ESTHER 7 - Sumi Naga CL (Re-edited) Bible (BSI)

¹ Ikehu akükau ngo Haman pama ye Kükaliu Esther gholo aghulhu lo wuve.

² Eno atsala akiniu lo, aghulhu thiu panongu no atsaizü sho akelo, akükau no itaghi Esther vilo pi, “Nono kümsü pulo akeu ye kiu kea, Kükaliu Esther? I no ti o tsü nani. Eno nono qhüiniju akeu ye kiu kea? I kükaqha tüxa kutolomu shikupu tsü nani.”

³ Tileno Kükaliu Esther no khochile, “O nhethe lo I kimiyeqhiyi ithulu, eno akükau lopu shilu aghi aye, O akükau, I no kümsü eno qhüiniju akeu ye I küxü eno Iw timiqo süsho tsü peniye ke.

⁴ Kughengu ningu, ni eno Iw timiqo ye kütsave, pithive eno püghave peniye jepuwuvae. Tsala ningu pesü kiptimi, totimi eno aqüaxemi shi jepuwuve aghi aye ni ye inaqhoi ngoveni che, kughengu ningu ghime kitikhi ye akükau mhekiqi sasü kimhe akepu kühake.”

⁵ Tileno Akükau Ahasuerus no Kükaliu Esther vilo pi, “Ti ye khuu no, eno pa ye khile ani, khuu no msa mono hipau shiluni kea?”

⁶ Esther no pi, “Ashimi aghümi lakhi! Hi Haman küsaküghau noke!” Ikelo Haman ye akükau ngo kükaliu pama zülo thüghüive.

Haman Tshüqhive

⁷ Akükau ye aji sho akeu lono ithu aloghu idesü akighiki ghutu lo wuve, ikemu Haman ye Kükaliu Esther launo pa küxü pükhatsü peniye ngove, kughengu akükau ye pa ghüzave nani pütsae pi pa no ithuluve.

⁸ Akükau no akighiki ghutu lono atsaizü sho akeu-a lo ideighi, ikelo Haman ye Esther no ngo akeu lakhü lo ikiqive. Akükau no pi, “Pa ye I kilo ghi eno I nhethe lo ghi kükaliu shipüthalu nani keshea?” Atsa hipau akükau kichi lono ipeghi khavi, panongu no Haman gi küzüve tsü.

⁹ Tileno akükau hiju chekeu shokomi lakhi Harbona no pi, “Tinguno alau, Haman no Mordecai ghenguno tshükiqhi-a kuto püani. Mordecai, khuu tsa vecheo akükau xalu keno, pa tshüqhi pithiveni ye tshükiqhi-a akiqhelau auxakuchho muku-kini Haman kilo mla püani.” Akükau no pi, “Tipau lono pa tshüqhivelo.”

¹⁰ Tighenguno panongu no Haman no Mordecai ghenguno tshükiqhi-a mla püakeu lono pa tshüqhi pithive. Tithiu no akükau loghu ye iqüve.