ESTHER 8 - Sumi Naga CL (Re-edited) Bible (BSI)

Esther no Jewmi Xalu

¹ Tipa tsalani Akükau Ahasuerus no Jewmi ghümi Haman ki pesü Kükaliu Esther tsüve. Eno Mordecai no akükau zülo ighie, kughengu Esther no pa ye khuu keno piveke.

² Akükauw jedapu nguthi, khikhi pa no Haman launo luve keno, tipau pe Mordecai tsüve. Eno Esther no Mordecai pelo Haman kilo ampeu shivepe.

³ Tithiu Esther no itaghi akükau pütsa. Li no pa pukhu philo itsaqino qae eno Agagmi Haman küsakügha kukughu eno pa no Jewmi shou küsüqe püakeu ikhichileve tsü peniye pa qhüiniju.

⁴ Kughou akükau no Esther lau ameshoyi kükaküsü chhopuwo keno,

⁵ Esther no ithu akükau zülo puthughove. Li no pi, “Akükau lopu shilu eno pa no I kimiyeqhiyi ithulu aghi, akükau zülo achipi shi aghi eno pa nhethe lo I no pa lopu shilu aghi aye, Agagmi Hammedatha nu Haman no akükau phughi kümtsü lo Jewmi kütsaveni ke yesü yekeu hu xachileve kepushi azah lakhi yepuwu tsülo.

⁶ Kughengu kishino ni ye Iw timiqo lau amhekiqi ighi niye akeu shou jupuku luni kea? Momu ni ye kishino I laghaqo shou kütsakungo ighi niye akeu puqhe luni kea?”

⁷ Ikehu Akükau Ahasuerus no Kükaliu Esther ngo Jewmi Mordecai pama vilo pi, “Julo, I no Haman ki Kükaliu Esther tsüvae, eno panongu no tshükiqhi-a lono pa tshüqhivae, kughengu pa no Jewmi shou pa u beniye shike.

⁸ Ikemu nono pulo aketoi akükau jelono nono Jewmi vehulo yelu nani, eno akükau nguthi pesü tipau chishidalu nani, kughengu akükau jelono ayezah yeve no akükau nguthi no chishidave keu ye xachile lumo nanie.”

⁹ Aqhi aküthüu, ti ye Sivan qhi shi akelo, atsala muku aküthüu lo, akükau yezah kighithimi kukütsü. Eno Mordecai no azah tsükeu kiqi lono Jewmi ghenguno India lono Ethiopia kutolo aghakhu 127 lo yepemi, angh eno aphughi lo hiyampemi kümtsü lau, pütüta ghakhu kiyethi eno pütüta tsauno, eno Jewmi ghengu ghi pano kiyethi eno pano tsauno ayezah lakhi yepuwue.

¹⁰ Pa no Akükau Ahasuerus jelono ye no tipau lo akükauw jedapu nguthi no chishidave. Tishino pa no akükauw khurshiki lono kishephe keu khurshi, ti ye akükau kümlapu lo peitha chekeu khurshi kümthüqo lono yesü külha puwu,

¹¹ eno pi, akükau no mishighüna kümtsü lo Jewmi akeqo pelo hekütsü luno panongu küxü süsholu penike, eno khuno ghakhu momu khuno shiaye ghüshimi no panongu heqhi buqhini ye shikeno, panongu pelo atianuli eno totimi shi aghimu kütsave, pithive eno püghave no panow tinhemgha kiviqo xulelu penike khaqhive tsüae,

¹² hi ye Adar qhi, aqhi chighiakiniu, atsala chighiaküthüni lono Akükau Ahasuerus kükaqha lo aphughi akeqo kümtsü lo tishilu penike khaqhi tsüe.

¹³ Kiu yephe keno kiyepa lakhi ye aphughi kümtsü lo xaküthaza shi tsüpuwu no aqha zülo pephe piyepe, eno Jewmi ye tipani no pano ghümi shou amkhülu penike kutolupe.

¹⁴ Tighenguno akükau no piputo keu kiqi lono aghinimi no khurshi kümthü khikhi akükau kümlapu lo peitha cheni keno tipaqo lo ikuve no mtazü wuve. Xaküthaza ye Susa lo akighiki lono tsüpuwue.

¹⁵ Tishino Mordecai no akükau zülono atsüla ngo metsüghoi keu kükaphi, ameshoyi kütsükuqho kije, phephei eno hughai keu chijeboike phi pepusü wuve, eno Susa mishighüna lo akemi no ighamku alovie.

¹⁶ Jewmi ghenguno ti ye amlokiqi eno kunuvüqai keu, aloino eno agigihu tüqhüdo shive.

¹⁷ Aphughi kümtsü lo khile akükau yezah ighi keno, tile Jewmi dolo amlokiqi eno alokivi, aghulhu eno tiqhetini shi. Eno aghakhu lo timi kutomo no panongu ghi Jewmi kepi shuphe, kughengu Jewmi kümsa no panongu shou ikughive ke.