shilu.

¹⁹ Tighenguno Jewmi aphulomi, khunono aphu lo xü akeno, panongu ye Adar qhi atsala chighiabidiu loye alokivi eno aghulhu tsala shi ikhilu, eno lakhino lakhi lau achuqupu gho pesü tsükile keu tsala shilu.

Purim Ghulhu

²⁰ Mordecai no hipaqo yekithipe Jewmi Akükau Ahasuerus ghakhu, putou eno aphivilo lo akeqo kümtsü lau yepe tsüpuwu no

²¹ ampe atsütsü Adar qhi atsala chighiabidiu eno chighiapunguu lo aghulhu shi penike azah shitsü,

²² ti ye Jewmi no aghümi launo akulhoqhilu keu tsala, panongu mloghime pesü alokivi shilu keu, eno amloksa lono akulhokiqhi ithulu keu tsala shi ghi panongu pelo aghulhu eno alokivi shilu, achuqupu pesü kumlhomi lau eno lakhino lakhi lau tsükilelu peniye ke.

²³ Tighenguno panongu no kiu huthulu eno Mordecai no kiu panongu lau yepuwu keno panongu no ti peluve.

²⁴ Kughengu Agagmi Hammedatha nu Haman, Jewmi kümtsü ghümi, no Jewmi kütsaveni ke küsüqe no asaqhi ke, tishino panongu chunudave no kütsave niye shike.

²⁵ Ikemu kughou no akükau zülo hipa vehu süghi keno, pa no akiye lono azah tsüve, eno Haman no küsakügha kukughu Jewmi shou shiniye shikeu huno pa kütsü shou ikughive, eno pa ngo pa nuliqo ye tshükiqhi-a lono tshüqhi pithi kepu shive.

²⁶ Tighenguno panongu no atsala hipaqo pesü Purim ipi kuve, ti ye asakiqhi tsala ipi ani. Tighenguno, yesü lo kümtsü yepüakeu eno panongu no hipau vehu lo kiu sholu keno tipaqo ghenguno

²⁷ Jewmi ye pano ampi eno pano tikughuko ngo pano gholo sülu kemi kümtsü no atsala hiküma pheve mono akumto shi yepüakeu kiqi lono eno ampe atsütsü kihitha püakeu tsala lono ikhiluni ke pulolu,

²⁸ tishikeu lono atsala hipaqo ye kümsüchilelu no tiqheli kümtsü lo, alagha, aphughi, eno mishighüna kümtsü lo Purim tsala ye ikhiluni eno Jewmi dolo khilemu pepimhe move keu shimoni, momu kümsüchilelu keu tsala hipaqo ye pano tiqhelimi dolono kishekhave moni keu shie.

²⁹ Tithiu Abihail nga, Kükaliu Esther, eno Jewmi Mordecai pama no yesü akiniu yepuwu no Purim tsala ghenguno ghutu kithe.

³⁰ Akükau Ahasuerus phughi 127 lo Jewmi akeqo kümtsü lau aloino keu eno kuchou tsa pesü yepuwu,

³¹ ti ye Mordecai, Jewmi eno Kükaliu Esther pama no panongu ghutu püake toi Purim tsalaqo ye atusho pekithi püakeu dolono ikhilu masa eno panongu tikughuko kümtsü no panongu no kümvü eno mlokeu kümsüma mono peche peniye ke.

³² Kükaliu Esther zakütsü huno Purim khuaye shive, eno ti ye akiye lono yepe qhive.